2026-njy ýylyň 24 – 27-nji marty aralygynda Türkmenistanda energetika pudagynda «ýaşyl» geçişi goldamak we tehnologik innowasiýalary ornaşdyrmak maksady bilen iki sany tehniki maslahaty geçirildi.
Çäreler «Ýewropa Bileleşigi (ÝB) Türkmenistanyň ýaşyl ösüşi üçin: 2024 – 2029-njy ýyllar üçin syýasy dialog we howanyň üýtgemegi boýunça hereketler» atly taslamanyň çäklerinde guraldy. Bu taslama Ýewropa Bileleşigi we Germaniýanyň Federal Daşary işler ministrligi tarapyndan bilelikde maliýeleşdirilýär hem-de Germaniýanyň Halkara hyzmatdaşlyk boýunça jemgyýeti (GIZ) tarapyndan amala aşyrylýar.
Maslahatyň esasy tälimçileri hökmünde germaniýaly hünärmenler çykyş etdiler. Olar türkmen hünärmenlerine energiýa netijeliligi, ulgamlaýyn seljerme hem-de inženerçilik innowasiýalary babatda Germaniýanyň öňdebaryjy tejribelerini we işläp taýýarlamalaryny tanyşdyrdylar.
«Energiýa ulgamyna gaýtadan dikeldilýän energiýa çeşmelerini ornaşdyrmak» temasyna bagyşlanan ilkinji maslahat 24-nji martda Mary şäherindäki Türkmenistanyň Döwlet energetika institutynyň binýadynda geçirildi. Germaniýanyň öňdebaryjy hünärmenleri energetika pudagynyň wekillerine ýel we gün energiýasy boýunça häzirki zaman tehnologiýalary, «ýaşyl» wodorod hem-de energiýany saklaýyş ulgamlary (BESS) barada giňişleýin maglumat berdiler. Şeýle hem täzelenýän energiýa çeşmelerini energiýa ulgamyna netijeli integrasiýa etmegiň tehniki ugurlary boýunça pikir alyşmalar geçirildi.
Soňra, 27-nji martda Aşgabat şäherindäki «Ýyldyz» myhmanhanasynyň mejlisler zalynda «Guýularyň bitewiligi: nebitgaz çykaryşynda täze çemeleşmeler, şol sanda emeli aň (EA) we gaz känleriniň öndürijiligini ýokarlandyrmak tehnologiýalary» atly ikinji maslahat geçirildi. Nebitgaz toplumynyň hünärmenlerine guýularyň bitewiligini üpjün etmegiň innowasion usullary, materiallar ylmy we korroziýa garşy göreşmek, şeýle hem emeli aňy ulanyp, öňünden çaklaýjy tehniki hyzmaty guramak we guýularyň işini optimizirlemek boýunça amaly mysallar hödürlendi. Şeýle hem senagat howpsuzlygy (HSE) we ekologiýa töwekgelçiliklerini azaltmak meselelerine aýratyn üns berildi.
«Bu sapar we tehniki maslahatlaryň tapgyry durnukly energetika geçişine bolan umumy ygrarlylygymyzy görkezýär. Ýewropa Bileleşiginiň öňdebaryjy tejribesini Türkmenistanyň milli ileri tutulýan ugurlary bilen utgaşdyrmak arkaly, biz diňe tehnologiýalary ornaşdyrmak bilen çäklenmän, eýsem uzak möhletleýin howa durnuklylygynyň binýadyny döredýäris. Metan zyňyndylaryny azaltmak we täzelenýän energiýa çeşmelerini integrasiýa etmek ýaly aýratyn möhüm ugurlardaky hyzmatdaşlygymyz ählumumy ekologiýa gün tertibine hakyky goşant bolup durýar» diýip, «Ýewropa Bileleşigi (ÝB) Türkmenistanyň ýaşyl ösüşi üçin: 2024 – 2029-njy ýyllar üçin syýasy dialog we howanyň üýtgemegi boýunça hereketler» taslamasynyň ýolbaşçysy, doktor Karolina Milow belledi.
