2026-njy ýylyň 14-nji sentýabrynda Baku şäherinde Türki Döwletleriň Guramasynyň (TDG) agza döwletleriniň musulman dini müdiriýetleriniň ýolbaşçylarynyň Geňeşiniň VII mejlisi geçirildi. Bu barada Türkmenistanyň DIM-niň web-saýtynda habar berilýär.
Mejlise TDG-niň agza döwletleriniň musulman dini müdiriýetleriniň ýolbaşçylary we ýokary wezipeli wekilleri, şeýle hem TDG-niň Baş sekretary gatnaşdylar.
Duşuşygyň dowamynda TDG-niň agza döwletleriniň musulman dini müdiriýetleriniň arasyndaky özara hyzmatdaşlygy ösdürmek, şeýle hem doganlyk halklaryň arasyndaky ruhy, ahlak we medeni gatnaşyklary has-da berkitmek bilen baglanyşykly möhüm meseleler boýunça pikir alşyldy.
Mejlisde Türkmenistana Türkmenistanyň Müftüsi Rahman Gurbanmyradow wekilçilik etdi.
Türkmenistanyň Müftüsi öz çykyşynda TDG-niň agza döwletleriniň musulman dini edaralarynyň arasyndaky özara hyzmatdaşlygy has-da berkitmegiň möhümdigini nygtady, şeýle hem parahatçylyk, ynsanperwerlik, özara hormat goýmak we ruhy agzybirlik ýaly umumyadamzat gymmatlyklaryny öňe sürmäge gönükdirilen bilelikdäki başlangyçlaryň ähmiýetini belledi.
Dini we ynsanperwer ulgamlarda hyzmatdaşlygy giňeltmek, şeýle hem TGD-niň agza döwletleriniň halklarynyň arasyndaky ruhy-medeni gatnaşyklary mundan beýläk-de ösdürmek meselelerine aýratyn üns berildi.
Geňeşiň VII mejlisiniň geçirilmegi TDG-niň agza döwletleriniň musulman dini müdiriýetleriniň arasyndaky özara hyzmatdaşlygy mundan beýläk-de ösdürmekde we doganlyk ýurtlaryň arasyndaky ruhy-medeni gatnaşyklary berkitmekde nobatdaky möhüm ädim boldy.
