Şu gün paýtagtymyzda Aşgabat şäheriniň güni mynasybetli birnäçe binagärlik-çeperçilik desgalarynyň açylyş dabarasy boldy we olar paýtagtymyzyň ajaýyplyklarynyň üstüni ýetirdi. Her biriniň özboluşly keşbi bolan kaşaň binalar Aşgabadyň dürli künjeklerinde gurlup ulanmaga berildi. Olar paýtagtymyzyň ajaýyplyklary bilen sazlaşyp, şäher gurşawynda Berkarar döwletimiziň bagtyýarylk döwrüniň ruhuny aýdyň beýan edýän döwrebap binalara öwrüldiler.
Binalaryň açylyş dabarasy paýtagtymyzyň Bagtyýarlyk şaýolunyň çatrygyndaky halkalaýyn ulag ýolunyň merkezinde gurlan “Arkadag” binasynyň açylmagy bilen başlandy.
Säher bilen bu künjege Türkmenistanyň Mejlisiniň Başlygy, hökümet agzalary, ministrlikleriň, pudaklaýyn düzümleriň, harby we hukuk goraýjy edaralaryň ýolbaşçylary, welaýatlaryň we Aşgabat şäheriniň häkimleri, daşary ýurtlaryň Türkmenistanda işleýän diplomatik wekilhanalarynyň, halkara guramalarynyň baştutanlary, daşary ýurtly işewürler, jemgyýetçilik guramalarynyň, köpçülikleýin habar beriş serişdeleriniň wekilleri, döredijilik işgärleri, hormatly ýaşulular we ýaşlar ýygnandylar.Dabara gatnaşyjylaryň hatarynda paýtagtymyzyň ilaty, şu gün şanly wakany baýram edýän mekdepleriň uçurymlary bar.
Hemmeleriň ellerinde ajaýyp bahar gülleri, dürli baýdaklar we howa şarlary bar. Türkmen halkynyň milli buýsançlarynyň biri bolan ýaşyl baýdaklar- asmanda pasyrdaýar. Mahlasy, bu ýerde ýokary watansöýüjilik ruhuna hem-de ildeşlerimiziň ajaýyp paýtagtymyza bolan buýsanjyna beslenen giň möçberli baýramçylyk ýagdaýy emele geldi.
Dabara geçirilýän ýerde Türkmenistanyň Döwlet senasy ýaňlanýar. Bu ýere ýygnananlar Döwlet senasynyň sözlerini agzybirlik bilen alyp göterýärler.
Soňra taryhy waka mynasybetli guralýan dabarany alypbaryjy şu günki çärä gatnaşýan ýaşuly R.Geldiýewe söz berýär. Mälim bolşy ýaly, ýaşulular türkmen jemgyýetinde görnükli orun eýeleýär, il sylagly aksakgallar hemişe halk arasynda uly abraýdan peýdalanýarlar. Ol watandaşlarymyzyň adyndan çykyş etmek bilen, Watanymyzyň abadançylygy ugrunda tutuş halkymyzyň bagtyýarlygyny nazarlaýan oňyn syýasaty alyp barýan hormatly Prezidentimiz Gurbanguly Berdimuhamedowa tüýs ýürekden alkyş sözlerini aýtdy. Ýurdumyzda ýaýbaňlandyrylan we halkymyzyň ýokary durmuş derejesini, döredijilikli işlemegini we göwnejaý dynç almagyny üpjün edýän şäher gurluşyk maksatnamasy yzygiderli durmuşa geçirilýär.
Hormatly ýaşulynyň belleýşi ýaly, Bagtyýarlyk döwründe türkmeniň toýy goşa-goşadan gelýär. Munuň özi Aşagbat şäheriniň güni bilen “Soňky jaň” dabaralarynyň utgaşmagyny emele getirýär. Şu gün hem Ak şäherimiz Aşgabadyň gününde täze gurlan Arkadag binasyny dabaraly ýagdaýda açýarys. Hormatly Prezidentimizi, türkmen halkyny şu goşa toý bilen tüýs ýürekden gutlaýaryn diýip, ýaşuly belledi.
Hormatly Prezidentimiz Gurbanguly Berdimuhamedow döwlet başyna geçen gününden “Meniň bar aladam halkym bolar” diýipdi. Hakykatdan şol günden başlap, eziz Arkadagymyz özüniň bar işini diňe halky üçin alyp bardy diýip, ýaşuly aýtdy. Hormatly Prezidentimiz gijesini gündiz edip, gysga wagtyň içinde ata Watanymyzyň abraýyny arşa göterdi. Indi, Garaşsyz Bitarap Türkmenistan döwletini, türkmen halkyny bütin dünýä tanaýar. Hormatly Prezidentimiz öz halkyny ylymly, bilimli bolmagyny üpjün etmek üçin çagalar baglaryny, orta we ýokary mekdeplerini, adamlaryň saglygy üçin sport desgalaryny, eşretli durmuşda ýaşamaklary üçin ähli amatlykly ýaşaýyş jaýlaryny, saglyk öýlerini, şypahanalary, hassahanalary, seýilgähleri, beýik-beýik binalary, köpugurly köprüleri, aýdyň ýollary gurup berdi.
Bularyň hemmesi eziz Arkadagymyzyň öz halky hakynda edýän atalyk aladasy netijesi bina edilen desgalardyr diýip, hormatly ýaşuly aýtdy. Bu aladalar üçin halkymyz hormatly Prezidentimize “Arkadagymyz” diýip ýüzlenýär diýip, ýaşuly sözüni dowam etdi. Hormatly Prezidentimiz şol ada halkymyzyň söýgüsini gazanmak bilen mynasyp boldy. Şu bina gurulmazdan öň, onuň guruljak ýerini maslahatlaşdyk. Şol maslahata biz ýaşulular hem gatnaşdyk. Täze binany gurmak üçin şu ajaýyp künjek saýlanyp alyndy. Bu bina hormatly Prezidentimiziň türkmen halky bilen bitewiligini, agzybirligini aňladýan binadyr. Halkymyz şu binanyň açylyşyna gatnaşýar. Ýene-de bir aýtmaly zat, bu binanyň sag tarapyndan seretseň, gözel Köpetdag görünýär, beýleki tarapdan ajaýyp gözel Aşgabadymyz görünýär.
Şu gün Türkmenistanyň ähli künjeklerinde hormatly Prezidentimiziň gurup beren ak mermerli mekdeplerinde ýaşlarymyzyň okuwlaryny tamamlap, özbaşdak durmuşa gadam basýandygyny aňladýan soňky jaň dabaralary geçirilýär.
Baý durmuş tejribesi bolan ýaşuly ýurdumyza hem-de halkara syýasy, işewür, medeni we syýahatçylyk merkezi hökmünde ykrar edilýän paýtagtymyza bolan buýsanç duýgularynyň ýaşlarda watansöýüjilik hem-de ahlak ýörelgelerini kemala getirmek üçin ägirt uly ähmiýetiniň bardygyny belledi.
Ýaşuly bu ýere ýygnananlary şanly wakalar bilen gutlady we ýurdumyzda düýpli özgertmeler maksatnamasyny amala aşyrmak bilen, hormatly Prezidentimiz Gurbanguly Berdimuhamedow tutuş türkmen topragynyň galkynmagy üçin giň mümkinçilikleri döretdi diýip nygtady. Bu tagallalar häzirki döwürde özüniň miwesini we oňyn netijelerini berýär. Bu bolsa Türkmenistanyň dünýä ýüzündäki abraýynyň ýokary galmagyny şertlendirýär. Ählii özgertmeleriň gözbaşynda bolsa ýurdumyzyň paýtagty durýar.
Dabaranyň barşynda Türkmenistanyň Demokratik partiýasmynyň başlygy K.Babaýew şu günki baýramçylyk çäreleri mynasybetli gutlag sözleri bilen çykyş etdi.
Şu gün Garaşsyz Bitarap Watanymyzda ak mermerli, Ginnesiň rekordlar kitabyna giren Aşgabat şäherimiziň güni giňden bellenilip geçilýär. Türkmen halky asyrlar boýy özüniň beýik şahsyýetlerine, liderlerine, serkerdelerine, halka hyzmat etmekde beýik işleri bitiren adamlaryna uly hormat bilen garaýar. Biziň mähriban Arkadagymyz özüniň ähli başlangyçlarynda türkmen halkynyň geçmişinde, biziň halkymyzyň gazananlaryna aýawly garamak, hormat bilen garamak ýörelgelerine eýerýär. Biziň hemmämize türkmeniň geçmişine, gazananlaryna, medeni mirasymyza, däbimize, dinine, dessuryna, Watanymyzyň gazananlaryna hormat bilen garamagyna ündeýär. Ýurdumyzda Berkarar döwletimiziň bagtyýarlyk döwründe asyrlara barabar ägirt uly işler durmuşa geçirilýär, biziň halkymyz bagtyýar durmuşda ýaşaýar diýip, TDP-niň başlygy aýtdy.
