Şenbe güni Aşgabatda «Dostluk ganatlary» atly köpçülikleýin ylgaw ýaryşy geçirilip, bu baýramçylyk we inklýuziw çäresine 650-den gowrak dürli ýaşdaky raýatlar gatnaşdy. Bu çäre Türkmenistandaky Ýewropa Bileleşiginiň wekiliýeti tarapyndan Türkmenistanyň Bedenterbiýe we sport baradaky döwlet komiteti hem-de Aşgabat şäher häkimligi bilen bilelikde, Türkmenistanyň Daşary işler ministrliginiň we «Run Rush» jemgyýetçilik hereketiniň goldawy bilen guraldy hem-de Ýewropa güni we Bütindünýä saglyk güni bilen baglanyşyklylykda geçirildi.
Geçen ýyl Halkara parahatçylyk we ynanyşmak ýyly mynasybetli geçirilen sport çäräniň üstünlikli tejribesine daýanmak bilen, 2026-njy ýylyň ylgawy täzelenen görnüşde bu däbi dowam etdirdi hem-de sport we jemgyýetçilik işjeňligi arkaly Ýewropa Bileleşigi bilen Türkmenistanyň arasyndaky hyzmatdaşlygy has-da berkitdi.
Ýewropa Bileleşiginiň gymmatlyklaryna we Ýewropa gününiň ruhuna esaslanyp, agzybirligi, inklýuziwligi we jebisligi öňe sürýän çäre sagdyn we işjeň durmuş ýörelgesini wagyz etmek maksady bilen türgenleri, höwesjeň ylgawçylary, ýaşlary, çagalary, maşgalalary we mümkinçiligi çäkli adamlary umumy şäher baýramçylygyna jemledi. Bu çäre oňyn jemgyýetçilik gatnaşyklaryny, özara hormaty we agzybirlik duýgusyny ösdürip, hyzmatdaşlygyň we abadançylygyň umumy gymmatlyklaryny beýan etdi.
«Ýewropa Bileleşigi üçin sport diňe bir fiziki işjeňlik däl. Ol gatnaşyklary berkitmek we umumy gymmatlyklary öňe sürmek üçin güýçli guraldyr. Ol toparlaýyn işi, tertip-düzgüni, hormaty we çydamlylygy ösdürýär, bular bolsa güýçli we inklýuziw jemgyýetler üçin zerur häsiýetlerdir. «Dostluk ganatlary» ýaly çäreler sportda dürli-dürli tejribeli adamlary birleşdirip, has sagdyn jemgyýetleri döretmäge ylham berip bilýändigini görkezýär» diýip, Türkmenistandaky Ýewropa Bileleşiginiň wekili belledi.
Ylgaw dürli ýaşdaky we taýýarlyk derejesindäki gatnaşyjylar üçin niýetlenen üç aralygy öz içine aldy we paýtagtymyzyň merkezindäki gözel we ýaşyl meýdançaly Garaşsyzlyk seýilgähiniň töwereginde geçirildi. Bu ýer gatnaşyjylar üçin amatly we gowy guralan ugry üpjün etdi.
2 kilometr aralyk ylgawa 16 ýaşa çenli çagaly maşgalalar, 5 kilometr aralyk ylgawa höwesjeňler, 10 kilometr aralyk ylgawa bolsa has taýýarlykly we tejribeli raýatlar gatnaşdy.
Çäre resmi açylyş dabarasy bilen başlanyp, soňra umumy maşklar we şahsy ýaryşlar bilen dowam etdi. Ýaryşlardan başga-da, gatnaşyjylar we myhmanlar dürli maşgala çärelerine gatnaşyp, ertiriň dowamynda şadyýan we baýramçylyk ruhuny saklap bildiler.
Ähli pellehana ýeten gatnaşyjylar ýadygärlik medallar bilen sylaglanyldy, her aralykdaky ýeňijilere bolsa hemaýatkärler tarapyndan taýýarlanan ýörite sowgatlar gowşuryldy.
