Ajaýyp dabaralara, şanly wakalara beslenýän «Garaşsyz, baky Bitarap Türkmenistan – bedew batly at-myradyň mekany» ýylynda Türkmenistanyň Saglygy goraýyş we derman senagaty ministrliginiň sebitlerdäki düzümlerinde işler guramaçylykly amala aşyrylýar. Balkan welaýatynyň merkezi Balkanabat şäheriniň Jebel şäherçesindäki Bejeriş palçyklaryny we deňiz duzuny gaplaýan kärhanasynda bitirilýän saldamly işler hem oňa aýdyň şaýatlyk edýär.
Agzybir kärhananyň hünärmenleri melhem palçyklaryny, deňiz duzuny öndürmekde has-da tutanýerli zähmet çekýärler. Bu ýerde her ýylda terapewtiki we kosmetiki önümleriň 400 müň, Mollagara palçygynyň jemi 200 müň, wulkan palçygynyň we deňiz duzunyň hersinden 100 müň gabyny öndürmäge mümkinçilik bar. Üç sany esasy bölümden – bejeriş palçyklaryny, deňiz duzuny gaplaýan hem-de hil barlag bölümlerinden ybarat kärhanada işler sazlaşykly guralyp, kompýuterleriň üsti bilen özara arabaglanyşykda işleýärler. Şeýle-de kärhanada Italiýa, Türkiýe, Ýaponiýa, Belgiýa, Fransiýa ýaly döwletleriň dürli görnüşdäki kämil, kuwwatly enjamlary işledilýär.
Durmuş tejribesiniň görkezişi ýaly, güneşli ýurdumyzyň tebigaty bejeriş-sagaldyş ähmiýetli dürli tebigy serişdelere baýdyr. Şolaryň arasynda dürli palçyklar, deňiz duzlary derwaýys orun tutýar. Palçyklar bolsa iki sany topara gyrmança we wulkan palçyklaryna bölünýär. Gyrmança palçyklary boýunça Mollagara köli diňe bir biziň ýurdumyzda däl-de, eýsem, bütin dünýäde hem meşhurdyr. Soňky ýyllarda Mollagara palçygynyň kosmetologiki häsiýetleri öwrenilip, onuň deri üçin ýaramly täsirleriniň bardygy anyklanyldy. Ol deride öýjük täzeleýji, gurplandyryjy, der asty gan aýlanyşygyny kadalaşdyryjy we näziklik beriji häsiýetleri ýüze çykarýar.
Welaýatyň Esenguly etrabynyň çäginde ýerleşýän täsin wulkanlaryň palçyklarynyň kesel bejeriş häsiýetleri hem ýokarydyr. Wulkan palçyklarynyň düzüminde köp sanly gymmatly mikroelementler bolup, olar kosmetologiýada, şeýle-de lukmançylykda deri, ýürek-damar, içege, önelgesizlik kesellerini bejermekde giňden ulanylýar.
Kärhananyň bejeriş palçyklary bölüminde tebigy çeşmelerden getirilen palçyk ýöriteleşdirilen elegiň kömegi bilen daş, çäge böleklerinden, beýleki garyndylardan arassalanýar. Soňra ol ýörite sorujylar arkaly arassalanan suwlar bilen gerekli derejede garylyp, guýujy ulgama geçirilýär. Onuň önümçilik kuwwaty-da her sagatda 600 gap taýýar önüme deňdir.
Deňiz duzuny gaplaýan bölümde-de ol ilkinji tapgyrda kesgitlenen ölçege çenli owradylýar. Şundan soňra ýöriteleşdirilen elekde magnitleriň kömegi bilen daş, metal we beýleki garyndylardan arassalanýar. Şol arassalanan duzuň belli bir bölegi ýörite basyşyň kömegi bilen gerdejik görnüşine geçirilýär. Şonuň ýaly-da derman otlary goşulmak bilen bejeriş häsiýetleri berilýär. Şeýlelikde, bölümiň önümçilik kuwwaty sagatda 3 müň 600 gram taýýar önüme barabardyr.
– Mukaddes Garaşsyzlygymyzyň şanly 35 ýyllyk baýramynyň uludan toýlanylýan «Garaşsyz, baky Bitarap Türkmenistan – bedew batly at-myradyň mekany» ýylynyň geçen hasabat döwründe melhem palçyklaryň, deňiz duzunyň ýüzlerçe gaplaryny sarp edijilere ýetirdik. Has takygy, «Türkmenistanda öndürildi» diýen ýazgyly taýýarlanýan melhemler bilen ýurdumyzyň çar künjegindäki şypahanalary, saglygy goraýyş, dikeldiş-bejeriş merkezlerini, hassahanalary, Saglyk öýlerini, dermanhanalary hemişe üpjün edip durýarys.
Biz derde dermanlyk melhemleriň öndürilýän möçberlerini hem-de görnüşlerini artdyrmak ugrunda mundan beýläk hem tagallalarymyzy gaýgyrmarys. Işlemek, döretmek, önüm öndürmek babatda döredip berlen döwrebap şertlerdir mümkinçilikler üçin türkmen halkynyň Milli Lideri Gahryman Arkadagymyza hem-de hormatly Prezidentimiz Arkadagly Gahryman Serdarymyza bimöçber alkyşlarymyzy aýdýarys. Şeýle-de janlarynyň sag, ömürleriniň uzak bolup, il-ýurt, umumadamzat bähbitlerine gönükdirilen tutumly işleriniň hemişe rowaç bolmagyny arzuw edýäris – diýip, kärhananyň ýolbaşçysy Döwletmyrat Orazmyradow gürrüňdeş bolanymyzda aýtdy.
