Hususy pudak ýurdumyzyň ykdysady kuwwatynyň pugtalandyrylmagyna we şöhratly sene — Türkmenistanyň Garaşsyzlygynyň 35 ýyllygyna taýýarlyk görülmegine mynasyp goşant goşup, ösüşiň ýokary depginlerini görkezmegini dowam etdirýär.

Ýerli azyk senagatynyň täze üstünlikleriniň biri «Medat» haryt nyşany bilen özboluşly önüm — sublimasiýa usulynda taýýarlanan düýe süýdüniň önümçiliginiň ýola goýulmagydyr. Bu taslama Türkmenistanyň Senagatçylar we telekeçiler birleşmesiniň agzasy Polat Kanaýew tarapyndan durmuşa geçirilýär.

Önümçilik Ahal welaýatynyň Gökdepe etrabynyň «Ahal» daýhan birleşiginiň çägindäki düýeçilik hojalygynyň binýadynda alnyp barylýar. Kärhananyň esasy aýratynlygy düýeleri ýylyň dowamynda öri meýdan şertlerinde saklamakdan ybarat bolup, bu ekologiýa taýdan arassa çig mal almaga mümkinçilik berýär.

Sublimasiýa usulynda guratmak iki esasy tapgyrdan ybarat: süýdi –40 gradusdan –80 gradusa çenli temperaturada çalt doňdurmak hem-de wakuum şertlerinde buzuň göni bugardylmagy arkaly çyglylygy aýyrmak. Bu usul önümiň peýdaly häsiýetleriniň 95 göterimine çenli bölegini we tebigy tagamyny saklamaga mümkinçilik berýär.

Häsiýetleri boýunça sublimasiýa usulynda taýýarlanan süýt täze sagylan süýtden tapawutlanmaýar diýen ýaly we witaminleriň hem-de mikroelementleriň saklanyp galmagy babatda adaty görnüşdäki gury süýtlerden has ýokarydyr. Önüm 200 we 400 gramlyk amatly sarp ediş gaplarynda çykarylýar.

«Medat» brendiniň düýe süýdi laktoferrine, immunoglobulinlere, B, C, D witaminlerine, şeýle hem demre, kaliý we kalsiý ýaly elementlere baý bolan gymmatly tebigy önümdir. Önüm immun ulgamyny goldamaga, wiruslara we bakteriýalara garşy göreşmäge ýardam berýär, beden tarapyndan ýeňil özleşdirilýär we içegäniň mikroflorasyna oňyn täsir edýär.

Sublimasiýa usulynda taýýarlanan önüm ýyly suw bilen garylanda aňsatlyk bilen gaýtadan süýde öwrülýär we aşpezlikde giňden ulanylýar. Ony kofede we çaýda gury gaýmaklaryň ornuna, smuzilere we kokteýllere goşmak, süle, tüwi ýa-da greçka ýarmasyndan şülelerini taýýarlamakda, blinçikleriň, oladýalaryň, keksleriň we öý çöreginiň taýýarlanyş usulynda, şeýle hem krem-çorbalary goýaltmak we souslaryň esasy hökmünde peýdalanmak bolýar.

Täzeçil sublimasiýa önümi bilen bir hatarda, hojalyk düýe süýdünden taýýarlanýan däp bolan önümleri — çaly we agarany — «Çöl gämisi» haryt nyşany bilen hem üstünlikli öndürýär. Önümçiligiň ygtybarly çig mal binýadyny türkmen maldarlarynyň köp asyrlyk halk seçgisiniň netijesinde döredilen özboluşly bir örküçli düýe tohumy — arwana üpjün edýär.