Aşgabat şäheriniň bedenterbiýe we sport baradaky Baş müdürliginiň Ýöriteleşdirilen küşt we şaşka mekdebinde küşt boýunça saýlama ýaryşy tamamlandy. Onuň netijeleri boýunça türki döwletletiň arasynda taryhda ilkinji küşt olimpiadasyna gatnaşjak milli ýygyndy toparyň (16 ýaşa çenli toparyň) düzümi kesgitlenildi.

Saýlama ýaryşa ýurdumyzyň ähli welaýatlaryndan 49 sany ýaş zehinli küştçi gatnaşdy. Ýaryş 45 minut wagt gözegçiliginde her göçüm üçin 30 sekunt goşmak bilen, 9 tapgyrda şweýsar ulgamy boýunça geçirildi.

Uly ýaşly küştçüler bilen deň derejede bäsleşýän kiçi ýaşly (12 ýaşa çenli we 14 ýaşa çenli) toparlaryň üstünlikli çykyş etmegi bu ýylky saýlama tapgyrynyň esasy aýratynlygy boldy. Bu ýagdaý Türkmenistanyň Küşt federasiýasynyň täze düzüminiň 2022-nji ýyldan bäri durmuşa geçirip gelýän çagalar sportuny ösdürmegiň uzak möhletli strategiýasynyň netijelidigini tassyklaýar.

Dartgynly bäsleşigiň netijeleri boýunça, halkara derejede ýurdumyza wekilçilik etjek küştçüleriň düzümi:

1. Ali Ahmedow (Aşgabat, 2012-nji ýylda doglan, 49-njy orta mekdebiň 7-nji synp okuwçysy) – 7 utuk;

2. Ahmet Artykow (Mary welaýaty, 2011-nji ýylda doglan, Mary şäherindäki iňlis dilini we ynsanperwer ylymlary çuňňur öwredýän orta mekdebiniň 9-njy synp okuwçysy) – 7 utuk;

3. Gurbanmyrat Rüstemow (Lebap welaýaty, 2010-njy ýylda doglan, 41-nji orta mekdebiň 10-njy synp okuwçysy) – 6,5 utuk;

4. Dilber Hupbyýewa (Daşoguz welaýaty, 2014-nji ýylda doglan, 7-nji orta mekdebiň 6-njy synp okuwçysy) – 6,5 utuk (ýetginjekler arasynda açyk toparda ajaýyp çykyş etdi);

5. Zalina Iminowa (Aşgabat, 2014 nji ýylda doglan, 16-njy orta mekdebiň 10-njy synp okuwçysy) – 6,5 utuk (zenanlar arasynda iň gowy netije görkezen).

Türki döwletleriň arasynda küşt olimpiadasy 13 – 18-nji maý aralygynda Gazagystanyň Türküstan şäherinde geçiriler. Bu ýaryşa Azerbaýjandan, Gazagystandan, Gyrgyzystandan, Türkiýeden, Türkmenistandan we Özbegistandan iň güýçli ýaşlar toparlary gatnaşar. Şol bir wagtyň özünde, Almatyda uly ýaşly toparlar üçin hem ýaryşlar geçiriler, bu bolsa biziň toparymyzyň şu ýylyň sentýabr aýynda Samarkantda geçiriljek 46-njy Bütindünýä küşt olimpiadasyna taýýarlygynda möhüm ädim bolar.

Häzirki wagtda Türki küşt assosiasiýasyny (TKA) döretmek boýunça iş dowam edýär, onuň esaslandyryjy agzalarynyň arasynda Türkmenistan hem bar. Bu guramany döretmek baradaky Ähtnama 2025-nji ýylyň 20-nji oktýabrynda Astanada gol çekilipdi. Türki döwletleriň küşt federasiýalarynyň ýolbaşçylarynyň duşuşygy 2025-nji ýylyň 13-nji dekabrynda Türkiýäniň Gaziantep şäherinde geçirildi. Ol türki döwletleriň 16 ýaşa çenli küştçüleriniň arasynda ilkinji gezek bolan küşt çempionaty bilen bir wagtda geçirildi. Şonda ildeşimiz Gurbanmyrat Rüstemow öz halkara reýtingini 73,6 bal ýokary galdyrdy.

Türkmenistan üçin Türki küşt assosiasiýasyna agzalygy bilelikdäki yzygiderli ýaryşlara gatnaşmak, ýaryş senenamasyny giňeltmek we küştçülere has ýokary derejeli tejribe bermek mümkinçiliklerini açýar. Şeýle hem, bu küştçülere hünär derejesiniň ýokarlanmagyna we FIDE reýtinginiň ýokarlanmagyna goşant goşar. Türkmenistanyň Küşt federasiýasynda biziň toparymyzyň geljekki olimpiada gatnaşmagynyň ýurdumyzyň sport abraýyny halkara derejesinde berkitmekde ýene bir ädim boljakdygyna we ýaş küştçüleriň hünär taýdan ösmegine ýardam etjekdigine umyt edýär.