Balkan welaýatynyň Magtymguly etrap merkezindäki «Magtymguly Pyragy» muzeýinde «Garaşsyz, baky Bitarap Türkmenistan – bedew batly-at myradyň mekany» ýyly hem-de beýik Garaşsyzlygymyzyň şanly 35 ýyllyk baýramy mynasybetli ýurt derejesinde yglan edilen döredijilik bäsleşikleriniň ýeňijilerini sylaglamak dabarasy guraldy. Türkmenistanyň Magtymguly adyndaky Ýaşlar guramasynyň Merkezi geňeşi, Türkmenistanyň Senagatçylar we telekeçiler partiýasynyň Merkezi geňeşi, ýurdumyzyň gazet-žurnallarynyň redaksiýalary tarapyndan bilelikde guralan dabara ýokary guramaçylyk, işjeňlik ýagdaýynda geçdi.
Dabara gatnaşmak üçin ýurdumyzyň halypa ýazyjy-şahyrlaryndan, döredijilik bilen meşgullanýan ýaşlardan, döredijilik bäsleşikleriniň ýeňijilerinden, Magtymguly adyndaky Ýaşlar guramasynyň işjeň agzalaryndan hem-de köpçülikleýin habar beriş serişdeleriniň wekillerinden ybarat topar paýtagtymyzdaky Jemgyýetçilik guramalarynyň merkezinden Balkan welaýatyna döredijilik saparyna ugradylar. Olar ýolda edebiýat, döredijilik dünýäsi, halypa-şägirtlik gatnaşyklary, beýik döwrümiziň gymmatlyklary hakynda söhbetdeş boldular, özara pikir-tejribe alyşdylar.
Myhmanlar ir säher bilen Magtymguly etrap merkezinde duz-çörekli, mähirli garşylandy. Balkan welaýat häkimliginiň hem-de welaýat medeniýet müdirliginiň guramagynda «Magtymguly Pyragy» muzeýiniň öňünde belentden tutulan dabara hem myhmanlarda ýatdan çykmajak ýakymly täsirleri galdyrdy. Bu ýerde dabara gatnaşyjylar welaýatyň medeniýet we sungat işgärlerinden, talyp ýaşlaryndan düzülen aýdym-saz, tans, halk döredijilik toparlarynyň, şeýle-de Beýik Saparmyrat Türkmenbaşy adyndaky Balkan welaýat döwlet drama teatrynyň sahna ussatlarynyň şowhunly çykyşlaryna uly höwes bilen tomaşa etdiler.
Soňra olar Gündogaryň beýik akyldary, nusgawy şahyrymyz Magtymguly Pyragynyň muzeýiň öňündäki heýkeline ter gül desselerini goýup, meşhur söz ussadynyň ruhuna tagzym etdiler. Muzeýiň girelgesinde amaly-haşam sungatynyň we Berkarar döwletiň täze eýýamynyň Galkynyşy döwrüniň nusgalyk ösüşlerini aýdyň görkezýän sergiler ýaýbaňlandyryldy. Kalplary ylhamly ýaşlar «Magtymguly Pyragy» muzeýiniň bölümlerine-de aýlanyp, beýik akyldar şahyryň edebi mirasyna degişli muzeý gymmatlyklary, taryhy-medeni tapyndylar bilenem ýakyndan tanyş boldular.
Döredijilik bäsleşikleriniň ýeňijilerini sylaglamak dabarasynyň Magtymguly etrap merkezindäki «Magtymguly Pyragy» muzeýiniň mejlisler zalynda geçirilmegi hem aýratyn ähmiýete, egsilmez ruhy joşguna beslendi. Onda çykyş edenler nusgawy şahyrymyzyň eserlerinden ylham-joşgun alýan zehinli ýaşlary döredijilik eserleri, şeýle-de makalalar, oçerkler, fotoreportažlar, fotosuratlar, goşgular, hekaýalar, terjimeler, oýlanmalar, tapmaçalar boýunça döredijilik bäsleşiklerinde ýeňiji bolmaklary bilen gutladylar, olara döredijilik äleminde täze-täze rowaçlyklary arzuw etdiler. Dabaranyň dowamynda «Berkarar döwletiň ylham joşguny», «Ýaşlar – beýik geljegi gurujylar», «Garaşsyzlyk bilen galkynan gözel Diýar», «Watanymyzyň Garaşsyzlygy – ylham çeşmesi», «Köken», «Türkmen bedewi – at-myratly Watanyň göz-guwanjy» atly döredijilik bäsleşikleriniň ýeňijilerine Hormat hatlarydyr ýadygärlik sowgatlary dabaraly ýagdaýda gowşuryldy. Bäsleşikleriň dowamynda has tapawutlanan döredijilik eserleri üçin hem höweslendiriji baýraklar berildi.
