«Binagärlik. Innowasiýa. Durnukly ösüş» şygary astynda geçirilen «Ak şäherim Aşgabat» atly XXV köpugurly halkara serginiň we maslahatyň çäklerinde paýtagtymyzyň giňişlik we durmuş taýdan ösüşiniň esasy ugurlary bilen Aşgabat şäheriniň häkimi Rahym Gandymow tanyşdyrdy.

Aşgabat şäheriniň häkimi öz çykyşynda soňky ýyllarda amala aşyrylan giň gerimli infrastruktura özgertmeleriniň jemini jemläp, Türkmenistanyň paýtagtyny dolandyrmagyň we ösdürmegiň häzirki zaman nusgasynyň esaslanýan strategik ýörelgeleri barada giňişleýin gürrüň berdi.

Häkimiň bellemegine görä, soňky döwürde Aşgabat düýpli özgerişleri başdan geçirdi. Täze ýaşaýyş toplumlarynyň gurulmagy, giň şaýollaryň çekilmegi, döwrebap durmuş-medeni maksatly desgalaryň, seýilgähleriň açylmagy, ulag ulgamlarynyň we inženerçilik kommunikasiýalarynyň döwrebaplaşdyrylmagy türkmen paýtagtynyň düýbünden täze keşbini emele getirdi.

Şeýle-de bolsa, R.Gandymowyň sözlerine görä, Aşgabadyň ösüşi diňe binagärlik taýdan täzelenmek bilen çäklenmeýär.

«Bu ilkinji nobatda innowasiýalara açyk, öňdebaryjy halkara tejribäni netijeli özleşdirýän we uzak möhletleýin durnukly ösüş ýörelgelerine esaslanýan, adama gönükdirilen şäher gurşawyny döretmekdir» diýip, Aşgabat şäher häkimliginiň ýolbaşçysy nygtady.

Hasabatda Aşgabadyň häzirki we geljekki ösüş ugruny kesgitleýän dört esasy ileri tutulýan ugur anyk görkezildi.

Birinjisi – ygtybarly infrastruktura. Döwrebap we durnukly şäher ýokary hilli ýollaryň, inženerçilik ulgamlarynyň, bökdençsiz energiýa üpjünçiliginiň, sanly torlaryň hem-de ilat üçin jemgyýetçilik hyzmatlarynyň ähli görnüşleriniň elýeterliliginiň öňe saýlanyp ösdürilmegini talap edýär.

Ikinjisi – ekologiýa taýdan durnuklylyk. Paýtagtymyzy yzygiderli şäher-baga öwürmek esasy ileri tutulýan ugurlaryň biridir. Bu strategiýa tebigy serişdelerden netijeli peýdalanmagy, energiýa tygşytlaýjy tehnologiýalary giňden ornaşdyrmagy we şäheri uzak möhletleýin esasda dogry meýilleşdirmegi öz içine alýar.

Üçünjisi – sanlylaşdyrmak we «akylly» şäher konsepsiýasy. Aşgabadyň häzirki zaman şäher dolandyryş ulgamy maglumat tehnologiýalaryna, innowasion ulgamlara we sanly hyzmatlaryň netijeliligini ýokarlandyrmaga işjeň esaslanýar.

Dördünjisi bolsa inklýuziwlik we durmuş taýdan ugurlylykdyr. Şähergurluşyk ulgamyndaky ähli ädimler ýaşaýjylaryň bähbitlerine hyzmat edip, maşgalalaryň ýaşaýşy, çagalaryň terbiýesi, ýaşlaryň özüni ösdürmegi we geljekki nesilleriň abadançylygy üçin iň amatly hem-de oňaýly şertleri döretmelidir.

Çykyşynyň ahyrynda Aşgabat şäheriniň häkimi dünýä şäherler jemgyýetçiligine goşulyşmagyň möhümdigine aýratyn üns çekdi. Belleýşi ýaly, häzirki zaman megapolisiň ösüşi tejribe alyşmak, halkara gatnaşyklary giňeltmek we dünýäniň öňdebaryjy ösüş institutlary bilen netijeli hyzmatdaşlygy ýola goýmak bilen aýrylmaz baglanyşyklydyr.