Mähriban Arkadagymyz, biziň ýurdumyzy dünýäde iň bagtyýar adamlaryň ýaşaýan ýurduna öwürmek baradaky başlangyçlary öňe sürdi. Häzirki döwürde ýurdumyzyň hakykatdan-da, görlüp-eşidilmegdik derejelere ýetdi. Bu gün türkmen halkyny bütin dünýä tanaýar. Bu gün türkmenler bütin dünýäde özüniň parahatçylyk söýüjilik ideýalary bilen mähriban Arkadagymyzyň baştutanlygynda gülläp ösýän döwleti gurýar.
Döwürler geçer Berkarar döwletimiziň bagtyýarlyk döwründe gurlan beýik binalar, zawod fabrikler, durmuşa geçirilen ägirt uly taslamalar, şeýle hem halkara gaz geçirijileri we demir ýollary, "Awaza" milli syýahatçylyk zolagy we beýlekiler nesillerimize hyzmat eder.
Özüniň göwrümi boýunça hem gerimi boýunça şu günki we geljekki nesillere asyrlaryň dowamynda hyzmat etjek taslamalar durmuşa geçirilýär.
Şonuň üçin hem öz Arkadagyna buýsanýan türkmen halky geçen ýyl jemgyýetiň dürli gatlaklarynda Arkadag binasyna Aşgabat şäheriniň iň gözel ýerleriniň birinde gurmak teklibini öňe sürdi diýip, TDP-niň başlygy aýtdy. Bu teklip ählihalk tarapyndan giňden goldanyldy. Sebäbi, döwletimiziň ähli mümkinçiliklerini adamyň hemmetaraplaýyn abadan ýaşamagyna gönükdirýän Arkadagymyzyň “Döwlet adam üçindir!” diýip alyp barýan işleriniň aňyrsy-bärsi ýok. Şu günki açylýan Arkadag binasy biziň halkymyzyň milli Liderimiziň daşynda jebisliginiň nyşanydyr. Bu biziň asuda, abadan, bedew bady bilen öňe barýan Türkmenistanyň şu günki keşbidir.
Ol özüniň çykyşynda döwletimiziň we paýtagtymyzyň ösüşinde, Aşgabadyň dünýäniň syýasy, işewür we medeni merkezi hökmünde ykrar edilmeginde, hormatly Prezidentimiziň ägirt uly tagallasynyň bardygyny belledi we ýurdumyzyň jemgyýetçilik guramalarynyň adyndan milli Liderimize tüýs ýürekden alkyş sözlerini aýtdy.
Soňra Türkmenistanyň Goranmak ministrliginiň Harby institutynyň serkerdesi, uly leýtenant B.Dädebaýew bu ýere ýygnananlary ýurdumyzda giňden bellenilýän Aşgabat şäheriniň güni hem-de “Arkadag” binasynyň açylmagy bilen tüýs ýürekden gutlady we Garaşsyz hemişelik Bitarap Türkmenistan döwletiniň täze taryhy eýýamda bedew bady bilen öňe barýandygyny belledi. Şeýle hem ol milli Liderimiz Gurbanguly Berdimuhamedowyň alyp barýan içeri we daşary syýasaty netijesinde ýurdumyzyň durmuşynyň ähli ugurlarynda uly üstünlikleriň gazanylandygyny aýtdy. Şunlukda döwrebap bilimli ösüp gelýän ýaş nesli kemala getirmekde, şol bir wagtyň özünde halk hojalygyny we ýurdumyzyň Ýaragly Güýçleriniň düzümlerini kämil hünärmenler bilen üpjün etmekde ähli mümkinçilikler döredilýär diýip, ol sözüni dowam etdi.
Watanymyza halkymyza şöhrat getiren mähriban Arkadagymyzyň öňe sürýän ajaýyp başlangyçlary bilen ýurdumyz gün-günden gülläp ösýär. Bitaraplyk we parahatçylyk ýyly ýene-de bir taryhy waka bilen dabaralandyrylýar. Gözel paýtagtymyzyň güni “Arkadag” binasynyň hem-de birnäçe beýleki binalaryň açylyş dabaralary bilen utgaşýar.
Şeýle hem ýaş serkerde ýurdumyzyň mundan beýläk-de gülläp ösmeginiň, Watanymyzyň goranmak kuwwatynyň pugtalanmagynyň, watansöýüji, hemmetaraplaýyn ukyply ýaşlaryň taýýarlanmagynyň bähbidine ähli tagallalaryny gaýgyrmajakdygyna ynandyrdy. Ýaş serkerde kaşaň binanyň ýanyndaky meýdança çykarylan Ýaşyl tugumyzyň syýyndan öpüp, Watana wepalylyk kasamyny aýtdy.
... Bu ýerde “Arkadag” binasynyň açylmagy mynasybetli guralan dabara türkmen ýaşlarynyň wekilleriniň biriniň çykyşy bilen dowam etdi.
D.Azady adyndaky Türkmen milli dünýä dilleri institutynyň üçünji ýyl talyby T.Bäşimowa häzirki döwürde ýaşlaryň hemmetaraplaýyn sazlaşykly ösmegi, dünýä ylmyna çuňňur aralaşmagy ugrunda ähli zerur şertleriň döredlilýändigi üçin hormatly Prezidentimize türkmen ýaşlarynyň adyndan alkyş sözlerini aýtdy. Şeýle hem ol ýokary bahalar bilen okap, Watanymyz, il-günümiz üçin gerekli hünärmenler bolup ýetişjekdiklerine ynandyrdy.
Bagtyýar durmuşyň hatyrasyna döretmek, gurmak başlangyçlary, belent ynsanperwerlik ýörelgeleri aýdyň maksatlary bilen Berkarar döwletimiziň bagtyýarlyk döwründe Watanymyzyň her bir güni uly ösüşlere taryhy wakalara beslenýär diýip, ol nygtady. Biziň ýüregimiz mydama eziz Watanymyz, Gahryman Arkadagymyz diýip urýar. Berkarar döwletimiziň bagtyýarlyk döwrüniň dünýäde iň bagtly ýaşlardygymyza buýsanýarys. Milli Liderimiziň hemişelik Bitarap Türkmenistan we halkymyzyň bähbidi ugrunda ägirt uly işelri bitirýär. Arkadagymyzyň bilimli, hemmetaraplaýyn ýaş nesilleri kemala getirmek, ýaşlaryň sazlaşykly ösüşini üpjün etmek, Garaşsyz, bitarap Watanymyzyň mundan beýläk-de gülläp ösmeginiň, mähriban halkymyzyň bagtyýar durmuşynyň we beýik geljeginiň bähbidine ýokary hünärli işgärleri taýýaralmak baradaky aladalary bilen gurşalandygymyz üçin biz örän bagtlydyrys.
Soňra ýurdumyzyň Ministrler Kabinetiniň Başlygynyň orunbasary M.Ýazmuhammedowa bu ýere ýygnananlary Aşgabat şäheriniň güni we “Arkadag” binasynyň açylmagy bilen gutlady. Wise-premýer häzirki döwürde gönüden-göni milli Liderimiziň tagallasy bilen Köpetdagyň howalanýan gerişlerinden Garagumyň tylla çaýylan gujagyna çenli uzap gidýän Aşgabadyň gün-günden ösýändigini, paýtagtymyzyň dünýäniň ösen şäherleriniň hatarynda öz ornuny pugtalandyrýandygyny aýdyp, bu babatda döwlet Baştutanymyzyň taýsyz tagallasynyň bardygyny nygtdy.
Wise-premýer ähli amatlyklary özünde jemleýän Aşgabada dünýäniň dürli ýurtlarynyň, işewür toparlarynyň gyzyklanmalarynyň barha ýokarlanýandygyny, paýtagtymyzyň syýasy, parahatçylyk döredijilik we medeni merkez hökmünde ykrar edilýändigini aýdyp, munuň “Arkadag” binasynyň tutuş halkymyzyň milli Liderimize bolan alkyşynyň, söýgüsiniň nyşanydygyny belledi.
Milli Liderimiziň heýkeliniň köňülleriň ganatyna deňelýän behişdi bedewiň üstünde şekillendirilmegi aýratyn many-mazmuna eýedir. Bu heýkelde mähriban Prezidentimiziň aýdyň hem ak ýoly bilen bedew badyna beslenen şu günümiz, nurana geljegimiz aýdyň beýanyny tapýar. Hormatly Prezidentimiziň eline gonan ak kepderiniň keşbi bolsa parahatçylygyň, asudalygyň, bagtyýarlygyň nyşanyny dabaralandyrýar we bu Bitaraplyk we parahatçylyk ýylynyň ruhuna kybap gelýär. Wise-premýer şeýle hem şu gün paýtagtymyzda açylýan, her biriniň özboluşly aýratynlygy bolan, emma umumy many-mazmun bilen utgaşýan ýene-de birnäçe binalaryň açylýandygyny aýtdy.