Täsirli geçen dabaradan soň, biz Türkmenistanyň Magtymguly adyndaky Ýaşlar guramasynyň Balkan welaýat Geňeşiniň başlygynyň wezipesini ýerine ýetiriji Güýçmyrat Ýagşyýew bilen gürrüňdeş bolduk. Şonda ol:
– Hormatly Prezidentimiziň: «Berkarar döwletiň täze eýýamynyň Galkynyşy döwründe döredijilik işgärlerimiziň çekýän asylly zähmetine biz uly hormat goýýarys. Olaryň kämil, döwrebap eserleri döretmekleri, mynasyp durmuşda ýaşamaklary we döredijilikli işlemekleri üçin ähli şertleri döredýäris» – diýen adalatly, ýerlikli sözleri bizi geljekki üstünliklere ruhlandyrýar. Taryhy eýýamymyzda «Garaşsyz, baky Bitarap Türkmenistan – bedew batly at-myradyň mekany» ýylyny döredijilikli işlere, ýokary zähmet üstünliklerine beslemek bolsa bagtyýar ýaşlarymyzyň mukaddes borjy bolup durýar.
Zehinli, dörediji ýaşlary ýüze çykarmak, olary höweslendirip durmak maksady bilen geçiren döredijilik bäsleşiklerimiz ýerine-de düşdi. Çünki, döredijilik bäsleşiklerine hödürlenen dürli eserler zehinli ýaşlaryň täze nesliniň kemala gelýändiginiň, ýaşlaryň döredijilik başlangyçlarynyň, gözlegleriniň öňküden hem has kämilleşýändiginiň ýene-de bir mertebe aýdyň subutnamasyna öwrüldi – diýip, guwanç bilen gürrüň berdi.
Ýeňijileri sylaglamak dabarasyndan soň, Balkan welaýatyna amala aşyrylan döredijilik saparyna gatnaşan halypa ýazyjy-şahyrlar, ýaş döredijiler dana şahyrymyzyň dogduk mekanyna, Magtymguly etrabynyň Gerkez obasyna baryp gördüler. Beýik Pyragynyň heýkeliniň öňündäki meýdançada welaýatyň estrada aýdymçylarynyň, bagşy-sazandalarynyň, sahna ussatlarynyň ýerine ýetiren joşgunly çykyşlaram bimöçber şatlyk-şowhuna beslenip, alyslara ýaň saldy.
Bu ýerde guralan sergilerde görkezilen taryhy esbaplar, muzeý gymmatlyklary, şol sanda ýerli sungat ussatlarynyň eserleri-de çärä özboluşly öwüşgin berdi. Obadaky muzeý şahamçasyna bolan gezelenç, hususan-da, Magtymguly Pyragynyň dogany Zübeýda Hindistandan sowgat getiren çäýnegi hem-de Meňlä niýetlän ýüzügi gezelenje gatnaşanlarda uly gyzyklanma döretdi.
Baý mazmunly, dabaraly çäreleriň ahyrynda olara gatnaşyjylar döredijilik bäsleşiklerini döwlet derejesinde yzygiderli geçirmekde döredip berýän döwrebap şertleridir mümkinçilikleri üçin türkmen halkynyň Milli Lideri Gahryman Arkadagymyza hem-de hormatly Prezidentimiz Arkadagly Gahryman Serdarymyza egsilmez alkyş, hoşallyk sözlerini beýan etdiler.
