Ýurdumyzda halkymyzyň azyk bolçulygy ugrundaky möhüm ähmiýetli işlere Mary welaýatynyň hususy ulgamynda işjanly telekeçiler uly goşant goşýarlar. Türkmenistanyň Senagatçylar we telekeçiler birleşmesiniň agzasy «Täze aý» haryt nyşanly konditer önümlerini öndürýän hususy kärhanasynyň köke we süýji bölüminde täze önümçilik hatarlary işe girizildi.

Täze iki sany önümçilik hatarynyň işe girizilmegi bilen köke bölüminde önümçilik hatarynyň sany indi dokuza ýetdi. Bu bölümde ornaşdyrylan kuwwatly enjamlar Türkiýeden we Eýran Yslam Respublikasyndan getirilen. Bu bölümde indi 150-den gowrak görnüşli köke önümleriniň bir gije-gündizde 130 tonnasyny öndürmäge mümkinçilik döredi. Bu ýerde göze gelüwli gaplara gaplanyp döwrebap atlandyrylýan köke önümleri ýokary hilliligi bilen alyjylaryň ösen isleglerini kanagatlandyrýar.

Hususy kärhananyň süýji we şokolad bölüminde daşary döwletlerden getirilip, ornaşdyrylan enjamlaryň täze hatarlarynyň önümçilige girizilmegi bilen bu ýerde süýji önümleriniň öndürilişi hem ýokarlandy. Bu ýerde süýjileriň jemi 100 görnüşi öndürilýär. Içi huruşly we huruşsyz, daşy sokolad örtükli we örtüksiz, karamelli, maňyzly, kokosly süýjiler alyjylaryň isleglerine laýyklykda öndürilýär. Bu bölümde täze «Edermen» atly dürli miwe tagamly şokoladyň alty görnüşi öndürilip başlandy. Ýokary önümçilik kuwwatyna eýe bolan bu bölümde, häzirki wagtda bir gije-gündizde 30 tonnadan gowrak süýji öndürilýär. Önümçiligiň giňeldilmegi bilen bu ýerde ýene täze 60-dan gowrak iş orny döredildi.

Mukaddes Garaşsyzlygymyzyň 35 ýyllygyny sowgatly garşylamagy maksat edinýän bu hususy kärhanada baýramçylygyň öň ýanynda ýene täze iki sany süýji öndüriji önümçilik hataryny işe girizip, täze önümleri bilen halkymyzyň baýramçylyk saçaklaryny bezäp ildeşlerimizi begendirmegi meýilleşdirýärler. Bu ugurda taýýarlyk işlerine häzirki günlerden girişdiler.

Ýurdumyzda giňden tanalýan «Täze aý» haryt nyşanly konditer önümlerini öndürýän hususy kärhanasynda öndürilýän süýji-köke önümleri hiliniň ýokarylygy bilen ýurdumyzda geçirilýän sergilere gatnaşyp, birnäçe diplomlara mynasyp boldy. Bu önümler diňe bir ýurdumyzda bolman, daşary bazarlarda-da islegli harytlaryň biridigini bellemek gerek. Muny bolsa bu kärhananyň häzirki wagtda dünýäniň 20 döwletine öz önümlerini eksport etmegi hem doly subut edýär. Bu bolsa hormatly Prezidentimiziň ýurdumyzda öndürilýän önümleriň eksport mümkinçiligini artdyrmak baradaky aladalarynyň aýdyň miwesidir.