Soňra dabarany alyp, baryjy Türkmenistanyň Mejlisiniň Başlygy A.Nurberdiýewa söz berdi. Milli parlamentiň ýolbaşçysy Aşgabadyň her bir ösüşiniň, gazanýan üstünlikleriniň we dünýädäki belent abraýynyň hormatly Prezidentimiziň ady bilen berk baglanyşyklydygyny nygtady.
Soňra dabaranyň barşynda Türkmenistanyň Mejlisiniň Aşgabatda “Arkadag” binasyny açmak hakyndaky Karary okalýar.
Hususan-da, onda bu binanyň ýurdumyzyň köpsanly zähmetkeşler toparlaryndan, ýerli häkimiýet, jemgyýetçilik guramalaryndan hem-de Türkmenistanyň köpsanly ilatyndan gelip gowşan haýyşnamalaryň, teklipleriň esasynda gurlandygy aýdylýar. Munuň özi halkymyzyň Watanymyzyň abadançylygynyň bähbidine bimöçber tagalla edýän milli Liderimize bolan hormatynyň we ägirt uly sarpasynyň aýdyň nyşanydyr.
Dabara gatnaşyjylaryň şowhunly el çarpyşmalary astynda ajaýyp binanyň toý bagy kesilýär. Şu pursatda ak kepderiler bilen ýüzlerçe howa şarlary asmana göterilýär. Şunlukda, “Arkadag” binasy açylýar.
Bu binanyň keşbinde häzirki döwrüň nyşanyny alamatlandyrýan özboluşlylyk bar. Ajaýyp bedewe atlanan milli Liderimiziň şekili ýurdumyzyň ösüşlere tarap batly gadamyny alamatlandyrýar. Arkadagyň ýokary göterilen sag eline gonan kepderiniň şekillendirilmegi hormatly Prezidentimiz Gurbanguly Berdimuhamedowyň parahatçylyk söýüjilik syýasatyny hem-de Türkmenistanyň halkara giňişligindäki ornuny pugtalandyrýan we täsirini artdyrýan Bitaraplyk derejesini äşgär edýän görnüşi emele getirýär.
Bu binanyň awtory, Türkmenistanyň halk suratkeşi, heýkeltaraş Saragt Babaýew tutuş halkymyz üçin tanyş bolan pursady esas edinipdir. Bir gezek Türkmen bedewiniň baýramy mynasybetli döwlet Baştutanymyz ahalteke bedewine atlanyp, çapuw ýodasyna çykanynda, milli Liderimiziň egnine ak kepderi gondy. Şeýle görnüşe dünýäniň halklary gadymy döwürlerden bäri Hudaý tarapyn ýalkanmak diýip düşünýärler. Şol pursatda watandaşlarymyzyň ýurdumyzy ösüşiň belentliklerine tarap alyp barýan milli Liderimize bolan buýsanjynyň çägi bolmady.
... Bu desganyň umumy beýikligi onuň bir bitewi gaýany alamatlandyrýan binýadyny hasaba alanyňda 21 metre barabardyr. Gaýa şekilli binýadyň üstünde bolsa beýikligi 6 metr bolan Türkmenistanyň Prezidentiniň altyn öwüşginli ahalteke bedewine atlanan şekili oturdylypdyr.
Bu binanyň esasy manysy türkmen döwletliliginiň, Garaşsyzlygynyň, oňyn Bitaraplygynyň, şöhratly pederlerimiziň asylly ýörelgeleriniň, Berkarar döwletimiziň bagtyýarlyk döwrüniň döredijilik, erkinlik, özgeriş nyşanyny özünde jemleýär. Bu düşünjeler binanyň düýp özenini düzýär hem-de Türkmenistanyň beýik maksatlara, ösüşlere tarap ýoldaky ägirt uly üstünliklerini alamatlandyrýar.
“Arkadag” binasynyň gaýa şekilli binýadynda soňky ýyllarda Türkmenistanda döredilýän binagärlik-çeperçilik desgalarynyň esasy keşbini emele getirýän Oguzhanyň sekizburçly ýyldyzy ýerleşdirilipdir. Bu çuňňur manysy we taryhy kökleri bolan köptaraply nyşan halkymyzyň milletiň nesilbaşysy, ady rowaýata öwrülen Oguzahana bolan beýik sarpasydyr. Häzirki döwürde bu nyşan geçmişi, häzirki döwri we geljegi baglanyşdyrýan möhüm alamatdyr. Türkmen halkynyň, mähriban Watanyň azatlygy ugrunda göreşen pederlerimiziň ýurdumyzyň gülläp ösmegi hakynda eden arzuwlary hormatly Prezidentimiz Gurbanguly Berdimuhamedowyň döredijilikli syýasaty netijesinde hasyl boldy. Onda halkymyzyň Türkmenistanyň häzirki döwri hakyndaky nurana arzuw-umytlary, pederlerimiziň ýurdumyzyň daşary we içeri syýasatynda täze mazmuna ese bolan paýhasly wesýetleri, gazanýan üstünliklerimiz, ýeten derejämiz, batyrgaý meýilnamalarymyz we çözgütlerimiz öz beýanyny tapýar.
Biziň taryhy köklerimiz täze taryhy eýýamda ýurdumyzyň bagtyýar geljeginiň ygtybarly binýadyny emele getirdi.
Soňra baýramçylyk dabaralary “Abadançylyk” adyna eýe bolan kaşaň binanyň açylyşy bilen dowam etdi. Bu özboluşly bina paýtagtymyzyň Köpetdagyň etegindäki gözel künjekleriniň birinde, Arçabil we Çandybil şaýollarynyň çatrygynda guruldy. Ol abadançylygy, Berkarar döwletimiziň bagtyýarlyk döwründe uly ösüşlere beslenen türkmen topragynyň parahatçylygyny alamatlandyrmak bilen, bu künjegiň binalaryna utgaşdy.
Bu ýerde taryhy waka we şanly sene mynasybetli çagalaryň we ýetginjekleriň aýdym-sazly çykyşlary ýaýbaňlandyryldy.
Binanyň umumy belentligi 47 metr bolup, onuň sütüni bäş bölekden ybaratdyr. Binanyň ýokarsynda bäş sany kepderiniň şekili ýerleşdirilen Ýer şary bar. Binanyň sütünleriniň ýokarky bölegi milli şekiller bilen bezelen halka arkaly baglanyşýar. Munuň özi bir bitewüligi, agzybirligi alamatlandyrýar. Ýurdumyzyň her bir welaýatyna mahsus göller we bezeg aýratynlyklary bilen gurşalan sütünler bäş welaýatyň bitewüliginiň baş nyşanyny düzýär.
Türkmen halkynyň parahatçylyk söýüjilik we dostluk ýörelgelerini alamatlandyrýan kepderiler Garaşsyz, Bitarap Türkmenistanyň halkara giňişliginde dostluk hem-de netijeli hyzmatdaşlyk gatnaşyklarynyň ösdürilmegine gönükdirilen we dünýä bileleşiginiň giň ykrarnamasyna hem-de goldawyna eýe bolan döredijilikli syýasatynyň esasyny düzýän döwletimiziň özygtyýarlylygynyň, gülläp ösüşiniň, halkymyzyň bagtyýarlygynyň nyşanlaryny özünde jemleýär. 26 müň inedördül metr meýdany bolan bu binanyň yşyklandyryjylar bilen üpjün edilen we bezeg sütünleri bolan suw çüwdürimleri onuň kaşaňlygyny artdyrýar.
Binanyň dört tarapyndan ýerasty pyýada geçelge gurlupdyr. Onuň ýanaşyk ýerleri abadanlaşdyrylypdyr, bu ýerde giň meýdany bolan gök zolak dörediler.
Hormatly Prezidentimiziň paýhasly ýolbaşçylygynda parahatçylygyň, abadançylygyň we gülläp ösüşiň ýoly bilen ynamly gadam urýan mähriban Watanymyza bolan beýik buýsanjy äşgär edýän çykyşlar baýramçylygyň şowhunyny artdyrdy. Onda ýaşajyk artistler dünýäniň dürli dillerinde goşgular okadylar, aýdymlar aýtdylar. Olaryň çykyşlary hormatly Prezidentimize bolan alkyş senasy bolup ýaňlandy.
Dabaraly pursat gelip ýetdi. Ýüzlerçe ak şarlar we kepderiler asmana uçuryldy. Şeýlelikde, “Abadançylyk” binasy açyldy.
Bu şanly waka mynasybetli bu ýerde ýaş ýerine ýetirijileriň we folklor toparlarynyň çykyşlary dowam etdi. Dabara gatnaşyjylara ýörite baýramçylyk mynasybetli taýýarlanylan toý pişmeleri hödür edildi.
Paýtagtymyzyň Bagtyýarlyk we Oguzhan köçeleriniň çatrygynda bina edilen “Ýyldyz” binasynyň açylyş dabarasy baýramçylyk çärelerini dowam etdi. Şu günki baýramçylyk gününde bu ýerde ählumumy ýokary göteriliş we şatlyk ýagdaýlary emele geldi. Özboluşly binanyň ýanynda guralan dabara hormatly ýaşulular, kümüş saçly eneler, mekdepleriň paýtagtymyzyň köpsanly ýaşaýjylary we myhmanlary gatnaşdylar.
