Türkmenistanyň Saglygy goraýyş we derman senagaty işgärleriniň güni Balkan welaýatynyň çar künjeginde hem bimöçber şatlyk-şowhunda bellenip geçildi. Şanly sene mynasybetli Balkan welaýatynyň merkezi Balkanabat şäherinde Balkan welaýatynyň Enäniň we çaganyň saglygyny goraýyş merkeziniň dabaraly ýagdaýda ulanyşa berilmegi hem welaýatyň ýaşaýjylarynyň durmuşynda ýatdan çykmajak şanly wakalaryň birine öwrüldi.
Çäksiz söýgä, egsilmez buýsanja beslenen dabarada çykyş edenler oňa gatnaşyjylary Türkmenistanyň Saglygy goraýyş we derman senagaty işgärleriniň güni hem-de binalaryň açylyş dabarasy bilen mähirli gutladylar. Şäheriň özboluşly gözelligini baýlaşdyran, milli binagärligiň, şeýle-de dünýä tejribesiniň öňdebaryjy gazananlarynyň sazlaşygynda gurlan we durky düýpli täzelenen döwrebap binalar diňe bir saglygy goraýyş işgärlerini däl, eýsem, «Garaşsyz, baky Bitarap Türkmenistan –bedew batly at-myradyň mekany» ýylyny guwandyryjy zähmet üstünliklerine besleýän Günbatar sebitiň bagtyýar ýaşaýjylary üçinem ajaýyp sowgat boldy.
Daş-töweregi, ýanaşyk ýerleri abadanlaşdyrylan, baýramçylyk keşbine giren Balkan welaýatynyň Enäniň we çaganyň saglygyny goraýyş merkeziniň açylyş dabarasy Berkarar döwletiň täze eýýamynyň Galkynyşy döwrüniň egsilmez joşgunyna, baý mazmunyna, ýokary ruhubelentligine beslendi. Açylyş dabarasyna Balkan welaýat we Balkanabat şäher häkimlikleriniň, welaýat merkeziniň edaralarydyr kärhanalarynyň ýolbaşçylary, halk maslahatynyň agzalary, Mejlisiň deputatlary, ýaşuly nesliň, jemgyýetçilik guramalarynyň wekilleri, saglygy goraýyş işgärleri, talyp ýaşlar, medeniýet we sungat ussatlary hem-de şäheriň köpsanly ýaşaýjylary agzybirlik bilen işjeň gatnaşdylar. Dabarada çykyş edenler türkmen halkynyň Milli Lideri Gahryman Arkadagymyzyň başyny başlan çäksiz möçberli özgertmelerini üstünlikli dowam etdirýän hormatly Prezidentimiziň parasatly baştutanlygynda «Saglyk» Döwlet maksatnamasynyň çäklerinde guwandyryjy üstünlikleriň gazanylýandygy dogrusynda çäksiz hoşallyk bilen nygtadylar. Bellenilişi ýaly, derwaýys ulgamy has-da ösdürmek, ilata häzirki zamanyň öňdebaryjy tejribelerine, innowasion tehnologiýalaryna laýyklykda, enäniň we çaganyň saglygyny goramak, saglygy goraýyş kömegini bermek, keselleriň öňüni almak, adamlaryň ömrüniň dowamlylygyny uzaltmak, şypahana-dynç alyş düzümlerini kämilleşdirmek, sagdyn durmuş ýörelgelerini jemgyýete ornaşdyrmak, ulgamyň maddy-enjamlaýyn binýadyny pugtalandyrmak ugrunda birnäçe maksadalaýyk işler oňyn amala aşyrylýar. Şonuň netijesinde dünýäniň esasy önüm öndürijileriniň ösen lukmançylyk enjamlary bilen birkemsiz üpjün edilen döwrebap köpugurly hassahanalar, saglygy goraýyş-anyklaýyş, bejeriş merkezleri, saglyk öýleri, şypahanalar döwletimizde adam baradaky, halkymyz hakyndaky ählitaraplaýyn aladalaryň naýbaşy orunda goýulýandygyna bütin aýdyňlygy bilen doly güwä geçýär. Gündelik durmuşymyzdan mälim bolşuna görä, hakykatdanam, ýurdumyzda halkymyzyň jan saglygyna, bagtyýar durmuşyna, röwşen geljegine, sagdyn durmuş ýörelgelerine gönükdirilen belent maksatly tutumlar toplumlaýyn häsiýete eýedir.
Bu ugurda güneşli Diýarymyzyň ähli sebitlerinde bolşy ýaly, onuň Günbatar sebitini jähekläp oturan Balkan welaýatynda durmuşa geçirilýän guwandyryjy işlerem aýdylanlaryň aýdyň güwäsidir. Munuň şeýledigine welaýatyň Enäniň we çaganyň saglygyny goraýyş merkeziniň dabaraly ýagdaýda ulanylmaga berilmegem aýdyň şaýatlyk edýär. Binalar toplumy 4 we 5 gatlardan ybarat bolup, enelere, çagalara niýetlenen 305 sany ýatymlaýyn orunlaryň bardygy bellenilmäge mynasypdyr. Şonuň 50 orny dogrum, dogrumdan soňky bölüme, ýene 50 orny ginekologiýa bölümine, 80 orny-da bäbekler bölümine, 10 orny bolsa täze dogulan bäbekleriň anesteziologiýa we reanimasiýa bölümine degişlidir. Merkezde kabul ediş, maslahat beriş, ginekologiýa we şöhle bilen anyklaýyş, anesteziologiýa we reanimasiýa, merkezleşdirilen barlaghana bölümleri ýerleşýär. Şonuň ýaly-da operasiýa otaglarynda dünýä hil ülňülerine laýyk gelýän ýokary derejeli enjamlar ornaşdyryldy. Olar kompýuter tomografiýa, magnito-rezonans tomografiýa, flýurografiýa, mammografiýa, uly rentgen ýaly kämil lukmançylyk enjamlary bilen üpjün edilendir.
