2026-njy ýylyň 28-nji awgustynda Türkmenistanyň Özbegistan Respublikasyndaky Ilçihanasynda 2026-njy ýylyň 23-nji sentýabrynda geçirilmegi meýilleşdirilýän Türkmenistanyň Halk Maslahatynyň nobatdaky mejlisiniň jemgyýetçilik-syýasy ähmiýetine, şeýle hem Türkmenistanyň başlangyjy boýunça Birleşen Milletler Guramasynyň Baş Assambleýasy tarapyndan kabul edilen «2028-nji ýyl - Halkara hukugyň ýyly» atly Kararnama bagyşlanan maslahat geçirildi. Bu barada Türkmenistanyň DIM-niň web-saýtynda habar berilýär.
Çärä Özbegistan Respublikasynyň Oliý Mejlisiniň Kanunçylyk palatasynyň deputaty, Respublikan Türkmen medeni merkeziniň başlygy G.Awezdurdyýewa, türkmen diasporasynyň wekilleri, şeýle hem Özbegistanda zähmet çekýän, bilim alýan watandaşlarymyz we Türkmenistanyň Özbegistan Respublikasyndaky Ilçihanasynyň işgärleri gatnaşdylar.
Çykyşlarda Türkmenistanyň Halk Maslahatynyň ýurduň jemgyýetçilik-syýasy durmuşyndaky, halkyň jebisligini berkitmekdäki, umumydöwlet ähmiýetli meseleleri ara alyp maslahatlaşmakdaky hem-de milli ösüşiň strategik ileri tutulýan ugurlaryny kesgitlemekdäki möhüm orny nygtaldy.
Türkmenistanyň Garaşsyzlygynyň 35 ýyllyk baýramynyň öňüsyrasynda geçiriljek Halk Maslahatynyň nobatdaky mejlisine aýratyn üns berildi. Bu umumymilli forumyň Garaşsyzlyk ýyllarynda gazanylan üstünliklere ser salmak, döwletiň mundan beýläk-de durmuş-ykdysady taýdan ösdürilmeginiň esasy ugurlaryny ara alyp maslahatlaşmak, şeýle hem özygtyýarlylygy pugtalandyrmaga, halkyň abadançylygyny ýokarlandyrmaga we ýurduň durnukly hem-de okgunly ösüşini üpjün etmäge gönükdirilen uzak möhletleýin wezipeleri kesgitlemek üçin möhüm forumdygy bellenildi.
Maslahatda çykyş edenler Türkmenistanyň Prezidenti Serdar Berdimuhamedowyň 2028-nji ýyly Halkara hukugyň halkara ýyly diýip yglan etmek baradaky halkara başlangyjy barada aýratyn durup geçdiler. BMG-niň Baş Assambleýasy tarapyndan kabul edilen we 78 döwletiň awtordaş bolup çykyş eden degişli Kararnamasynyň Türkmenistanyň halkara kanunylygy berkitmäge, döwletara gatnaşyklarda dialog we ynanyşmak medeniýetini ösdürmäge gönükdirilen tagallalarynyň dünýä jemgyýetçiligi tarapyndan giňden goldanylýandygyny görkezýändigi bellenildi.
Çäräniň ahyrynda medeni maksatnama geçirildi. Onuň çäklerinde türkmen halkynyň milli saz guraly bolan dutarda saz eserleri ýerine ýetirildi. Dutary ýasamak senetçiligi we onda saz çalmak sungaty ÝUNESKO-nyň Adamzadyň maddy däl medeni mirasynyň reprezentatiw sanawyna girizilendir.