“Ýyldyz” binasy özboluşly binagärlik çözgüdi we gurluş aýratynlygy bilen tapawutlanýar. Onuň umumy beýikligi 36 metre barabar bolup, ýarymaý şekilindäki bäş sany sütünden ybaratdyr. Binanyň esasy bezegi Oguzhanyň sekizburçly ýyldyzy bolup durýar. Sütünler özaralarynda baglanyşyp, bir bitewi gurnamany emele getirýär.
Bu binanyň ýene bir aýratynlygy, oňa kesesinden syn edeniňde, bina ýarymaý şekili alamatlandyrýar, ýokarsyndan bolsa ýyldyz şekilindedir. Täze binanyň tutuşlygyna alnanda, asmana tarap barýan emele hemrany ýatladýandygyny aýratyn bellemeli.
Ýurdumyzyň dünýäniň kosmos döwletleriniň hataryna goşulandygyny alamatlandyran waka Watanymyzyň täze taryhyna has ähmiýetli sahypany ýazdy. Mälim bolşy ýaly, geçen aýyň ahyrynda ABŞ-nyň Florida ştatyndaky Kanaweral burnunyň kosmodromyndan Türkmenistanyň ilkinji “TürkmenÄlem 520E” emeli hemrasy älem giňişligine çykaryldy, ýakynda, 17-nji maýda bolsa ol geostasionar giňişlikde, Ýerden 36 müň kilometr belentlikde gündogar uzaklygyň 52-nji gradusyndaky älem ornuna üstünlikli çykdy. Bitaraplyk we parahatçylyk ýylynda ýurdumyzyň älem giňişligine çykarylan ilkinji emele hemrasyny türkmen döwletiniň tutuş dünýäniň halklaryna iberen dostluk salamy hökmünde atlandyrmak bolar. Şeýle hem munuň özi ýurdumyzyň tutuş adamzadyň bähbidine işjeň halkara hyzmatdaşlygynyň ösdürilmegine bolan gyzyklanmasynyň aýdyň nyşanydyr.
Şeýlelikde, adam eli bilen döredilen “Ýyldyz” binasy mähriban Watanymyzyň hormatly Prezidentimiz Gurbanguly Berdimuhamedowyň paýhasly ýolbaşçylygynda täze taryhy eýýamda gazanýan ägirt uly üstünlikleriniň we ýeten derejesiniň nyşanyny alamatlandyrdy. Onuň adynda hem özboluşly many bar. Bu bina Türkmenistanyň döredijilik ýoly bilen täze üstünlikleriň belentliklerine tarap bolan batly gadamlarynyň özboluşly beýanyny emele getirýär.
Soňra dabaralar açylmagyna garaşýan indiki desganyň ýanynda – Ýanbaş we Bekrewe köçeleriniň kesişýän ýerinde gurlan “Ylym” binasynyň ýanynda dowam edýär. Bu ýerde paýtagtymyzyň häkimliginiň, bilim ulgamynyň we Türkmenistanyň Ylymlar akademiýasynyň wekilleri, şeýle hem hormatly ýaşulular, aşgabatlylar hem-de ýurdumyzyň baş şäheriniň myhmanlary ýygnandylar. Dabara gatnaşýan köpsanly mekdep okuwçylarynyň we talyplaryň ellerinde howa şarlary we ak kepderiler bar, Türkmenistanyň Döwlet baýdaklary pasyrdaýar. Ýaňlanýan aýdym-sazlar baýramçylyga özboluşly öwüşgin çaýýar.
“Ylym” binasy ýurdumyzyň ylmynyň ösmeginiň, onuň häzirki döwürde gazananlarynyň, bu örän möhüm ulgamyň hil taýdan täze, dünýä derejesine çykarylandygynyň aýdyň alamatyna öwrüler.
Binanyň ýerden ýokarlygyna umumy beýikligi 36 metrdir. Onuň aşakdan ýokarlygyna uzalyp gidýän aýratyn binagärlik usulynda ýerine ýetirilen sütünleri ýokarky umumy binada birleşýär, ýokarky böleginiň açylan gülleriň keşbini ýatladýan görnüşde gurulmagy Berkarar döwletimiziň bagtyýarlyk döwründe türkmen ylmynyň gülläp ösýändigini beýan edýär. Binanyň ýokarky böleginde Gün ulgamynyň 9 planetasynyň görnüşi şekillendirilendir.
Häzirki wagtda hormatly Prezidentimiz Gurbanguly Berdimuhamedowyň başlangyjy bilen we ýolbaşçylygynda milli ylym ulgamynda amala aşyrylýan toplumlaýyn özgertmeler netijesinde Türkmenistanda ylym ulgamy kuwwatly ösüşe eýe boldy. Milli Liderimiz ylma ýurdumyzy innowasiýa taýdan mundan beýläk-de ösdürmegiň ygtybarly binýady hökmünde garaýar. Häzirki döwrüň şertlerinde ylym islendik döwletiň we jemgyýetiň ösüşiniň aýrylmaz bölegi bolup durýar. Berkarar döwletimiziň bagtyýarlyk döwründe Türkmenistanda ylym ulgamyny ýokary halkara ölçeglerine laýyklykda kämilleşdirmäge gönükdirilen milli maksatnamalar üstünlikli durmuşa geçirilýär, onuň gazananlary ýurdumyzyň ykdysadyýetinde netijeli peýdalanylýar. Ýurdumyzyň ylmyny ösdürmäge we onuň maddy-enjamlaýyn binýadyny pugtalandyrmaga gönükdirilen çäreler yzygiderli geçirilýär, bu bolsa öz netijesini berýär.
Ylym we ýokary tehnologiýalar ugry boýunça hyzmatdaşlyk Türkmenistanyň daşary syýasat strategiýasynyň ileri tutulýan ugurlarynyň biridir, ýurdumyz bu ugurda öňdebaryjy daşary ýurt ylmy merkezleri bilen gatnaşyklaryny işjeň pugtalandyrýar. Netijede, Watanymyzyň dünýä ylmyndaky, şeýle hem tutuşlygyna halkara derejesindäki abraýy yzygiderli ýokarlanýar.
Şeýlelikde, Watanymyzyň mundan beýläk-de gülläp ösmegine gönükdirilen we ählumumy ösüşiň wezipelerine laýyk gelýän netijeli ylmy işi alyp barmak üçin ähli zerur şertler döredilýär.
Şol wagtda täze binalaryň açylyşy mynasybetli guralýan dabara paýtagtymyzyň Berkararlyk we Köpetdag etraplarynyň araçäginde gurlan täze binanyň açylyş dabarasy bilen dowam etdi. Paýtagtymyzyň häkimlikleriniň, ugurdaş edaralaryň, şeýle hem mekdep okuwçylarynyň we hormatly ýaşulularyň gatnaşmagynda geçirilen bu dabaranyň şowhuny belent boldy.
Aýdym-sazlara, şadyýan tanslara beslenen baýramçylyk dabaralary Arçabil şaýoly bilen B.Annanow köçesiniň çatrygynda gurlan “Ak bugdaý” binasynyň şanyna ýaýbaňlandyrylan dabaralaryň üstüni ýetirdi. Dabara gatnaşyjylaryň hatarynda ýurdumyzyň oba, senagat toplumynyň işgärleri, gallaçylar, yhlasly zähmeti bilen türkmen saçaklarynyň berekedini artdyrýan kärendeçi daýhanlar bar.
Türkmenistanyň ak bugdaýyň watanydygyny alamatlandyrýan täze binanyň umumy beýikligi 36 metre barabardyr. Onuň ýokarky böleginde iki metr beýikligi bolan altynsow bugdaý sümmülleriniň şekili bar. Ol bäş sany kuwwatly sütün arkaly baglanyşýar. Türkmen halkynyň bitewüligini alamatlandyrýan bu şekil milli ruhy gymmatlygymyz hökmünde asyrlaryň jümmüşinden aşyp, şu günlerimize ýetipdir. Onuň binýadyndaky sekizburçlukdan sekiz küýzeden guýulýan suw bakylygy, mähriban topragyň jomartlygyny aňladýar. Umuman, ägirt uly bugdaý sümmüline meňzeş bu bina geçmişi, şu güni geljek bilen baglanyşdyrýar.
Şeýle hem paýtagtymyzyň Atatürk köçesiniň ugrunda dikeldilen “Sagdynlyk” binasynyň ýanynda baýramçylyk dabaralaryna giň gerim berildi. Oňa Türkmenistanyň saglygy goraýyş we sport toplumynyň wekilleri gatnaşdylar.
