Gözel paýtagtymyz Aşgabadyň durnukly, «akylly» we ählumumy ulgama doly integrirlenen uly şäher hökmündäki uzak möhletleýin ösüş strategiýasy 2026-njy ýylyň 24 – 25-nji maýynda geçiriljek «Ak şäherim Aşgabat» (WCA 2026) atly XXV köpugurly halkara sergisiniň we maslahatynyň baş ugry bolar.
Hasaba alyş maglumatlaryna görä, bu iri halkara çäresine dünýäniň 55 döwletinden 650-den gowrak resmi wekil we hünärmenler gatnaşar. Bu görkeziji maslahatyň hem döwlet hem-de hususyýetçilik ulgamynda dünýä jemgyýetçiliginiň uly gyzyklanmasyna eýe bolandygyny tassyklaýar. Şeýle-de forumyň sergi we maslahat meýilnamasyna şähergurluşyk, düzüm taslamalary, energetika, innowasion gurluşyk tehnologiýalary hem-de maýa goýum hyzmatdaşlygy ulgamynda ýöriteleşen 100-den gowrak daşary ýurtly öňdebaryjy kompaniýalaryň wekilleri gatnaşar.
«Durnukly, «akylly» we dünýä bilen baglanyşykly paýtagty kemala getirmek» atly strategik plenar mejlisi ýokary wezipeli hökümet wekillerini, halkara guramalaryň hem-de maliýe institutlarynyň wekillerini, maýadarlary, gurluşykçylary, binagärleri, inženerleri we pudak hünärmenlerini bir meýdança jemläp, Aşgabadyň geljekki özgerişlerini we strategik ösüş ýoluny ara alyp maslahatlaşmaga şert döreder. Bu mejlisde häzirki zaman dünýäsinde şäherleriň eýeleýän orny, hususan-da, bitewi düzüm ulgamlary, energiýa tygşytlylygy, sanly transformasiýa, durnukly ulag-logistika infrastrukturalary we şäher ilatynyň ýaşaýyş-durmuş şertleriniň hilini has-da ýokarlandyrmak ýaly milli strategiýalaryň özenini düzýän meseleler seljeriler. Bu şertlerde Aşgabadyň ösüş konsepsiýasy geljegiň şähergurluşyk modellerine degişli halkara çekişmeleriň durnukly bölegi hökmünde öňe sürülýär.
Maslahatyň dowamynda esasy üns şäher meýilleşdirilişiniň, inženerçilik we durmuş düzümleriniň, senagat kuwwatlyklarynyň, energetika ulgamlarynyň hem-de ekologiýa durnuklylygynyň bitewi we utgaşykly gurallaryny kemala getirmäge gönükdiriler. Şunda konseptual meýilleşdiriş döwründen maýa goýum taýdan netijeli hem-de amala aşyrylmagy oňaýly bolan anyk taslamalary durmuşa geçirmegiň guralyna ynamly gadam basylmagyna aýratyn ähmiýet berler.
«Aşgabat 2045» uzak möhletleýin maksatnamasynyň esasynda paýtagtymyzyň kämil inženerçilik ulgamlary, sanly dolandyryş gurallary we ýokary hilli jemgyýetçilik hyzmatlary bilen üpjün edilen döwrebap dolandyryş, ykdysady hem-de medeni merkeze öwrülmek prosesini has-da çaltlandyrmak göz öňünde tutulýar. Ulag we aragatnaşyk elýeterliligi, inženerçilik-tehniki düzümler, döwrebap ýaşaýyş jaý gurluşygy, sanly platformalar we şäher hojalygyny durnukly dolandyrmak ulgamlary ösüşiň ileri tutulýan ugurlary bolar.
