Türkmenistanyň Garaşsyzlyk ýyllarynda ilkinji toparlaýyn küşt çempionaty 2026-njy ýylyň 22 – 28-nji marty aralygynda Aşgabatda geçiriler.
Bu ýaryşyň esasy maksady paýhas sportuny halk arasynda giňden ýaýmak, oýnuň toparlaýyn görnüşini ösdürmek we küşt hereketine dürli guramalary hem kompaniýalary çekmekdir.
Çempionat halkara ülňülerine laýyklykda, oýnuň ahyryna çenli her göçüm üçin 30 sekunt goşmak bilen, her oýunça 90 minut wagt bermek arkaly geçiriler.
Her ýaryşdaky oýunlar alty tagtada oýnalar, bäşinji tagtada zenanlar, altynjy tagtada bolsa 20 ýaşdan kiçi ýetginjekler oýnar. Toparlaryň düzümi üç sany ätiýaçlyk oýunçyny we oýna gatnaşmaga hukuksyz kapitany hem öz içine alýar. Şunda çempionatyň guramaçylary daşary ýurtly oýunçylaryň – topary hödürleýän gurama bilen gönüden-göni baglanyşyksyz islendik çagyrylan oýunçylaryň goşulmagyna rugsat berýärler.
Ýaryşyň düzgünlerine görä, topara ýeňiş üçin iki utuk, deňme-deňlik üçin bir utuk berler, ýeňliş üçin bolsa utuk berilmez.
Çempionatyň netijeleri boýunça ýeňiji topar dünýä we Aziýa toparlaýyn çempionatlarynda Türkmenistanyň adyndan çykyş etmek hukugyny gazanar.
Mundan başga-da, «Hususy sektoryň iň gowy topary» diýen ýörite bölüm göz öňünde tutulypdyr, bu bolsa kompaniýalaryň we hususy guramalaryň arasynda iň güýçli topary belli etmäge mümkinçilik berer.
Türkmenistanyň Küşt federasiýasy toparlaýyn küşt oýnuny ulgamlaýyn ösdürmek we oňa gatnaşýanlaryň sanyny artdyrmak maksady bilen, bu ýaryşy her ýyl geçirmegi meýilleşdirýär.
Häzirki güne çenli bäş topar çempionata gatnaşjakdygyny tassyklady. Ýaryşda ýene üç topar üçin ýer bar. Öz toparyňyzy hödürlemek ýa-da bar bolan toparlaryň birinde oýnamak isleýän bolsaňyz, ýurdumyzyň iň gowy küştçüleri bilen bäsleşmek mümkinçiligiňiz barka goşulyň! Ýöne bilip goýuň, bu örän seýrek mümkinçilikdir.
Şeýle hem bu taryhy ýaryşyň baş hemaýatkäri bolup, ýurdumyzyň küşt jemgyýetçiliginde giňden ykrar edilmek mümkinçilik-de bar.
Arza bermegiň soňky möhleti 20-nji martdyr.
Bellige alyş ýaryşyň resmi yglannamasynda ýerleşdirilen QR kody ýa-da salgysyndaky salgylanma, şeýle hem guramaçylaryň +993 61292843 ýa-da +993 61320322 telefon belgileri arkaly habarlaşyp bilersiňiz.
