2026-njy ýylyň 21-nji sentýabrynda Duşenbe şäherinde «Türkmenistanyň Garaşsyzlygynyň 35 ýyllygy: türkmen-täjik dostlugynyň we çuňlaşdyrylan strategik hyzmatdaşlygyň täze ugurlary» atly halkara ylmy-amaly maslahat geçirildi.

Çärä Türkmenistanyň Täjigistan Respublikasyndaky Ilçihanasy bilen Täjigistan Respublikasynyň Prezidentiniň ýanyndaky Strategik barlaglar merkezi bilelikde guraldy. Maslahata döwlet edaralarynyň, ylym-bilim edaralarynyň, diplomatik korpusyň, jemgyýetçilik guramalarynyň, köpçülikleýin habar beriş serişdeleriniň wekilleri, şeýle hem iki ýurduň bilermenleri we hünärmenleri gatnaşdylar.

Maslahatyň dowamynda türkmen-täjik hyzmatdaşlygynyň möhüm meseleleri we geljekki ugurlary boýunça pikir alyşmalar geçirildi. Syýasy-diplomatik, söwda-ykdysady, ylmy-bilim we medeni-ynsanperwer ulgamlarda özara hyzmatdaşlygy ösdürmäge aýratyn üns berildi.

Maslahata gatnaşyjylar iki ýurduň halklarynyň arasyndaky däp bolan dostluk we hoşniýetli goňşuçylyk gatnaşyklarynyň, şeýle hem dürli derejelerdäki yzygiderli döwletara dialogyň we gatnaşyklaryň strategik hyzmatdaşlygy mundan beýläk-de pugtalandyrmakdaky ähmiýetini bellediler.

Çäräniň çäklerinde Türkmenistanyň Ilçihanasy tarapyndan kitap we fotosuratlary öz içine alýan tematik sergi guraldy. Kitap sergisinde türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň we Türkmenistanyň Prezidenti Serdar Berdimuhamedowyň eserleri, şeýle hem Türkmenistanyň taryhyna, medeniýetine we häzirki zaman ösüşlerine bagyşlanan neşirler görkezildi.

Ahalteke bedewlerine — türkmen halkynyň milli baýlygyna we buýsanjyna bagyşlanan fotosergi aýratyn gyzyklanma döretdi.