2023-nji ýylda Türkmenistanyň iki sany ýokary okuw mekdebinde – Aşgabatdaky Magtymguly adyndaky Türkmen döwlet uniwersitetinde we Türkmenabatdaky Seýitnazar Seýdi adyndaky Türkmen döwlet mugallymçylyk institutynda ilkinji gezek durmuş işi ugry boýunça bakalawr maksatnamasy açyldy. Şu günki günde bu hünär boýunça 125 talyp bilim alýar, ilkinji 35 hünärmen bolsa 2026-2027-nji okuw ýylynda okuwyny tamamlar.

2026-njy ýylyň mart aýyndan bäri iki ýokary okuw mekdebiň mugallymlary, Zähmet we ilaty durmuş taýdan goramak ministrliginiň wekilleri we işleýän durmuş işgärleri ÝUNISEF-iň goldamagynda okuw meýilnamasyny gaýtadan gözden geçirýärler. Olar öz işlerinde Durmuş işgärleriniň halkara federasiýasynyň we Durmuş işi boýunça ýokary mekdepleriň halkara assosiasiýasynyň maslahatlaryna esaslanýarlar. Baş maksat bilimi ýurduň hünärmen zerurlyklaryna we dünýäniň iň gowy tejribelerine laýyk getirmekden ybaratdyr.

29-njy sentýabrdan 10-njy oktýabr aralygynda Türkmenistanda ÝUNISEF-iň halkara bilermeni doktor Salome Namitçeişwili iş wezipesini ýerine ýetirdi. Bu wezipäniň çäginde iki ýokary okuw mekdebiniň bilelikdäki maslahaty, şeýle hem talyplar we mugallymlar üçin birnäçe okuw sapaklary geçirildi.

Täzelenen maksatnamanyň esasy ugry amaly taýdan taýýarlyk bolar. Talyplar üçin ukyplary bahalandyrmagyň täze guraly – talybyň amalyýet portfoliosy girizilýär we durmuş edaralaryndaky önümçilik amalyýetleri giňeldilýär.

Mundan başga-da, bilermenler ýokary ýyl talyplary üçin geljekki iki okuw möwsüminiň dowamynda ilkinji gezek okadyljak täze dersleri taýýarladylar: çagalar, ýaşlar we maşgalalar bilen durmuş işi, çagalary goramak, jemgyýet we guramalar bilen işleşmek.

Şu ýyl uçurym bolmaly talyplar diplom işleri, amalyýet we uçurym synaglaryna taýýarlyk boýunça maslahatlary aldylar, birinji ýylyň talyplary bolsa durmuş işiň esaslary bilen tanyşdylar.

– Ministrlik iki ýokary okuw mekdebiniň mugallymlary bilen bilelikde okuw meýilnamasyny gaýtadan gözden geçirmäge gatnaşmak mümkinçiligi üçin hoşallygymyzy aýdýarys – diýip, Zähmet we ilaty durmuşy taýdan goramak ministrliginiň Durmuş üpjünçiligi bölüminiň ýolbaşçysy Şemşat Abdyýewa belledi. – Biz ýokary hilli okuw maksatnamasynyň durmuş iş hünäriniň uçurymlarynda çagalary, maşgalalary we jemgyýeti goldamak üçin zerur bolan bilimleri, hünär gymmatlyklaryny we amaly ukyplary kemala getirmäge kömek etjekdigine hem-de olara Türkmenistanyň durmuş hyzmatlar ulgamynyň ösmegine goşant goşmaga şert döretjekdigine ynanýarys.