Türkmenistanly küştçi gyzlar ýakynda Özbegistanyň Buhara şäherinde tamamlanan «Women’s Chess Championship» atly 4-nji halkara zenanlaryň küşt çempionatynda ýokary netije görkezdiler.

Bäsleşige dokuz ýurduň: Awstriýanyň, Belarusyň, Hindistanyň, Gazagystanyň, Gyrgyzystanyň, Mongoliýanyň, Russiýanyň, Türkmenistanyň we Özbegistanyň wekilleri gatnaşdy. Olar saýlama üç sany toparda – «Masters» (10 oýunçy), «Challengers» (41 oýunçy) we «Futures» (62 oýunçy) şweýsar usulynda bäsleşdiler. Wagt gözegçiligi her göçüm üçin 30 sekunt goşmak bilen, her oýun üçin 60 minut diýlip bellendi.

Türkmenistan bu ýaryşda garşydaşlaryna güýçli bäsleşik görkezen, geljegine umyt baglanýan birnäçe küştçi bilen çykyş etdi.

«Çallengers» («B») toparynda, ýagny ökdeligi boýunça ikinji toparda, Türkmenabat şäherindäki 13-nji sport mekdebiniň okuwçysy Mähri Agamyradowa tutuş ýaryşyň dowamynda yzygiderli we ynamly oýun görkezip, 16 ýaşa çenli gyzlaryň arasynda birinji orny eýeledi.

«Futures» («C») toparynda, ýagny ökdeligi boýunça üçünji toparda Aşgabat şäherindäki Ýöriteleşdirilen küşt we şaşka mekdebiniň okuwçysy Eneş Arazmedowa ýokary derejeli taýýarlyk we bäsdeşlik görkezip, bäşinji orny eýeledi. Türkmenabat şäherindäki 41-nji orta mekdebiň 11-nji synp okuwçysy we ýerli 13-nji sport mekdebiniň okuwçysy Gülmira Seýilhanowa dagy bolsa 62 bäsdeşiň arasynda ýedinji orny eýelediler.

Bu ýaryşda türkmen küştçüleriniň üstünlikli çykyşy Türkmenistanda zenan küştüniň dowamly ösýändigini we ýaş türgenleriň ýokary mümkinçiliklerini tassyklaýar.