2026-njy ýylyň 12-nji maýynda Türkmenistanyň Kärdeşler arkalaşyklarynyň Milli merkeziniň başlygy O.Berdiliýewa bilen Azerbaýjanyň Kärdeşler Arkalaşyklary Konfederasiýasynyň başlygy S.Mamedowyň arasynda duşuşyk geçirildi. Bu barada Türkmenistanyň DIM-niň web-saýtynda habar berilýär.
Duşuşygyň dowamynda taraplar iki ýurduň kärdeşler arkalaşyklarynyň işi barada pikir alyşdylar, zähmet hukuklaryny goramak we kärdeşler arkalaşyklarynyň agzalarynyň durmuş taýdan goraglylygy bilen baglanyşykly meseleleri ara alyp maslahatlaşdylar, şeýle hem Türkmenistan bilen Azerbaýjanyň kärdeşler arkalaşyklarynyň arasyndaky gatnaşyklary mundan beýläk-de pugtalandyrmaga gyzyklanma bildirdiler.
Duşuşygyň netijeleri boýunça Türkmenistanyň Kärdeşler arkalaşyklarynyň Milli merkezi bilen Azerbaýjanyň Kärdeşler Arkalaşyklary Konfederasiýasynyň arasynda Hyzmatdaşlyk hakynda Ähtnama gol çekildi.
2026-njy ýylyň 13-nji maýynda saparyň çäklerinde “Howanyň üýtgemegi meseleleri boýunça kärdeşler arkalaşyklarynyň işi” atly maslahat geçirildi.
Çärä kärdeşler arkalaşyklarynyň guramalarynyň, döwlet düzümleriniň, halkara guramalarynyň wekilleri, şeýle hem ekologiýa we durmuş ulgamy boýunça bilermenler gatnaşdylar.
Maksatnamanyň çäklerinde kärdeşler arkalaşyklarynyň howa syýasatyny kemala getirmekdäki orny, durnukly ykdysadyýete adalatly geçişi üpjün etmek, işgärleriň zähmet hukuklaryny goramak we durmuş dialogyny ösdürmek meseleleri ara alnyp maslahatlaşyldy. Gatnaşyjylar howanyň üýtgemegi şertlerinde «ýaşyl» iş orunlaryny döretmek, işgärleri gaýtadan taýýarlamak we durmuş taýdan goragy güýçlendirmek meselelerine aýratyn üns berdiler.