Beýikligi 27 metr bolan bu binanyň ýokarsynda 2017-nji ýylda Aşgabatda geçiriljek Ýapyk binalarda we söweş sungaty boýunça V Aziýa oýunlarynyň nyşany şekillendirilipdir. Munuň özi hormatly Prezidentimiz Gurbanguly Berdimuhamedowyň sport ulgamyny ösdürmek boýunça durmuşa geçirýän syýasatynyň anyk netijeleriniň biridir. Paýtagtymyzyň iri sport düzümleriniň golaýynda ýerleşýän bu bina sagdyn türkmen jemgyýetini. milli sportuň gazanýan üstünliklerini we täze belentliklere tarap gyzyklanmalary alamatlandyrýar.
Bu ýerde hem şu gün orta mekdeplerde guralan soňky jaň dabaralaryna gatnaşan ýaşlaryň nurana we bagtly geljege bolan beýik ynamlarynyň nyşany bolan howa şarlarynyň ýüzlerçesi asmana uçuryldy.
Şu gün ýurdumyzyň ýaş raýatlarynyň müňlerçesi mekdeplerde geçilýän sapaklary tamamlap, özbaşdak durmuşa gadam goýmaga girişýärler. Bu wakanyň Aşgabat şäheriniň güni bilen gabat gelmeginde özboluşly many bar. Munuň özi uly başlangyçlary, belent sepgitleri, örän jogapkärli we buýsançly hereketlere bolan batyrgaý çagyryşy alamatlandyrýar. Hut şonuň üçin hem ýaşlaryň bagtyýar geljege bolan arzuwlarynyň şatlyk-şowhuny şäheriň durmuşynda möhüm ähmiýeti bolan binalaryň açylyş dabaralary bilen utgaşdy.
... Şu gün agşamlyk şanly seneler mynasybetli guralýan baýramçylyk dabaralary şatlyk-şowhun bilen dowam etdi. Bitarap Türkmenistan şaýoly bilen Bagtyýarlyk köçesiniň ugrunda dabaraly baýramçylyk ýörişi guraldy. Ýörişiň öňüni uçganaklap duran ahalteke bedewlerine atlanan çapyksuwarlar çekýär. Olaryň yzysüre ýurdumyzyň bäş welaýatyna wekilçilik edýän hormatly ýaşulularyň we kümüş saçly eneleriň oturan ak arabalary barýar.
Ýaşuly nesilleriň wekilleriniň yzy bilen bu ýerde guralan dabara gatnaşýan orta mekdepleriň uçurymlary, sazandalar, folklor toparlary we milli lybasdaky çagalar tans toparlary barýarlar. Olaryň gündogar ertekilerine, gadymy rowaýatlaryň ruhuna çalymdaş taryhy lybasdaky keşpleri baýramçylygya özboluşly öwüşgin çaýdy. Öý ojaklaryň bikesi hasaplanýan nurana gelinler özleriniň milli lybaslary bilen baýramçylyga aýratyn bezeg berdiler. Şeýle hem bu köpdürlüligiň içinde halk tans toparlarynyň, milli ýerine ýetirijileriň saz gurallaryndan çykýan owazlar, tanslaryň joşguny örän belent boldy. Mundan başga-da, Türkmenistanda ýaşaýan dürli milletleriň wekillerinden bolan uçurumylary, gurluşykçylaryň lybasyna giren talyplary görmek bolýar. Olarda türkmen paýtagtynda ýaýbaňlandyrylan özgertmeleriň kuwwaty duýulýar.
Ýurdumyzyň türgenleri, şol sanda hokkeýçiler, ýeňil atletikaçylar, gimnastikaçylar görkezme çykyşlaryny ýerine ýetirýärler. Bu ýerdäki akkkerdeonçylar we deprekçiler toparynyň çykyşy has-da özüne çekiji boldy. Olaryň joşgunly owazlary baýramçylyk ýörişi bilen utgaşyp gitdi. Şunlukda. harby orkestiriň sazandalaryň ýörişi bu çäräniň jemini jemledi.
Dabaraly ýörişe gatnaşyjylaryň hemmesi “Arkadag” binasynyň ýanyna gelenlerinde ýurdumyzyň saýlama döredijilik toparlary bu ýerde özleriniň aýdym-sazly çykyşlaryny ýaýbaňlandyrdylar.
Umuman binanyň ýanyndaky meýdança ussat we höwesjeň artistler üçin çykyş meýdançasyna öwrüldi. Bu ýerde aýdymçylar, sazandalar, tnasçylar özleriniň joşgunly çykyşlary bilen dabara gatnaşyjylary özüne çekdiler. Şeýle hem bu ýerde çeperçlik we amaly-haşam sungatynyň we zergärçiik önümleriniň sergisi guraldy. Olaryň hatarynda žiwopis eserleri has-da görnükli orun eýeledi. Ýaşajyk surtakeşleriň elinden çykan eserlerde baýramçylygyň ajaýyp pursatlary öz beýanyny tapdy. Dünýä belli suratkeşler Rafaeliň, Rembrandtyň, Salwador Daliniň we Bäşim Nuralynyň lybaslaryny geýnen artistleriň bu ýerde peýda bolmagy has-da täsirli boldy.
Meýdançanyň bir künjeginde halk senetkärçiliginiň ýurdumyzyň bäş welaýatyna mahsus önümleri görkezildi. Ol künjek folklor çykyşlarynyň we milli däpleriň esaslaryny emele getirýän ýere öwrüldi. Mälim bolşy ýaly, bu ýörelge häzirki döwürde özüniň ähmiýetini ýitirmän, eýsem ol baýlaşdyrylýar we ösdürilýär. Bu ýerde zenanlar el işlerine meşgul boldular, dokadylar, keşde çekdiler, köýnekleri, tahýalary keşlediler, haly dokadylar, keçe basdylar. Bu zatlaryň hemmesi bagşylaryň owazy bilen utgaşyp gitdi.
Şeýle hem onuň ýanynda sowuk içgileri we dürli tagamlary hödürleýän söwda bölümleri guraldy. Bu ýerde guralan teatrlaşdyrylan çykyşlar ýuwaş-ýuwaşdan köpçülikleýin gezelenje utgaşyp gitdi. Dabaranyň myhmanlary hödürlenýän peşmelerden we ir-iýmişlerden we milli tagamlardan dadyp gördüler. Bu ýerde oturdylan uly monitorlarda baýramçylykda işleýän kameralaryň surata düşürýän şekilleri görünýär.
Hemmeler Aşgabadyň gününe bagyşlanan esasy çärä baýramçylyk konsertine we paýtagtyň keşbine gözellik çaýan täze binalaryň açylyş dabarasyna garaşýarlar. “Arkadag” binasynyň eteginde gurnalan sahnanyň dürli öwüşgünli çyralary öwşün atýar. Şu pursatda alyp baryjy Aşgabat şäheriniň güni we şu gün ýurdumyzda giňden bellenilen “soňky jaň” dabaralaryna bagyşlanan medeni çäreleriň başlanandygyny yglan edýär.
Şu pursatlarda bu ýerde oturdylan monitolarda ak mermerli Aşgabada, onuň täze gurluşyklaryna, ajaýyplyklaryna, ýaş nesilleriň dowam etmeli özgertmeleriniň barşyna bagyşlanan wideofilm görkezilýär. Onuň ýokarsynda bolsa parahatçylygyň, hoşniýetliligiň we bagtyň buşlukçylary bolan ak kepderiler ganat ýaýýarlar...
Soňra bu ýerde Türkmenistanyň Prezidenti Gurbanguly Berdimuhamedowyň orta mekdepleriň uçurumlaryna, mugallymlaryna we ähli bilim işgärlerine “Soňky jaň” mynasybetli iberen Gutlagy okalýar.
Bu ýere ýygnananlar milli Liderimiziň hoşniýetli gutlag sözlerini uly ruhubelentlik bilen diňlediler we şowhunly el çarpyşmalar bilen kabul etdiler. Onda şeýle sözler bar: “Goý, Bitaraplyk we parahatçylyk ýylynda giňden geçirilýän bu dabaralar bagtyýar ýaşlarymyzyň ýüreklerinde ýatdan çykmajak ýakymly duýgulary galdyrsyn!”.
Soňra dabaraly ýagdaýda okuwda we jemgyýetçilik durmuşynda has tapawutlanan uçurymlara hormatly Prezidentimiz Gurbanguly Berdimuhamedowyň adyndan ýörite sowgatlar, Türkmenistanyň Bilim ministrliginiň Hormat hatlary we ajaýyp gül desseleri gowşuryldy.
Orta mekdepleriň uçurumlary öz gezeginde ýurdumyzyň bilim ulgamynyň ösdürilmegi, netijeli işlemek we okamak üçin ähli şertleriň döredilmegi ugrunda yzygiderli alada edýän milli Liderimize öz deň-duşlarynyň adyndan tüýs ýürekden hoşallyk sözlerini aýtdylar.
