Aşgabatda möhüm sport çäresi – ýurdumyzyň küşt boýunça ilkinji toparlaýyn çempionaty tamamlandy. Türkmenistanyň Küşt federasiýasy tarapyndan guralan bu ýaryş paýtagtymyzyň Ýöriteleşdirilen küşt we şaşka mekdebinde geçirildi.
Aýlawly ulgam boýunça geçirilen bu ýaryş milli sportuň taryhynda täze sahypany açdy. Çempionata jemi 100 küştçüden ybarat 12 topar gatnaşdy.
Ýaryşa sport guramalary, okuw mekdepleri we jemgyýetçilik birleşikleri gatnaşdy. Üç topar Aşgabadyň Ýöriteleşdirilen küşt we şaşka mekdebine, iki topar Lebap welaýatynyň bedenterbiýe we sport komitetine, bir topar bolsa Aşgabadyň we Ahal welaýatynyň maýyplar üçin sport klubuna, Türkmenistanyň Milli sport oýunlary merkezine, Ahal welaýatynyň bedenterbiýe we sport komitetine, Türkmenistanyň Içeri işler ministrliginiň «Galkan» sport klubuna, Türkmen döwlet bedenterbiýe we sport institutyna, «Küşt älemi» atly küşt akademiýasyna we «Halk hazynasy» hojalyk jemgyýetine degişlidi.
Ýaryş 11 tapgyrdan ybarat bolup, oýunlar her tapgyrda alty tagtada geçirildi. 12 – 14 ýaş aralygyndaky oýunçylardan ybarat «Nesil» ýaşlar toparynyň çykyşy aýratyn ünsi çekdi. Ýaş küştçüler ýokary taýýarlyk derejesini we tejribeli oýunçylara garşy oýunda ýeňşe bolan erk-isleglerini görkezdiler.
Birinji tagtada oýnan doganlar Maksat we Saparmyrat Atabaýewleriň («AŞGABAT» we «GALKAN» toparlary) arasyndaky oýun iň dartgynly duşuşyklaryň biri boldy. Bäş sagatlyk paýhas bäsleşiginden soň, oýun deňme-deň tamamlandy, bu bolsa umumy toparlaýyn sanawda «AŞGABAT» toparyna öňdäki ornuny berkitmäge mümkinçilik berdi.
Umumy toparlaýyn sanawyň netijeleri boýunça, aşakdakylar ýeňiji boldular: I orny Ýöriteleşdirilen küşt we şaşka mekdebiniň «AŞGABAT» topary, II orny Türkmenistanyň Içeri işler ministrliginiň sport klubunyň «GALKAN» topary, III orny bolsa Türkmen döwlet bedenterbiýe we sport institutynyň «TALYP SPORTY» topary eýeledi.
Ýeňijilere sylaglama dabarasynda göçme kuboklar, şahadatnamalar we medallar gowşuryldy. Mundan başga-da, ýekebara sanawda her tagtada iň gowy oýnan küştçüler ýörite baýraklar bilen bellendi.
Türkmenistanyň ýakynda geçirilen toparlaýyn çempionaty ýurdumyzda küşt oýnuna bolan höwesiň artýandygyny tassyklady we akyl sportunyň görnüşlerini ilat arasynda giňden ýaýratmak wezipesini durmuşa geçirmekde möhüm ädim boldy.
