2026-njy ýylyň 11-12-nji sentýabry aralygynda “Awaza” milli syýahatçylyk zolagynda Aral deňziniň basseýni üçin BMG-niň Ýörite maksatnamasyny (UN SPAS) durmuşa geçirmegiň mehanizmlerini işläp taýýarlamak we anyklamak boýunça ikinji sebitara konsultatiw duşuşyk we suw diplomatiýasy boýunça Sebitara seminar geçirildi. Bu barada Türkmenistanyň DIM-niň web-saýtynda habar berilýär.
Çäre Türkmenistanyň Daşary işler ministrligi, Türkmenistanyň Daşky gurşawy goramak ministrligi, BMG-niň Ösüş Maksatnamasynyň we Ählumumy ekologiýa gaznasynyň “Köp sanly peýda almak üçin Aral deňziniň basseýninde ýer baýlyklaryny we ýokary tebigy gymmatlykly ekoulgamlary gorap saklamak we durnukly dolandyrmak” taslamasynyň goldamagynda Türkmenistanyň Suw serişdeleri boýunça Döwlet komiteti tarapyndan we Blue Peace Central Asia-nyň başlangyjy bilen özara hyzmatdaşlykda guraldy. Duşuşyk 2024-nji ýylyň 30-njy noýabry – 1-nji dekabry aralygynda Aşgabatda geçirilen ESKATO-nyň birinji sebitleýin konsultatiw duşuşygynyň dowamy boldy.
Duşuşygyň işine Gazagystan Respublikasynyň, Täjigistan Respublikasynyň, Türkmenistanyň we Özbegistan Respublikasynyň degişli ministrlikleriniň we döwlet edaralarynyň, Araly halas etmegiň Halkara gaznasynyň, BMG-niň Merkezi Aziýa üçin öňüni alyş diplomatiýasy boýunça Sebit merkeziniň, Suw hojalygynyň halkara komitetiniň ylmy-maglumat merkeziniň (SIC ICWC), Merkezi Aziýanyň sebitleýin ykdysady merkeziniň (CAREC), Suw serişdelerini dolandyrmagyň halkara institutynyň (IWMI), ÝUNESKO-nyň, Halkara hyzmatdaşlygy boýunça german jemgyýetiniň (GIZ) we beýleki halkara hem-de sebit guramalaryň wekilleri gatnaşdylar.
Iki gün dowam eden mejlisiň barşynda Aral deňziniň basseýni boýunça sebitleýin hyzmatdaşlygy mundan beýläk-de ösdürmek babatda giň pikir alyşmalar boldy. Merkezi Aziýanyň 5 döwletiniň BMG-niň Ýörite maksatnamasyny ösdürmek ugrundaky ileri tutulýan garaýyşlary duşuşygyň möhüm bölegi boldy. Gazagystan Respublikasynyň, Täjigistan Respublikasynyň, Türkmenistanyň we Özbegistan Respublikasynyň wekiliýetleri UN SPAS-y ösdürmäge gönükdirilen sebitleýin özara gatnaşyklary we mümkinçilikleri mundan beýläk-de dowam etdirmek bilen bagly garaýyşlaryny beýan etdiler.
Ikinji sebitara duşuşygyň netijeleri boýunça Aral deňziniň basseýni üçin BMG-niň Ýörite maksatnamasynyň üstünde mundan beýläkki işiň formaty boýunça gatnaşyjy döwletleriň Jemleýji syny kabul edildi. Resminamada Ýörite maksatnamanyň formatyny, hukuk esasyny, wezipelerini we maliýeleşdirmegiň mehanizmlerini kesgitlemek boýunça anyk ädimler bellenilýär.