Ýakyn geljek ýyllarda şu ýylky uçurymlar saýlap alan hünärine eýe bolup, lukman, diplomat, inžener, mugallym, žurnalist, binagär bolup ýetişer. Olar kosmonawtikadan we täzeçil tehnologiýalar ulgamyndan saýlap alan ugurlary boýunça ökde hünärmenler bolar. Bu zatlaryň hemmesi bilim ulgamyna döwlet derejesinde möhüm ähmiýet berýän hormatly Prezidentimiziň syýasaty netijesinde amala aşdy. Umumadamzat ösüşiniň yzygiderliligi däl, eýsem, onuň tejribesi hem bu ulgama ilkinji nobatda üns berilmeginiň netijesinde ösüş gazanylýandygyny tassyklaýar. Hut şu pursatlardan döwletimizi dünýä derejesinde ýokary orunlara çykarýan ägirt uly ykdysady galkynyş emele gelýär.
Uçurumlar çykyşynyň ahyrynda milli Liderimize hem-de bu ýere ýygnananlara şu günki şanly wakalar mynasybetli gutlag sözlerini aýtdylar we ýaş nesilleriň döwletimiziň, hormatly Prezidentimiziň ynamyny ödejekdigine ynandyrdylar. Olar kalbynda Watana bolan söýgini pugtalandyrmak, ýurdumyzyň şöhratyny we abraýyny has-de belende götermek ugrunda tagalla etjekdiklerini aýtdylar.
Mälim bolşy ýaly, milli bilim ulgamynda giň möçberli özgertmeler maksatnamasyny durmuşa geçirmek bilen, hormatly Prezidentimiz Gurblanguly Berdimuhamedow bu pudagy beýik maksatnamalary iş ýüzünde durmuşa geçirmek, ýurdumyzyň täzeçil ösüşinde belent maksatlara ýetmegini üpjün edýän esasy kemala getirmek üçin pugta binýada öwürdi.
Diňe bir paýtagtymyzda däl, eýsem, welaýat merkezlerinde, şäherlerde we obalarda iň häzirki zaman öňdebaryjy tehnologiýalary bilen üpjün edilen döwrebap mekdepler, çagalar baglary, sport toplumlary, dynç alyş we döredijilik merkezleri yzygiderli gurulýar. Her ýylda täze okuw toplumlary açylýar. Olarda okamak we wagtyňy peýdaly geçirmek üçin ähli şertler üpjün edilýär.
Dünýäniň öňdebaryjy tejribesini işjeň özleşdirmek arkaly, milli bilim ulgamy halkymyzyň gadymy ruhy däpleri, paýhasly wesýetleri, mähriban Watana bolan söýginiň möhüm şertini emele getirýän gymmatlyklar bilen gurşalandyr. Häzirki döwürde Türkmenistanyň ýaşlary ýokary derejeli bilim almak, hünär saýlamak, öz zehinini we ukybyny açyp görkezmek üçin ähli mümkinçiliklere eýe boldy. Türkmen ýaşlarynyň gazanýan her bir üstünligi ýurdumyzyň buýsanjydyr. Ýurdumyzyň gazanýan üstünlikleri bolsa ýaşlar üçin uly buýsanç, watansöýüjilik mekdebi bolup durýar.
Şunuň bilen baglylykda, türkmen paýtagtynyň ýeten derejesi, rowaçlygy, halkara derejesinldäki abraýy Aşgabadyň ýaş nesilleriniň nurana geljeginiň üpjün edilmegine uly goşantdyr. Şu günki çäräniň Türkmenistanyň mekdeplerinde soňky jaň dabarasy bilent gabat gelmegi has-da ýakymlydyr. Şunda mekdebi tamamlaýan uçurymlaryň öňünde ajaýyp durmuş ýoluny kesgitlemek wezipesi durýar. Şanly wakalaryň goşalanyp gelmegi hoşniýetlilikden, bagtyýarlykdan we Diýarymyza, paýtagtymyza bolan uly buýsançdan nyşan.
Aşgabat şäheriniň güni we täze binalaryň açylmagy hem-de okuw ýylynyň tamamlanmagy mynasybetli “Arkadag” binasynyň ýanyndaky meýdançada sungat ussatlarynyň gatnaşmagynda baýramçylyk konserti boldy.
Bu ýerde meşhur döredijilik toparlary, belli estrada aýdymçylary we ýaş ýerine ýetirijiler hem-de tansçylar belent ruha beslenen çykyşlary ýaýbaňlandyrdylar. Mähriban Watanymyza, Berkarar döwletimiziň bagtyýarlyk döwrüne, hormatly Prezidentimiz Gurbanguly Berdimuhamedowyň –Arkadagyň durmuşa geçirýän beýik işlerine bagyşlanan aýdym-sazlar Aşgabadyň tyllaýy agşamlarynda has-da belent ýaňlandy. Sungat ussatlary özleriniň ajaýyp eserleriniň üsti bilen milli Liderimiziň alyp barýan bimöçber işleriniň ýurdumyzyň täze taryhynda gazanylýan üstünlikler bilen baglanyşyklydygyny wasp etdiler. Şeýle hem aýdymçylar mekdep ýyllary hakyndaky, ajaýyp türkmen paýtagtyna, adamzadyň beýik duýgularyna we mähriban topragymyzyň gözelligine bagyşlanan ajaýyp aýdymlary ýerine ýetirdiler.
“Arkadag” binasynyň gaýa şekilindäki binýadynda ýagtylyk emele gelip, onda ýurdumyzyň tebigy aýratynlyklaryna, dag etekleriniň, sähralaryň gözelligine, hormatly Prezidentimiziň başlangyjy bilen amala aşyrylýan beýik işlere bagyşlanan wideoşekiller görkezildi.
Munuň özi türkmen tebigatynyň ajaýyplyklaryny, her bir adamyň kalbyna gozgalaň salýan mähriban topragyň aýratynlyklaryny özünde jemleýän şekillerdir. Çünki topragymyza, tebigatymyza bolan guwanç duýgusy, özüňi tebigatyň bir bölegi hasaplamak we bu sazlaşygyň üpjün edilmegine bolan jogapkärçiligiňe düşünmek watansöýüjilik ýörelgeleriniň esasyny düzýär. Hut şol ýörelgeden hakyky raýatyň, şahsyýetiň terbiýesi başlanýar. Türkmen halkynyň milli ýörelgesiniň esasyny duüzýän bu başlangyç müňýyllyklaryň dowamynda kalplarda daşgy gurşaw bilen sazlaşaykda ýaşamak, onuň her bir damja suwuna, her bir ösümligine, her bir gözellige aýawly çemeleşmek we şeýle sazalaşykda gaýtalanmajak sungat eserine çalymdaş, deňi-taýy bolmadyk ahalteke bedewlerini döretmek endigi ýüze çkypdyr.
Bu ýörelge milli Liderimiz Gurbanguly Berdimuhamedowyň Türkmenistanyň ajaýyp tebigy baýlyklaryny tutuş halkyň gullugyna gönükdirilmegini, onda ýere bolan netijeli, oýlanyşykly we aladaçyl çemeleşmäni başarýan ýer eýesiniň tapylmagyny nazarlaýan syýasatynyň esasyny düzýär. Häzirki döwürde munuň özi durnukly ösüşiň esaslaryny, milli gymmatlyklar ulgamynda bosla ahlak aýratynlyklaryny emele getirýär.
Konserte gatnaşyjylaryň hemmesiniň bielikde ýerine etirmeginde berkarar döwletimiziň bagtyýarlyk döwründe, mähriban Watanymyza we Arkadagymyza bagyşlanan aýdymyň ýaňlanmagy dabaranyň jemini jemledi.
Aşgabat şäheriniň güni, täze binalaryň açylyşy hem-de ýurdumyzyň mekdeplerinde guralan “soňky jaň” dabaralary baýramçylyk feýerwerkine ulaşyp gitdi. Olar paýtagtymyzyň owadan gijesinde älemgoşar öwüşginli şekilleri döredip, dabara gatnaşyjylarda ýatdan çykmajak täsir galdyrdy. Ýyldyzlara beslenen asmanda emele gelýän köp öwüşginli şekiller şu günki guralan baýramçylyklaryň belent dabarasyny has aýdyňlygy bilen äşgär etdi.
Binalaryň açylyş dabarasy paýtagtymyzyň Bagtyýarlyk şaýolunyň çatrygyndaky halkalaýyn ulag ýolunyň merkezinde gurlan “Arkadag” binasynyň açylmagy bilen başlandy.
Säher bilen bu künjege Türkmenistanyň Mejlisiniň Başlygy, hökümet agzalary, ministrlikleriň, pudaklaýyn düzümleriň, harby we hukuk goraýjy edaralaryň ýolbaşçylary, welaýatlaryň we Aşgabat şäheriniň häkimleri, daşary ýurtlaryň Türkmenistanda işleýän diplomatik wekilhanalarynyň, halkara guramalarynyň baştutanlary, daşary ýurtly işewürler, jemgyýetçilik guramalarynyň, köpçülikleýin habar beriş serişdeleriniň wekilleri, döredijilik işgärleri, hormatly ýaşulular we ýaşlar ýygnandylar.Dabara gatnaşyjylaryň hatarynda paýtagtymyzyň ilaty, şu gün şanly wakany baýram edýän mekdepleriň uçurymlary bar.
