Geçen hepdäniň wakalary Gahryman Arkadagymyz tarapyndan başy başlanyp, Arkadagly Gahryman Serdarymyzyň baştutanlygynda yzygiderli durmuşa geçirilýän, ykdysadyýetiň ähli pudaklarynyň depginli ösüşine, halkymyzyň abadan durmuşy baradaky hemmetaraplaýyn alada, halkara hyzmatdaşlygyň giňeldilmegine gönükdirilen syýasy ugruň barha rowaçlanýandygyny aýdyň görkezdi.

6-njy aprelde hormatly Prezidentimiz Serdar Berdimuhamedow Ministrler Kabinetiniň Başlygynyň orunbasary T.Atahallyýewiň hem-de welaýatlaryň häkimleriniň gatnaşmagynda sanly ulgam arkaly iş maslahatyny geçirdi. Onda ýurdumyzyň oba hojalyk toplumynda we sebitlerde alnyp barylýan işler bilen baglanyşykly meselelere garaldy. Hormatly Prezidentimiz möwsümleýin işlerde, hususan-da, gowaça ekişinde, bugdaýa ideg etmekde agrotehniki kadalaryň berk berjaý edilmeginiň oba hojalyk önümçiliginiň netijeliligini ýokarlandyrmaga, ekinlerden bol hasyl almaga, pudagy durnukly ösdürmäge ýardam berýändigini nygtady.

Arkadagly Gahryman Serdarymyz ýurdumyzy durmuş-ykdysady taýdan ösdürmäge gönükdirilen maksatnamalara laýyklykda, şu ýyl welaýatlarda açylyp ulanmaga berilmegi meýilleşdirilen dürli maksatly desgalardaky gurluşyk işleriniň talabalaýyk ýerine ýetirilmegini üpjün etmegi tabşyrdy.

7-nji aprelde hormatly Prezidentimiz Serdar Berdimuhamedowyň gatnaşmagynda Bütindünýä saglyk güni mynasybetli köpçülikleýin welosipedli ýöriş geçirildi. Döwlet Baştutanymyzyň bu sport çäresine gatnaşmagy diňe bir ajaýyp beden taýýarlygynyň nusgasy bolman, eýsem, döwletimiziň sport diplomatiýasyny daşary syýasatyň strategik ugurlarynyň biri hökmünde yzygiderli öňe sürýändiginiň aýdyň beýanyna öwrüldi.

Hökümet agzalary, Mejlisiň, ministrlikleriň ýolbaşçylary, diplomatlar, ýokary okuw mekdepleriniň rektorlary we talyplar, ýaş türgenler, jemgyýetçilik wekilleri, köpçülikleýin habar beriş serişdeleriniň wekilleri döwlet Baştutanymyz bilen bilelikde Çandybil şaýolunyň we Bekrewe köçesiniň çatrygynda ýerleşýän «Welosiped» binasyndan başlap, Ruhyýet köşgüne çenli dowam eden ýörişe gatnaşdylar.

8-nji aprelde hormatly Prezidentimiz Serdar Berdimuhamedow Mary welaýatynyň Ýolöten etrabynyň Ymambaba geňeşliginiň çäginde täze, döwrebap şäherçäniň düýbüni tutmak dabarasyna gatnaşdy. Türkmenistanyň Gurluşyk we binagärlik ministrligi tarapyndan guruljak täze şäherçe 800 gektardan gowrak meýdany öz içine alar. Şäherçede jemi 22 müň 500-den gowrak ilata niýetlenen 4 müň 500 sany ýaşaýyş jaýy bina ediler.

