«Maksada okgunly» hususy kärhanasy Türkmenistanyň bazarynda berhiz hindi etiniň öňdebaryjy üpjün edijileriniň biridir. Ahal welaýatynyň Gökdepe etrabynda ýerleşýän döwrebap, doly awtomatlaşdyrylan önümçilik toplumy ýokary hil derejesine laýyk gelýän we «Halal» şahadatnamasy bilen tassyklanan täze, ekologiýa taýdan arassa önümleri öndürmäge mümkinçilik berýär.
Türkmenistanyň Senagatçylar we telekeçiler birleşmesiniň agzasy bolan kärhana importyň ornuny tutmak maksatnamasynyň çäklerinde içerki bazaryň islegini üstünlikli üpjün edýär, şeýle hem eksport mümkinçiligini yzygiderli giňeldýär.
Kärhananyň esasy buýsanjy – islendik sarp edijiniň islegini kanagatlandyrmaga ukyply örän giň önüm görnüşidir. Doňdurylan önümlerden (döş eti, but we beýleki bölekler), şeýle hem şöhlat, çişlik, basdyrma we kakadylan çipsler ýaly ulanmaga taýýar önümlerden başga-da, «Maksada okgunly» kompaniýasy emeli goşundylarsyz öz şiresindäki tagamly konserwleri öndürýär. Kärhananyň ýarym taýýar önümleri hem bazarda uly islegden peýdalanýar: doňdurylan manty, börek, hinkali, kotlet, naggets, şeýle hem hindi etli taýýar arpa ýarmasy.
Kompaniýanyň önümlerine bolan isleg onuň ýokary peýdalylygy bilen hem baglydyr. Hindi eti deňagramly ýokumly aýratynlyklary bilen tanalýar. Ortaça alnanda, bu etiň 100 gramynda takmynan 190 kilokaloriýa bolýar, towuk etinde bolsa bu görkeziji 240 kilokaloriýa deňdir. Şol bir wagtyň özünde hindi etindäki ýagyň mukdary takmynan iki esse az bolup, gymmatly belogyň derejesi 100 gram önümde 28,6 gram bolýar.
Guş eti magniý, selen, sink we demir ýaly peýdaly maddalara baý bolup, ganazlygyň döremek howpuny azaltmaga kömek edýär. Mundan başga-da, onuň düzüminde çalşyp bolmaýan aminokislota bolan lizin bar, ol myşsa agramyny saklamaga, holesteriniň derejesini kadalaşdyrmaga we ýürek-damar ulgamyny berkitmäge gatnaşýar.
Önümçiligiň doly awtomatlaşdyrylmagy, öňdebaryjy tehnologiýalaryň ornaşdyrylmagy we öz serişdelerine daýanmagy netijesinde «Maksada okgunly» kompaniýasy Türkmenistanyň içerki bazarynda amatly we durnukly bahalary saklap, bu ýokary hilli we peýdaly önümi her bir alyjy üçin elýeterli edýär.