Hemmeleriň ellerinde ajaýyp bahar gülleri, dürli baýdaklar we howa şarlary bar. Türkmen halkynyň milli buýsançlarynyň biri bolan ýaşyl baýdaklar- asmanda pasyrdaýar. Mahlasy, bu ýerde ýokary watansöýüjilik ruhuna hem-de ildeşlerimiziň ajaýyp paýtagtymyza bolan buýsanjyna beslenen giň möçberli baýramçylyk ýagdaýy emele geldi.
Dabara geçirilýän ýerde Türkmenistanyň Döwlet senasy ýaňlanýar. Bu ýere ýygnananlar Döwlet senasynyň sözlerini agzybirlik bilen alyp göterýärler.
Soňra taryhy waka mynasybetli guralýan dabarany alypbaryjy şu günki çärä gatnaşýan ýaşuly R.Geldiýewe söz berýär. Mälim bolşy ýaly, ýaşulular türkmen jemgyýetinde görnükli orun eýeleýär, il sylagly aksakgallar hemişe halk arasynda uly abraýdan peýdalanýarlar. Ol watandaşlarymyzyň adyndan çykyş etmek bilen, Watanymyzyň abadançylygy ugrunda tutuş halkymyzyň bagtyýarlygyny nazarlaýan oňyn syýasaty alyp barýan hormatly Prezidentimiz Gurbanguly Berdimuhamedowa tüýs ýürekden alkyş sözlerini aýtdy. Ýurdumyzda ýaýbaňlandyrylan we halkymyzyň ýokary durmuş derejesini, döredijilikli işlemegini we göwnejaý dynç almagyny üpjün edýän şäher gurluşyk maksatnamasy yzygiderli durmuşa geçirilýär.
Hormatly ýaşulynyň belleýşi ýaly, Bagtyýarlyk döwründe türkmeniň toýy goşa-goşadan gelýär. Munuň özi Aşagbat şäheriniň güni bilen “Soňky jaň” dabaralarynyň utgaşmagyny emele getirýär. Şu gün hem Ak şäherimiz Aşgabadyň gününde täze gurlan Arkadag binasyny dabaraly ýagdaýda açýarys. Hormatly Prezidentimizi, türkmen halkyny şu goşa toý bilen tüýs ýürekden gutlaýaryn diýip, ýaşuly belledi.
Hormatly Prezidentimiz Gurbanguly Berdimuhamedow döwlet başyna geçen gününden “Meniň bar aladam halkym bolar” diýipdi. Hakykatdan şol günden başlap, eziz Arkadagymyz özüniň bar işini diňe halky üçin alyp bardy diýip, ýaşuly aýtdy. Hormatly Prezidentimiz gijesini gündiz edip, gysga wagtyň içinde ata Watanymyzyň abraýyny arşa göterdi. Indi, Garaşsyz Bitarap Türkmenistan döwletini, türkmen halkyny bütin dünýä tanaýar. Hormatly Prezidentimiz öz halkyny ylymly, bilimli bolmagyny üpjün etmek üçin çagalar baglaryny, orta we ýokary mekdeplerini, adamlaryň saglygy üçin sport desgalaryny, eşretli durmuşda ýaşamaklary üçin ähli amatlykly ýaşaýyş jaýlaryny, saglyk öýlerini, şypahanalary, hassahanalary, seýilgähleri, beýik-beýik binalary, köpugurly köprüleri, aýdyň ýollary gurup berdi.
Bularyň hemmesi eziz Arkadagymyzyň öz halky hakynda edýän atalyk aladasy netijesi bina edilen desgalardyr diýip, hormatly ýaşuly aýtdy. Bu aladalar üçin halkymyz hormatly Prezidentimize “Arkadagymyz” diýip ýüzlenýär diýip, ýaşuly sözüni dowam etdi. Hormatly Prezidentimiz şol ada halkymyzyň söýgüsini gazanmak bilen mynasyp boldy. Şu bina gurulmazdan öň, onuň guruljak ýerini maslahatlaşdyk. Şol maslahata biz ýaşulular hem gatnaşdyk. Täze binany gurmak üçin şu ajaýyp künjek saýlanyp alyndy. Bu bina hormatly Prezidentimiziň türkmen halky bilen bitewiligini, agzybirligini aňladýan binadyr. Halkymyz şu binanyň açylyşyna gatnaşýar. Ýene-de bir aýtmaly zat, bu binanyň sag tarapyndan seretseň, gözel Köpetdag görünýär, beýleki tarapdan ajaýyp gözel Aşgabadymyz görünýär.
Şu gün Türkmenistanyň ähli künjeklerinde hormatly Prezidentimiziň gurup beren ak mermerli mekdeplerinde ýaşlarymyzyň okuwlaryny tamamlap, özbaşdak durmuşa gadam basýandygyny aňladýan soňky jaň dabaralary geçirilýär.
Baý durmuş tejribesi bolan ýaşuly ýurdumyza hem-de halkara syýasy, işewür, medeni we syýahatçylyk merkezi hökmünde ykrar edilýän paýtagtymyza bolan buýsanç duýgularynyň ýaşlarda watansöýüjilik hem-de ahlak ýörelgelerini kemala getirmek üçin ägirt uly ähmiýetiniň bardygyny belledi.
Ýaşuly bu ýere ýygnananlary şanly wakalar bilen gutlady we ýurdumyzda düýpli özgertmeler maksatnamasyny amala aşyrmak bilen, hormatly Prezidentimiz Gurbanguly Berdimuhamedow tutuş türkmen topragynyň galkynmagy üçin giň mümkinçilikleri döretdi diýip nygtady. Bu tagallalar häzirki döwürde özüniň miwesini we oňyn netijelerini berýär. Bu bolsa Türkmenistanyň dünýä ýüzündäki abraýynyň ýokary galmagyny şertlendirýär. Ählii özgertmeleriň gözbaşynda bolsa ýurdumyzyň paýtagty durýar.
Dabaranyň barşynda Türkmenistanyň Demokratik partiýasmynyň başlygy K.Babaýew şu günki baýramçylyk çäreleri mynasybetli gutlag sözleri bilen çykyş etdi.
Şu gün Garaşsyz Bitarap Watanymyzda ak mermerli, Ginnesiň rekordlar kitabyna giren Aşgabat şäherimiziň güni giňden bellenilip geçilýär. Türkmen halky asyrlar boýy özüniň beýik şahsyýetlerine, liderlerine, serkerdelerine, halka hyzmat etmekde beýik işleri bitiren adamlaryna uly hormat bilen garaýar. Biziň mähriban Arkadagymyz özüniň ähli başlangyçlarynda türkmen halkynyň geçmişinde, biziň halkymyzyň gazananlaryna aýawly garamak, hormat bilen garamak ýörelgelerine eýerýär. Biziň hemmämize türkmeniň geçmişine, gazananlaryna, medeni mirasymyza, däbimize, dinine, dessuryna, Watanymyzyň gazananlaryna hormat bilen garamagyna ündeýär. Ýurdumyzda Berkarar döwletimiziň bagtyýarlyk döwründe asyrlara barabar ägirt uly işler durmuşa geçirilýär, biziň halkymyz bagtyýar durmuşda ýaşaýar diýip, TDP-niň başlygy aýtdy.
Mähriban Arkadagymyz, biziň ýurdumyzy dünýäde iň bagtyýar adamlaryň ýaşaýan ýurduna öwürmek baradaky başlangyçlary öňe sürdi. Häzirki döwürde ýurdumyzyň hakykatdan-da, görlüp-eşidilmegdik derejelere ýetdi. Bu gün türkmen halkyny bütin dünýä tanaýar. Bu gün türkmenler bütin dünýäde özüniň parahatçylyk söýüjilik ideýalary bilen mähriban Arkadagymyzyň baştutanlygynda gülläp ösýän döwleti gurýar.
Döwürler geçer Berkarar döwletimiziň bagtyýarlyk döwründe gurlan beýik binalar, zawod fabrikler, durmuşa geçirilen ägirt uly taslamalar, şeýle hem halkara gaz geçirijileri we demir ýollary, "Awaza" milli syýahatçylyk zolagy we beýlekiler nesillerimize hyzmat eder.
Özüniň göwrümi boýunça hem gerimi boýunça şu günki we geljekki nesillere asyrlaryň dowamynda hyzmat etjek taslamalar durmuşa geçirilýär.
Şonuň üçin hem öz Arkadagyna buýsanýan türkmen halky geçen ýyl jemgyýetiň dürli gatlaklarynda Arkadag binasyna Aşgabat şäheriniň iň gözel ýerleriniň birinde gurmak teklibini öňe sürdi diýip, TDP-niň başlygy aýtdy. Bu teklip ählihalk tarapyndan giňden goldanyldy. Sebäbi, döwletimiziň ähli mümkinçiliklerini adamyň hemmetaraplaýyn abadan ýaşamagyna gönükdirýän Arkadagymyzyň “Döwlet adam üçindir!” diýip alyp barýan işleriniň aňyrsy-bärsi ýok. Şu günki açylýan Arkadag binasy biziň halkymyzyň milli Liderimiziň daşynda jebisliginiň nyşanydyr. Bu biziň asuda, abadan, bedew bady bilen öňe barýan Türkmenistanyň şu günki keşbidir.