Döwlet Baştutanymyz Mary welaýatynyň durmuş-ykdysady taýdan ösdürilmegine möhüm ähmiýet berilýändigini, bu ýerde kuwwatly senagat kärhanalarynyň, medeni-durmuş maksatly binalaryň we desgalaryň yzygiderli gurlup ulanmaga berilýändigini, ýakyn günlerde bolsa möhüm ähmiýetli taryhy taslamanyň — «Galkynyş» gaz käniniň dördünji tapgyryna badalga beriljekdigini belledi. “Biz geljekde hem ýurdumyzyň welaýatlaryny toplumlaýyn ösdürmek, döwrebap desgalary gurmak, täze önümçilikleri döretmek boýunça maksatnamalaýyn işleri üstünlikli dowam etdireris. Biziň esasy maksadymyz halkymyzyň, her bir maşgalanyň, ýurdumyzyň her bir raýatynyň abadan, bagtyýar durmuşda ýaşamagyny üpjün etmekden ybaratdyr” diýip, hormatly Prezidentimiz aýtdy.

7-nji aprelde türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow bilen Russiýa Federasiýasynyň Federal Ýygnagynyň Federasiýa Geňeşiniň Başlygy Walentina Matwiýenkonyň arasynda telefon arkaly söhbetdeşlik geçirildi. Söhbetdeşligiň dowamynda Gahryman Arkadagymyz Russiýa Federasiýasynyň parlamentiniň ýokarky palatasynyň ýolbaşçysyny doglan güni bilen öz adyndan hem-de hormatly Prezidentimiziň adyndan tüýs ýürekden gutlap, berk jan saglyk, bagtyýarlyk, alyp barýan döwlet, syýasy we halkara işlerinde uly üstünlikleri arzuw etdi.

Hormatly Arkadagymyz türkmen we rus dillerini öwrenmek, medeni mirasy gorap saklamak, baýlaşdyrmak, Türkmenistanyň hem-de Russiýanyň halklarynyň medeniýetini, däp-dessurlaryny ösdürmek üçin iki ýurduň çäginde-de amatly şertleri döretmek babatda türkmen-rus gatnaşyklarynyň medeni-ynsanperwer gün tertibini mundan beýläk-de bilelikde ilerletmäge taýýardygyny tassyklady.

Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow Awstriýa Respublikasyna sapary amala aşyryp, 9-njy aprelde geçirilen Energetika we howa boýunça halkara Wena forumyna gatnaşdy. Milli Liderimiz forumyň açylyş dabarasynda eden çykyşynda ýurdumyz tarapyndan teklip edilýän, energetika ulgamyndaky hyzmatdaşlygy syýasylaşdyrmazlyga we durnuklylaşdyrmaga, mazmunly, uzak möhletleýin geljegi nazarlaýan dialoga geçmäge gönükdirilen birnäçe amaly çäreleri beýan etdi. Şu nukdaýnazardan, Türkmenistan tarapyndan öňe sürlen Ählumumy howpsuzlyk strategiýasyny işläp taýýarlamaga girişmek, Birleşen Milletler Guramasynyň howandarlygynda Energetika kodeksini işläp taýýarlamak, energetika ulgamynda ählumumy hyzmatdaşlygy täze ýörelgeler esasynda ýola goýmaga gönükdirilen, şol sanda energiýa serişdelerini öndürmek, üstaşyr geçirmek we sarp etmek meselelerini kadalaşdyrýan BMG-niň köpugurly halkara hukuk resminamasyny döretmek barada ýurdumyzyň teklibini iş ýüzünde durmuşa geçirmek boýunça tagallalary birleşdirmek teklip edildi.

Saparyň çäklerinde Gahryman Arkadagymyz birnäçe duşuşyklary geçirdi. Awstriýa Respublikasynyň Federal Prezidenti Aleksandr Wan der Bellen bilen duşuşygyň dowamynda Türkmenistanyň başlangyjy bilen döredilen we Awstriýanyň ilkinjileriň hatarynda goşulan Bitaraplygyň dostlary toparyna aýratyn üns çekildi. Söwda-ykdysady gatnaşyklaryň häzirki ýagdaýy baradaky pikir alyşmalaryň dowamynda türkmen halkynyň Milli Lideri haryt dolanyşygynyň möçberini artdyrmak üçin bar bolan mümkinçilikleri doly ulanmagyň zerurdygyny aýtdy. Bu ugurda Bilelikdäki türkmen-awstriýa toparynyň möhüm orny bellenilip, onuň nobatdaky mejlisini şu ýylyň iýunynda Aşgabatda geçirmek teklip edildi.

