Daşkentde geçirilýän Merkezi Aziýanyň Futbol assosiasiýasynyň (CAFA) 17 ýaşa çenli ýetginjekler ýygyndylarynyň arasynda geçirilýän çempionatynda türkmen futbolçylary iki duşuşygy deňme-deňlikde tamamladylar. Ýaryşyň ähli duşuşyklary bäş toparyň – Owganystanyň, Gyrgyzystanyň, Täjigistanyň, Türkmenistanyň we Özbegistanyň gatnaşmagynda «Dustlik» stadionynda geçirilýär.
Türkmenistanyň ýetginjekler ýygyndysy CAFA-nyň çempionatynda Türkmenistanyň milli ýygyndysynyň öňki meşhur futbolçysy Röwşen Muhadowyň ogly, baş tälimçi Azat Muhadowyň ýolbaşçylygynda çykyş edýär.
Birinji duşuşykda Täjigistanyň ýygyndysyndan 1:5 hasabynda asgyn gelenden soňra, türkmen futbolçylary Owganystanyň (0:0) we Özbegistanyň (3:3) toparlary bilen deň utuk paýlaşdylar.
Özbek futbolçylary bilen bolan bäsleşikde watandaşlarymyz üç gezek hasapda öňe saýlandylar. Ilkinji gol eýýäm duşuşygyň 5-nji minudynda girizildi. 36-njy minutda Doniýor Uktamow jerime meýdançasynyň içinden uran urgusy bilen hasaby deňledi – 1:1. Emma üç minutdan soň, Hudaýnazar Meredow derwezeban bilen ýeke-ýeke galyp, ýygyndymyzy hasapda öňe saýlady – 2:1. Toparlar arakesmä şu hasap bilen gitdiler.
Duşuşygyň 49-njy minudynda sag tarapdan jerime urgusy arkaly geçirilen pökgini Ýahýobek Nasrulloýew kellesi bilen derwezä gönükdirip, hasaby deňledi – 2:2. Duşuşygyň iň oňat oýunçysy diýlip ykrar edilen Hudaýnazar Meredow 58-nji minutda birnäçe goragçydan sypyp, 11 metrlik belligiň golaýynda duran Timur Gaýdarowa pökgini berdi, ol bolsa pökgini saklamazdan özbek ýygyndysynyň derwezesinden geçirdi – 3:2.
Özbegistanyň ýygyndysy 88-nji minutda Sanjarbek Aminowyň gaýtarylan pökgini derwezä salmagy netijesinde utulyşdan gutuldy.
Üç tapgyryň netijeleri boýunça ýaryş tertibinde 9 utuk bilen Täjigistanyň topary öňdeligi eýeleýär. Ondan soňra Özbegistanyň topary (7 utuk), Gyrgyzystanyň topary (3 utuk), Türkmenistanyň topary (2 utuk) we Owganystanyň topary (1 utuk) gelýär.
Türkmen futbolçylary jemleýji duşuşykda gyrgyzystanly deň-duşlary bilen güýç synanyşarlar. Bu duşuşykdaky ýeňiş toparymyza baýrakly üçünji orny eýelemäge mümkinçilik berer.
Geçen ýyl Daşkentde geçirilen hut şu CAFA-nyň çempionatynda Türkmenistanyň 17 ýaşa çenli ýetginjekler ýygyndysy baş tälimçi Ahmet Allaberdiýewiň ýolbaşçylygynda bürünç medal eýeläpdi. Şonda üçünji orun ugrundaky bäsleşikde Gyrgyzystanyň topary 11 metrlik jerime urgulary arkaly 7:6 hasabynda (esasy wagt – 0:0) utulypdy.
