Türkmenistanyň 20 ýaşa çenli ýaşlar ýygyndysy «Aziýanyň Kubogy –2027»-niň saýlama tapgyryndaky çykyşyna ýeňiş bilen başlady. Duşuşyklary Tailandyň Çonburi şäherinde geçirilýän «F» toparynyň ilkinji duşuşygynda türkmen futbolçylary Yragyň ýygyndysyndan 2:1 hasabynda üstün çykdylar. Aziýanyň Futbol konfederasiýasynyň resmi saýty Türkmenistanyň ýygyndysynyň bu ýeňşini garaşylmadyk netije hökmünde häsiýetlendirdi.
Duşuşykda hasap 15-nji minutda açyldy. Yragyň goragçysy Karrar Al-Saidi öz jerime meýdançasynda topa eli bilen degip, düzgüni bozansoň, bellenen jerime urgusyny Ýakupmuhammet Gowşudow takyk ýerine ýetirip, türkmen ýygyndysyny öňe çykarmagy başardy.
Ikinji ýarymda yrakly futbolçylar deňligi dikeltmegi başardylar. 59-njy minutda Sajjad Hüseýin Jasym Al-Saidanyň uzyn aut zyňyşyndan soň Moamel Malik Sabah Alşawi güýçli hem-de takyk urgy bilen topy derwezäniň ýakyn burçundan geçirdi.
Emma türkmen futbolçylary özlerini ýitirmän, tiz wagtda ýene-de öňe çykdylar. 77-nji minutda Ýakupmuhammet Gowşudowyň nobatdaky howply urgusyndan soň Yragyň derwezebany topy diňe öňüne serpikdirip bildi. Serpikdirilen topa ilkinji bolup Weýisgeldi Orazdurdyýew ýetip, ýeňiş goluny derwezä gönükdirdi.
Türkmenistanyň ýaşlar ýygyndysyna bu ýaryşda 45 ýaşly baş tälimçi Didar Hajyýew ýolbaşçylyk edýär. Ol öň milli ýygyndynyň düzüminde çykyş eden belli futbolçy bolup, häzirki wagtda «Arkadag-2» toparynyň ikinji düzümini hem türgenleşdirýär.
«F» toparynyň beýleki duşuşygynda ýaryşyň eýesi bolan Tailandyň ýygyndysy BAE-niň toparyndan 1:0 hasabynda üstün çykdy. Ýeke-täk gol goşmaça wagtyň ilkinji ýarymyna goşulan minutlarynda Siwakorn Ponsan tarapyndan geçirildi.
Türkmenistanyň ýaşlar ýygyndysy indiki duşuşygyny 3-nji sentýabrda Tailandyň ýygyndysyna garşy geçirer. 6-njy sentýabrda bolsa BAE-niň ýygyndysy bilen duşuşar.
Aziýanyň Kubogynyň final tapgyryna çykmak ugrundaky göreşiň diýseň dartgynly bolmagyna garaşylýar. Saýlama tapgyryna jemi 31 ýurduň ýygyndysy gatnaşyp, olar sekiz topara bölündi.
Saýlama tapgyrynyň ilkinji tapgyry beýleki toparlarda-da gyzgalaňly geçdi. Duşuşyklaryň netijeleri boýunça:
«A» topary (üç toparyň gatnaşýan duşuşyklary Bişkekde geçirilýär): Liwan – Koreýa Respublikasy – 2:3. Gyrgyzystanyň ýygyndysy ilkinji tapgyrda duşuşyk geçirmedi.
«B» topary (duşuşyklar Daşkentde geçirilýär): Siriýa – Hindistan – 0:1, Özbegistan – Bangladeş – 2:0.
«C» topary (duşuşyklar Wýetnamda geçirilýär): Eýran – Palestina – 2:1, Wýetnam – KHDR – 0:3.
«D» topary (duşuşyklar Bahreýnde geçirilýär): Iordaniýa – Owganystan – 1:0, Täjigistan – Bahreýn – 2:3.
«E» topary (duşuşyklar Katarda geçirilýär): Katar – Oman – 1:2, Saud Arabystany – Gonkong – 4:0, Ýemen – Kamboja – 2:0.
«G» topary (duşuşyklar Kambojada geçirilýär): Ýaponiýa – Kuweýt – 1:2.
«H» topary (duşuşyklar Laosda geçirilýär): Indoneziýa – Malaýziýa – 0:0, Awstraliýa – Laos – 2:0.
Final tapgyrynda 15 orun ugrunda göreş alnyp barylýar. Toparlaryň sekiz ýeňijisi hem-de ikinji orny eýelän iň gowy ýedi ýygyndy ýaryşyň eýesi bolan Hytaýyň topary bilen bilelikde 20 ýaşa çenli futbolçylarynyň 43-nji Aziýanyň Kubogynyň (AFC U20 Asian Cup™) final tapgyryna gatnaşmaga hukuk gazanar. Ýaşlar üçin Aziýanyň Kubogynyň final tapgyry 2027-nji ýylyň 24-nji martyndan 10-njy apreline çenli Hytaýyň Hançžou şäherinde geçiriler.
Şeýle hem saýlama tapgyrynda dördünji orunlary eýelän we iň pes görkezijä eýe bolan alty topar indiki saýlama ýaryşynyň ösüş tapgyryna ugradylar.
Şol bir wagtyň özünde ösüş tapgyrynda hem duşuşyklara badalga berildi. Bu tapgyrda 11 topar üç toparça bölündi. Olaryň her birinde birinji we ikinji orunlary eýelän ýygyndylar indiki saýlama tapgyrynyň esasy bölegine geçirilýär.
Ösüş tapgyrynyň ilkinji duşuşyklarynda şu netijeler hasaba alyndy:
«I» topary (duşuşyklar Mongoliýada geçirilýär): Demirgazyk Marian adalary – Mongoliýa – 0:7. Guam ilkinji tapgyrda duşuşyk geçirmedi.
«J» topary (duşuşyklar Butanda geçirilýär): Hytaý Taýpeýi – Makao – 5:0, Singapur – Butan – 3:1.
«K» topary (duşuşyklar Mýanmada geçirilýär): Mýanma – Şri-Lanka – 4:0, Maldiwler – Bruneý – 2:0.