Türkmenistanyň Halk Maslahatynyň Başlygynyň Türkmen-awstriýa jemgyýetiniň ýolbaşçysy hanym Neda Berger bilen geçiren duşuşygynda ynsanperwer hyzmatdaşlygyň ägirt uly mümkinçiliklerini pugtalandyrmaga bolan ygrarlylyk tassyklanyldy.

Türkmen halkynyň Milli Lideriniň Birleşen Milletler Guramasynyň Baş sekretarynyň orunbasary hanym Rabab Fatima, BMG-niň Senagat ösüşi boýunça guramasynyň (UNIDO) Baş direktory Gerd Müller, Atom energiýasy boýunça halkara agentligiň Baş direktory Rafael Grossi bilen geçiren duşuşyklarynyň dowamynda hyzmatdaşlygy has-da ösdürmegiň geljegi we halkara gün tertibiniň möhüm meseleleri ara alnyp maslahatlaşyldy.

Milli Liderimiz ýurdumyzyň köpçülikleýin habar beriş serişdeleriniň wekilleri bilen söhbetdeşliginde gapma-garşylykly ýagdaýlaryň we dawalaryň diňe syýasy-diplomatik usullar arkaly çözülmeginde Bitarap döwlet hökmünde ýurdumyzyň eýeleýän üýtgewsiz ornuny beýan etdi.

10-njy aprelde hormatly Prezidentimiz Serdar Berdimuhamedowyň gatnaşmagynda Aşgabat — Türkmenabat ýokary tizlikli awtomobil ýolunyň Mary — Türkmenabat böleginiň açylyş dabarasy geçirildi. Uzynlygy 600 kilometre deň bolan Aşgabat — Türkmenabat ýokary tizlikli awtomobil ýolunyň gurluşygyna 2019-njy ýylda badalga berlipdi. Bu ýoluň birinji tapgyry bolan Aşgabat — Tejen bölegi 2021-nji ýylda, Tejen — Mary bölegi bolsa 2024-nji ýylda açylyp ulanmaga berildi. Aşgabat — Türkmenabat awtobanynyň gurulmagy ýurdumyzyň ählumumy ulag ulgamyna goşulyşmagy bilen bir hatarda, halkara ulag geçelgelerini işjeňleşdirmekde-de uly ähmiýete eýedir.

Hormatly Prezidentimiz ýoluň açylyş dabarasynda çykyş edip, täze ulag desgasynyň taryhy ähmiýetini nygtady. Irki döwürlerde yklymlary birleşdiren Beýik Ýüpek ýolunyň möhüm bölegi ýurdumyzyň üstünden geçipdir. Häzirki döwürde biz bu ýoly döwrebap görnüşde dikeltmek ugrunda ähli tagallalary edýäris. Döwrebap ýoluň gurluşygy Senagatçylar we telekeçiler birleşmesiniň agzalary tarapyndan ýerine ýetirildi. Halkara derejeli bu awtomobil ýoly 6 sany hereket zolagyndan ybaratdyr. Ol dünýä ölçegleriniň talaplaryna doly laýyk gelýär. Täze ýoluň geçýän ugrunda ýolagçylar, sürüjiler üçin ähli mümkinçilikler döredildi. Ýoluň hereket howpsuzlygyny üpjün etmek üçin halkara standartlara laýyk gelýän köp sanly köprüler, suw geçirijiler, ýörite geçelgeler, ýangyç guýujy beketler bina edildi.

