Şu günler Hazar deňziniň kenaryndaky dynç alyş we sagaldyş merkezlerinde dynç alýan bagtyýar çagalar wagtlaryny diýseň şadyýan geçirýärler. Bu ýerde çagalaryň göwnejaý dynç almaklary üçin netijeli çäreler durmuşa geçirilip, gyzykly çärelerdir dabaralar egsilmez joşguna, aýratyn ähmiýete beslenýär.
«Türkmennebit» döwlet konserniniň «Nebitgazburawlaýyş» trestiniň Balkanabat şäheriniň Hazar şäherçesiniň golaýynda, Hazaryň deňiz kenaryndaky «Gara altyn» çagalar sagaldyş we dynç alyş merkezinde hem ýurdumyzyň nebit-gaz toplumynyň düzümine girýän edaralardyr kärhanalarda zähmet çekýän işgärleriň, işçilerdir hünärmenleriň çagalary wagtlaryny hoş geçirýärler. Deňziň şypaly kenaryna özboluşly görk berip oturan bu merkezde «Garaşsyz, baky Bitarap Türkmenistan – bedew batly at-myradyň mekany» ýylynyň tomusky dynç alyş möwsüminiň her tapgyrynda hem çagalaryň 400-si dynç alyp, saglyklaryny berkidýärler. Bu ýerde geçirilýän medeni-sport çäreler körpeleriň durmuşyny ýakymly pursatlara, ýatdan çykmajak özboluşly wakalara besleýär..
Täsirli, şowhunly dabaralaryň dowamynda körpelerden düzülen döredijilik toparlaryň şowly çykyşlary Hazaryň kenaryna özboluşly owaz bolup dolýar. Bulardan başga-da, çagalar hereket edýän okuw gurnaklaryna höwesli gatnaşýarlar. Şeýle-de dürli çärelerde goşgulary labyzly okamak, aýdym aýtmak, saz çalmak, tans etmek, sahnalarda çeper keşpleri janlandyrmak boýunça özara bäsleşýärler. Şeýlelikde, ruhubelent çagalar özleri üçin döredilen ýakymly mümkinçilikleriň hözirini görüp, ençeme hezillikleri başdan geçirýärler.
Döwrebap merkezde ösen enjamlar ornaşdyrylan gulluk, hojalyk, aşhana, okalga, dynç alyş we kompýuter otaglary, türgenleşik zalydyr sport meýdançalary bar. Şeýle-de aýdym-sazly dabaralary, medeni-köpçülikleýin çäreleri geçirmek üçin hemmetaraplaýyn amatlyklary özünde jemleýän merkezler göwnüňi göterýär. «Garaşsyz, baky Bitarap Türkmenistan – bedew batly at-myradyň mekany» ýylyna bagyşlanan çärelerde bolsa çagalaryň ýerine ýetirýän gyzykly çykyşlary olara gatnaşyjylar tarapyndan şowhunly, dowamly el çarpyşmalar bilen alkyşlanylýar.
Häzirki wagtda bu ýeri ir säherden giç agşama çenli-de bagtyýar körpeleriň şadyýan gülki sesleri, şatlyk-şowhuny gurşap alýar. Unudylmajak pursatlardan, geň-enaýy täsinliklerden ybarat gyzykly gezelençler çagalarda bimöçber täsirleri galdyrýar.
– Bagtyýar çagalaryň döwrebap okamaklary, dynç almaklary, sagdyn, ruhubelent ösüp-ulalmaklary, şeýle-de ählitaraplaýyn sazlaşykly ösmekleri üçin döwletimiz tarapyndan döredilýän nusgalyk şertler diňe ýaş nesliň däl-de, ähli ene-atalaryň, raýatlaryň kalbynda guwanç, buýsanç duýgularyny goşalandyrýar. Muňa bolsa biz taryhy eýýamymyzda bagtyýar çagalygyň arzyly mekanyna öwrülen «Gara altyn» çagalar sagaldyş we dynç alyş merkeziniň mysalynda hem göz ýetirýäris
Biz «Garaşsyz, baky Bitarap Türkmenistan – bedew batly at-myradyň mekany» ýylynyň tomusky möwsüminde merkezde ýerli jemgyýetçilik guramalary, bilim, medeniýet, saglygy goraýyş, sport edaralary bilen bilelikde mazmunly çäreleri, wagyz-ündew işlerini yzygiderli geçirip durýarys. Olaryň dowamynda bagtyýar körpeler özlerine döredip berlen ajaýyp mümkinçilikler üçin Gahryman Arkadagymyza we Arkadagly Gahryman Serdarymyza egsilmez alkyş, hoşallyk sözlerini aýdýarlar –diýip, «Türkmennebit» döwlet konserniniň Kärdeşler arkalaşygynyň komitetiniň başlygy Akmyrat Amanow biziň bilen gürrüňdeş bolanda aýtdy.
