2026-njy ýylyň 28-nji oktýabrynda Merkezi Aziýa döwletleriniň Parlamentara forumynyň IV mejlisine gatnaşmak maksady bilen Täjigistan Respublikasyna amala aşyrýan iş saparynyň çäklerinde Türkmenistanyň Mejlisiniň Başlygy D.Gulmanowa Täjigistan Respublikasynyň Oli Majlisiniň Milli Majlisiniň Başlygy Rustam Emomali bilen duşuşdy. Bu barada Türkmenistanyň DIM-niň web-saýtynda habar berilýär.
Duşuşygyň dowamynda Rustam Emomali Türkmenistanyň Prezidenti Serdar Berdimuhamedowyň, türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyzyň, şeýle hem Täjigistan Respublikasynyň Prezidenti Emomali Rahmonyň iki ýurduň arasyndaky dostlukly we hoşniýetli goňşuçylyk gatnaşyklaryny pugtalandyrmakda hem-de türkmen-täjik dialogyny ösdürmekde goşýan uly goşantlaryny belledi.
Türkmenistanyň we Täjigistan Respublikasynyň Parlamentara dostluk we hyzmatdaşlyk toparynyň işine aýratyn üns berildi. Taraplar onuň işini mundan beýläk-de ösdürmegiň, bilelikdäki başlangyçlary durmuşa geçirmegiň hem-de parlamentleriň wekilleriniň arasynda göni gatnaşyklary giňeltmegiň möhümdigini nygtadylar.
Duşuşygyň dowamynda halkara gün tertibiniň möhüm meseleleri boýunça hem pikir alşyldy. Söhbetdeşler özara gyzyklanma bildirilýän ugurlarda hyzmatdaşlygyň ähmiýetini belläp, halkara parlament birleşikleriniň çäklerinde hyzmatdaşlygy mundan beýläk-de ösdürmäge gyzyklanma bildirýändiklerini tassykladylar.
Şeýle hem, şol gün Türkmenistanyň Mejlisiniň Başlygy D.Gulmanowa Täjigistan Respublikasynyň Oli Majlisiniň Namoýandagon Majlisiniň Başlygy Faýzali Idizoda bilen duşuşdy.
Duşuşygyň dowamynda taraplar dostluk, özara hormat goýmak we ynanyşmak ýörelgelerine esaslanýan türkmen-täjik gatnaşyklarynyň yzygiderli ösdürilýändigini bellediler. Iki döwletiň Baştutanlarynyň, şeýle hem türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyzyň iki ýurduň arasynda däp bolan dostlukly gatnaşyklary pugtalandyrmakda we ikitaraplaýyn hyzmatdaşlyga täze itergi bermekde möhüm orny aýratyn nygtaldy.
Duşuşyklaryň netijeleri boýunça türkmen tarapy Täjigistan Respublikasynyň Parlamentiniň iki palatasynyň ýolbaşçylaryny we wekillerini Türkmenistanda geçiriljek halkara çärelere, şol sanda ÝHHG giňişliginde parlament diplomatiýasy boýunça Aşgabat maslahatyna, şeýle hem Türkmenistanyň 2026-njy ýylda Garaşsyz Döwletleriň Arkalaşygynda başlyklyk etmeginiň çäklerinde geçiriljek çärelere gatnaşmaga çagyrdy.