Balkan welaýatynda ilkinji sapar 10 orunlyk täze dogulan bäbekleriň anesteziologiýa we reanimasiýa bölüminiň ýaňy açylmagam eneleriň, çagalaryň saglygyny goramakdaky aladalaryň dowamly häsiýete eýediginiň aýdyň subutnamasydyr. Merkeziň Wengriýanyň «Mediсor» kompaniýasynyň «Babylife BLF-2001» kysymly wagtyndan öň doglan çagalara seretmäge niýetlenen, döwrebap lukmançylyk enjamlary bilen üpjün edilmegem aýratyn bellenilmäge mynasypdyr. Bu ygtybarly enjam çaga üçin edil enäniň göwresindäki ýaly şertleri döretmäge mümkinçilik döredýär. Ösen enjam arkaly-da bäbegiň agramyna, beden gyzgynlygyna laýyklykda, kislorodyň doýgunlygyna, çyglylygyna, gyzgynlyk derejesine gözegçilik edilip durulýar. Şeýle-de Germaniýanyň «Proview-12» kysymly monitory arkaly bäbekleriň dem alyşynyň ýygylygyny, bedeniň gyzgynlygyny, inwaziw, inwaziw däl görnüşlerdäki arterial gan basyşyny, merkezi wena ganyň oksigenasiýasyny, elektrokardiografiýasyny anyklap bolýar. Şeýle enjamlar bäbekleriň sagdyn ösmeginde, sagdyn nesilleriň kemala gelmeginde hem wajyp ähmiýetlidir. Hut şunuň özem hormatly Prezidentimiz tarapyndan 2026 – 2030-njy ýyllar üçin kabul edilen «Sagdyn ene – sagdyn çaga – sagdyn geljek» Milli maksatnamasynyň gyşarnyksyz durmuşa geçirilýändiginiň nobatdaky gezek üstünlikli netijesidir. Saglygy goraýyş ulgamynyň sazlaşykly işini üpjün etmekde döredilýän şeýle naýbaşy şertlerdir mümkinçilikler bolsa bu dabara gatnaşyjylarda çuňňur hoşallyk duýgularyny döretdi.
Bezemen sahnada ýaýbaňlandyrylan täsirli, şowhunly dabaranyň dowamynda döwrebap binalaryň gurluşygynda yhlasly zähmetleri bilen tapawutlanan ussat gurluşykçylara hormatly Prezidentimiziň adyndan gymmat bahaly sowgatlaram dabaraly ýagdaýda gowşuryldy. Dabaranyň dowamynda Arkadagly Gahryman Serdarymyzyň adyndan sowgat berlen ýöriteleşdirilen awtoulaglar hem milli däplerimiz esasynda çäksiz hoşallyklar bilen kabul edildi.
Balkan welaýat häkimliginiň düýpli gurluşyk dolandyryş edarasynyň buýurmasy esasynda gurluşyk işlerini Türkmenistanyň Senagatçylar we telekeçiler birleşmesiniň agzasy «Şadyýan gurluşyk» hojalyk jemgyýetiniň gurluşykçylary ýerine ýetirdiler. Welaýat medeniýet müdirliginiň, welaýat ýörite sungat mekdebiniň aýdym-saz, tans, halk döredijilik toparlarynyň, Beýik Saparmyrat Türkmenbaşy adyndaky welaýat döwlet drama teatrynyň artistleriniň edebi-sazly çykyşlaram has-da alyslara ýaň saldy. Mahmal owazly çykyşlaram gül Watanymyzyň goýnunda ýetilýän belent sepgitleriň, taryhy eýýamymyzyň, «Garaşsyz, baky Bitarap Türkmenistan – bedew batly at-myradyň mekany» ýylynyň, Gahryman Arkadagymyzyň hem-de Arkadagly Gahryman Serdarymyzyň bütin älem içre meşhur tutumlarynyň, dost-doganlygyň, parahatçylygyň waspyna öwrüldi. Küşdepdidir gazallaram dabara gatnaşanlaryň buýsançly göwünlerini arşa göterdi.
Soňra hormatly ýaşulularyň ak pata bermegi bilen toý bagy kesilenden soň, bu dabara gatnaşyjylar täze we durky düýpli täzelenen binalaryň içine aýlanyp gördüler hem-de nusgalyk derejelerdäki şertleriň döredilendigine göz ýetirdiler. Merkeziň ähli bölümleri-de Ýaponiýa, Italiýa, Germaniýa, Ispaniýa, Amerikanyň Birleşen Ştatlary, Koreýa, Fransiýa, Hytaý Halk Respublikasy ýaly döwletleriň täze innowasion tehnologiýaly kämil lukmançylyk enjamlary bilen üpjün edilipdir. Öňdebaryjy lukmançylyk enjamlarynyň işleýişleri, olaryň ygtybarly mümkinçilikleri dogrusynda tejribeli lukmanlaryň beren gyzykly gürrüňlerem oňa gatnaşanlaryň kalplarynda özboluşly täsirleri galdyrdy. Şeýle-de olar bu ýerde eneleriň, çagalaryň göwnejaý bejergi almaklary, lukmanlaryň netijeli zähmet çekmekleri babatda döredilen döwrebap şertlerdir mümkinçilikler üçin türkmen halkynyň Milli Lideri Gahryman Arkadagymyza hem-de hormatly Prezidentimiz Arkadagly Gahryman Serdarymyza egsilmez alkyş, hoşallyk sözlerini beýan etdiler.