Ýoluň gurluşygyna meşhur daşary ýurt kompaniýalary gatnaşdylar. Fransiýanyň «Grenobloise d’Elektronique et d’Automatismes» hem-de Hytaýyň «Shandong Jiangfeng New Material Technology Co., Ltd.» kompaniýalary täze awtomobil ýolunyň halkara standartlara we ýol howpsuzlygynyň ählumumy kabul edilen kadalaryna laýyk gelýändigi baradaky güwänamalary gowşurdylar.

10-njy aprelde hormatly Prezidentimiz Ministrler Kabinetiniň göçme mejlisini geçirdi. Onda ýurdumyzy, şol sanda Lebap welaýatyny durmuş-ykdysady taýdan ösdürmegiň wezipelerine seredildi, şeýle hem käbir meseleler ara alnyp maslahatlaşyldy.

Bellenilişi ýaly, hasabat döwründe welaýat boýunça senagat önümçiligi, geçen ýylyň degişli döwrüne garanyňda, 0,2 göterim artdy. Çörek we çörek önümleriniň öndürilişinde 0,8 göterim, unuň öndürilişinde 13,9 göterim, gök önümlerde 28,9 göterim, miwelerdir ir-iýmişlerde 8,8 göterim, süýt önümçiliginde 3,1 göterim, ýumurtganyň öndürilişinde 2,4 göterim, gaplanan miweleriň we gök önümleriň öndürilişinde 2,1 göterim ösüş gazanyldy. Welaýatyň çäginde ulagyň ähli görnüşleri boýunça ýük dolanyşygy 3,9 göterim artdy, ýolagçy dolanyşygy 0,6 göterim ýokarlandy. Sebitde bölek satuw haryt dolanyşygy, geçen ýylyň degişli döwri bilen deňeşdirilende, 11,3 göterim artdy. Şu ýylyň üç aýynda Lebap welaýatynyň ýerli býujetiniň girdeji böleginiň meýilnamasy 113,4 göterim, çykdajy böleginiň meýilnamasy 98,8 göterim ýerine ýetirildi.

Hasabat döwründe Oba milli maksatnamasynyň çäklerinde welaýatda durmuş maksatly binalardyr desgalaryň 20-siniň, suw we lagym arassalaýjy desgalaryň 7-siniň, ýaşaýyş jaýlarynyň 4,5 müň inedördül metriniň, inženerçilik ulgamlarynyň hem-de desgalarynyň gurluşyk işleri alnyp baryldy. Şu ýylyň birinji çärýeginde welaýatda ýerleşýän bank şahamçalary tarapyndan girdeji meýilnamasy 124 göterim ýerine ýetirildi.

Döwlet Baştutanymyz mejlisiň dowamynda Hyzmatdaşlyk boýunça türkmen-hytaý hökümetara komitetiniň hem-de onuň kiçi komitetleriniň türkmen böleginiň ýolbaşçylaryny bellemek hakynda Karara gol çekdi.

Geçen hepdede Türkmenistanyň Mejlisiniň ýedinji çagyrylyşynyň on ikinji maslahaty geçirildi. Onda Türkmenistanyň Konstitusiýasyna hem-de halkara hukugyň kadalaryna laýyklykda işlenip taýýarlanylan birnäçe kanunlaryň we kararlaryň taslamalary biragyzdan makullanyldy hem-de kabul edildi.

Şunlukda, geçen hepdäniň wakalary hormatly Prezidentimiz Serdar Berdimuhamedow tarapyndan amala aşyrylýan, parahatçylyk söýüjilik, ynsanperwerlik, açyklyk ýörelgelerine eýerýän Watanymyzyň ösüş depginini ýokarlandyrmaga, halkymyzyň bagtyýar durmuşynyň bähbidine täze ykdysady ösüşleri gazanmaga esaslanýan wezipeleriň üstünlikli durmuşa geçirilýändiginiň nobatdaky aýdyň güwäsi boldy.