Plenar mejlisi, şonuň bilen bir wagtda, Aşgabadyň sebitde maýa goýum, innowasiýa we halkara hyzmatdaşlyk platformasy hökmündäki ornuny has-da berkidip, dünýäniň iri kompaniýalarynyň, maliýe guramalarynyň, inženerçilik we tehnologiýa kärhanalarynyň arasynda göni gatnaşyklary ýola goýmaga ýardam eder. Bu gurallaryň netijesinde bitewi düzüm taslamalarynyň we uzak möhletleýin şähergurluşyk maksatnamalarynyň amala aşyrylmagy üpjün ediler.
Gatnaşyjylaryň ünsi nazary taslamalardan amaly wezipelere – ýagny integrirlenen ulgamlary döretmäge, energiýa tygşytlaýjy gurluşyk çözgütlerini ornaşdyrmaga, sanly şäher platformalaryny we ekologik taýdan arassa gurşawy kemala getirmäge çekiler. Şeýle hem ara alyp maslahatlaşmalar şäher dolandyryşynyň global meýillerini şöhlelendirer; bu bolsa häzirki döwürde netijeli ösüşiň döwlet edaralarynyň, hususy pudagyň we halkara hyzmatdaşlaryň utgaşykly hereketine gönüden-göni baglydygyny görkezýär.
«Ak şäherim Aşgabat» (WCA 2026) atly XXV köpugurly halkara sergisi we maslahaty köp taraply hyzmatdaşlygy we anyk taslamalara gönükdirilen gepleşikleri goldap, şähergurluşyk ulgamynda tejribe alyşmaga hem-de maýa goýum işjeňligini artdyrmaga hyzmat edýän möhüm meýdança hökmünde çykyş edýär.
Ýewropa Bileleşiginiň Türkmenistandaky Adatdan daşary we Doly ygtyýarly ilçisi Beata Peksa:
– Ýewropa Bileleşigi üçin durnukly şäher ösüşi we «ýaşyl» ykdysadyýet meseleleri elmydama ileri tutulýan ugurlaryň hatarynda durýar. Biz Aşgabady özüniň milli binagärlik aýratynlygyny we gaýtalanmajak keşbini saklamak bilen bir hatarda, döwrebap innowasiýalary şäher gurşawyna üstünlikli utgaşdyrmagyň aýdyň nusgasy hökmünde görýäris. «Ak şäherim Aşgabat» ýaly halkara forumlar döwletleriň arasyndaky özara düşünişmegi has-da berkidip, täze hyzmatdaşlyklaryň ýola goýulmagy üçin bereketli ýerlik döredýär we ahyrsoňy ähli taraplaryň rowaçlygyna hem-de ösüşine hyzmat edýär.
Birleşen Milletler Guramasynyň Ilatly ýerler boýunça maksatnamasynyň (UN-Habitat) Gündogar Ýewropa we Merkezi Aziýa boýunça sebit edarasynyň direktory Irfan Ali:
– Utgaşykly şäher meýilleşdirilişi, sanly transformasiýa we durnukly düzümler dünýä derejesinde integrirlenen çydamly şäherleriň geljegini kesgitleýär. Hakyky ösüş diňe strategiýa, maýa goýum we anyk mehanizmler bir bitewi ulgama birigen wagtynda – ýagny, uzak möhletleýin şähergurluşyk maksatnamalary durmuşa geçirip boljak anyk taslamalara öwrülen pursadynda mümkindir.
«Ak şäherim Aşgabat» (WCA 2026) atly XXV köpugurly halkara maslahaty «Aşgabat 2045» ösüş strategiýasyny öz meýilnamasynyň özenine öwürmek bilen, geljegiň durnukly, bäsdeşlige ukyply we her dürli şertlere çydamly şäherlerini döretmekde uzak möhletleýin meýilleşdirişiň, integrirlenen düzümleriň hem-de halkara hyzmatdaşlygyň nähili uly ähmiýete eýedigini ýene bir baradaky aýdyň subutnamasydyr.
Has giňişleýin maglumat üçin resmi web-saýta ýüz tutup bilersiňiz: «Ak şäherim Aşgabat 2026 ».
