Gyşky sport toplumynda konkide figuralaýyn typmak boýunça Türkmenistanyň Birinjiligi ugrunda ýaryş geçirildi. Bütindünýä saglyk gününe gabatlanyp geçirilen bu bäsleşik hakyky ajaýyplyk we sungat baýramy boldy. Bäsdeşler estetikanyň, fiziki güýjüň we ynamly ýerine ýetirişiň utgaşmasyny görkezip, tomaşaçylary çylşyrymly hereketler bilen haýran galdyrdylar.

Buz meýdançasynda üç derejede on dokuz türgen bäsleşdi.

«Basic» (başlangyç derejede) ilkinji üç ýeri eýelänler:

Mariýa Wyžlakowa;

Weronika Öwezowa;

Melisa Ýüje.

«Basic Novice» (täze başlanlar) derejesinde:

Aýlar Ekäýewa;

Mährijemal Rozyýewa;

Alýona Gorýunowa.

«Intermediate» we «Advanced Novice» (orta we ýokary derejeli täze başlanlar) toparynda ýeňijiler:

Gyzlar toparynda: Leýla Gaýlyýewa.

Oglanlar toparynda: Rahman Hojamgulyýew.

Tälimçiler we ýaryşa gatnaşanlar sporty ösdürmekde edýän taýsyz tagallalary üçin ýurdumyzyň Hökümetine çuňňur hoşallyk bildirdiler. Halkara ülňülerine laýyk gelýän häzirki zaman buz meýdançalarynda gyşky sport görnüşleri Türkmenistanda güýçli ösüşe eýe boldy.

Ýaş nesliň sporta, hususan-da, figuralaýyn typmaga bolan höwesi barha artýar. Ýaş türgenlerimiz eýýäm beýleki ýurtlarda buz meýdançasyna çykyp, halkara sahnalarynda deň-duşlary bilen bäsleşdiler. Tälimçiler hem öz ussatlyklaryny ýokarlandyrýarlar. Häzirki wagtda Türkmenistanyň Bedenterbiýe we sport baradaky döwlet komitetiniň sport mekdebiniň okuwçylaryna tejribeli tälimçiler, şol sanda hünäri boýunça horeograflar tälim berýär.

Tälimçiler toparynyň ýaş we işeňňir adamlardan ybaratdygyny bellemek gerek. Mysal üçin, şu ýylky ýaryşlaryň ýeňijileri, esasan Ilina Karimowanyň okuwçylarydyr. Bu tutanýerli türgen Belarusyň döwlet bedenterbiýe uniwersitetini figuraly typmak tälimçisi hünäri boýunça tamamlady. Ilinanyň özi-de ýaryşlara gatnaşyp, ýeňiş gazanypdy, 2019-njy ýyldan bäri bolsa ýaşlar toparynyň milli tälimçisi bolup işleýär.

– Biziň işimiz kyn, ýöne gyzykly. Meniň özüm şu ýerde 2007-nji ýyldan bäri Aýhanym Gulamalyýewadan tälim aldym – diýip, Ilina aýdýar. – Meniň iň uly üstünliklerimiň biri 2012-nji ýylda Dubaýda geçirilen «Altyn Kubok» ýetginjekler halkara ýaryşynda altyn medal gazanmagymdyr. Şonda ýurdumyzyň ýygyndy topary bäş medal gazandy.

Türkmenistanyň Birinjiligi ugrundaky ýaryş tamamlandy, ýöne figuraçylar özlerini sporta doly bagyşlamak bilen, türgenleşiklerini dowam etdirýärler. Häzirki wagtda çagalaryň iň uly arzuwy 2027-nji ýylda Krasnoýarskda geçiriljek «Aziýanyň çagalary» halkara sport oýunlarynda ýurdumyzy mynasyp derejede görkezmekdir.