Ol özüniň çykyşynda döwletimiziň we paýtagtymyzyň ösüşinde, Aşgabadyň dünýäniň syýasy, işewür we medeni merkezi hökmünde ykrar edilmeginde, hormatly Prezidentimiziň ägirt uly tagallasynyň bardygyny belledi we ýurdumyzyň jemgyýetçilik guramalarynyň adyndan milli Liderimize tüýs ýürekden alkyş sözlerini aýtdy.
Soňra Türkmenistanyň Goranmak ministrliginiň Harby institutynyň serkerdesi, uly leýtenant B.Dädebaýew bu ýere ýygnananlary ýurdumyzda giňden bellenilýän Aşgabat şäheriniň güni hem-de “Arkadag” binasynyň açylmagy bilen tüýs ýürekden gutlady we Garaşsyz hemişelik Bitarap Türkmenistan döwletiniň täze taryhy eýýamda bedew bady bilen öňe barýandygyny belledi. Şeýle hem ol milli Liderimiz Gurbanguly Berdimuhamedowyň alyp barýan içeri we daşary syýasaty netijesinde ýurdumyzyň durmuşynyň ähli ugurlarynda uly üstünlikleriň gazanylandygyny aýtdy. Şunlukda döwrebap bilimli ösüp gelýän ýaş nesli kemala getirmekde, şol bir wagtyň özünde halk hojalygyny we ýurdumyzyň Ýaragly Güýçleriniň düzümlerini kämil hünärmenler bilen üpjün etmekde ähli mümkinçilikler döredilýär diýip, ol sözüni dowam etdi.
Watanymyza halkymyza şöhrat getiren mähriban Arkadagymyzyň öňe sürýän ajaýyp başlangyçlary bilen ýurdumyz gün-günden gülläp ösýär. Bitaraplyk we parahatçylyk ýyly ýene-de bir taryhy waka bilen dabaralandyrylýar. Gözel paýtagtymyzyň güni “Arkadag” binasynyň hem-de birnäçe beýleki binalaryň açylyş dabaralary bilen utgaşýar.
Şeýle hem ýaş serkerde ýurdumyzyň mundan beýläk-de gülläp ösmeginiň, Watanymyzyň goranmak kuwwatynyň pugtalanmagynyň, watansöýüji, hemmetaraplaýyn ukyply ýaşlaryň taýýarlanmagynyň bähbidine ähli tagallalaryny gaýgyrmajakdygyna ynandyrdy. Ýaş serkerde kaşaň binanyň ýanyndaky meýdança çykarylan Ýaşyl tugumyzyň syýyndan öpüp, Watana wepalylyk kasamyny aýtdy.
... Bu ýerde “Arkadag” binasynyň açylmagy mynasybetli guralan dabara türkmen ýaşlarynyň wekilleriniň biriniň çykyşy bilen dowam etdi.
D.Azady adyndaky Türkmen milli dünýä dilleri institutynyň üçünji ýyl talyby T.Bäşimowa häzirki döwürde ýaşlaryň hemmetaraplaýyn sazlaşykly ösmegi, dünýä ylmyna çuňňur aralaşmagy ugrunda ähli zerur şertleriň döredlilýändigi üçin hormatly Prezidentimize türkmen ýaşlarynyň adyndan alkyş sözlerini aýtdy. Şeýle hem ol ýokary bahalar bilen okap, Watanymyz, il-günümiz üçin gerekli hünärmenler bolup ýetişjekdiklerine ynandyrdy.
Bagtyýar durmuşyň hatyrasyna döretmek, gurmak başlangyçlary, belent ynsanperwerlik ýörelgeleri aýdyň maksatlary bilen Berkarar döwletimiziň bagtyýarlyk döwründe Watanymyzyň her bir güni uly ösüşlere taryhy wakalara beslenýär diýip, ol nygtady. Biziň ýüregimiz mydama eziz Watanymyz, Gahryman Arkadagymyz diýip urýar. Berkarar döwletimiziň bagtyýarlyk döwrüniň dünýäde iň bagtly ýaşlardygymyza buýsanýarys. Milli Liderimiziň hemişelik Bitarap Türkmenistan we halkymyzyň bähbidi ugrunda ägirt uly işelri bitirýär. Arkadagymyzyň bilimli, hemmetaraplaýyn ýaş nesilleri kemala getirmek, ýaşlaryň sazlaşykly ösüşini üpjün etmek, Garaşsyz, bitarap Watanymyzyň mundan beýläk-de gülläp ösmeginiň, mähriban halkymyzyň bagtyýar durmuşynyň we beýik geljeginiň bähbidine ýokary hünärli işgärleri taýýaralmak baradaky aladalary bilen gurşalandygymyz üçin biz örän bagtlydyrys.
Soňra ýurdumyzyň Ministrler Kabinetiniň Başlygynyň orunbasary M.Ýazmuhammedowa bu ýere ýygnananlary Aşgabat şäheriniň güni we “Arkadag” binasynyň açylmagy bilen gutlady. Wise-premýer häzirki döwürde gönüden-göni milli Liderimiziň tagallasy bilen Köpetdagyň howalanýan gerişlerinden Garagumyň tylla çaýylan gujagyna çenli uzap gidýän Aşgabadyň gün-günden ösýändigini, paýtagtymyzyň dünýäniň ösen şäherleriniň hatarynda öz ornuny pugtalandyrýandygyny aýdyp, bu babatda döwlet Baştutanymyzyň taýsyz tagallasynyň bardygyny nygtdy.
Wise-premýer ähli amatlyklary özünde jemleýän Aşgabada dünýäniň dürli ýurtlarynyň, işewür toparlarynyň gyzyklanmalarynyň barha ýokarlanýandygyny, paýtagtymyzyň syýasy, parahatçylyk döredijilik we medeni merkez hökmünde ykrar edilýändigini aýdyp, munuň “Arkadag” binasynyň tutuş halkymyzyň milli Liderimize bolan alkyşynyň, söýgüsiniň nyşanydygyny belledi.
Milli Liderimiziň heýkeliniň köňülleriň ganatyna deňelýän behişdi bedewiň üstünde şekillendirilmegi aýratyn many-mazmuna eýedir. Bu heýkelde mähriban Prezidentimiziň aýdyň hem ak ýoly bilen bedew badyna beslenen şu günümiz, nurana geljegimiz aýdyň beýanyny tapýar. Hormatly Prezidentimiziň eline gonan ak kepderiniň keşbi bolsa parahatçylygyň, asudalygyň, bagtyýarlygyň nyşanyny dabaralandyrýar we bu Bitaraplyk we parahatçylyk ýylynyň ruhuna kybap gelýär. Wise-premýer şeýle hem şu gün paýtagtymyzda açylýan, her biriniň özboluşly aýratynlygy bolan, emma umumy many-mazmun bilen utgaşýan ýene-de birnäçe binalaryň açylýandygyny aýtdy.
Soňra dabarany alyp, baryjy Türkmenistanyň Mejlisiniň Başlygy A.Nurberdiýewa söz berdi. Milli parlamentiň ýolbaşçysy Aşgabadyň her bir ösüşiniň, gazanýan üstünlikleriniň we dünýädäki belent abraýynyň hormatly Prezidentimiziň ady bilen berk baglanyşyklydygyny nygtady.
Soňra dabaranyň barşynda Türkmenistanyň Mejlisiniň Aşgabatda “Arkadag” binasyny açmak hakyndaky Karary okalýar.
Hususan-da, onda bu binanyň ýurdumyzyň köpsanly zähmetkeşler toparlaryndan, ýerli häkimiýet, jemgyýetçilik guramalaryndan hem-de Türkmenistanyň köpsanly ilatyndan gelip gowşan haýyşnamalaryň, teklipleriň esasynda gurlandygy aýdylýar. Munuň özi halkymyzyň Watanymyzyň abadançylygynyň bähbidine bimöçber tagalla edýän milli Liderimize bolan hormatynyň we ägirt uly sarpasynyň aýdyň nyşanydyr.
Dabara gatnaşyjylaryň şowhunly el çarpyşmalary astynda ajaýyp binanyň toý bagy kesilýär. Şu pursatda ak kepderiler bilen ýüzlerçe howa şarlary asmana göterilýär. Şunlukda, “Arkadag” binasy açylýar.
Bu binanyň keşbinde häzirki döwrüň nyşanyny alamatlandyrýan özboluşlylyk bar. Ajaýyp bedewe atlanan milli Liderimiziň şekili ýurdumyzyň ösüşlere tarap batly gadamyny alamatlandyrýar. Arkadagyň ýokary göterilen sag eline gonan kepderiniň şekillendirilmegi hormatly Prezidentimiz Gurbanguly Berdimuhamedowyň parahatçylyk söýüjilik syýasatyny hem-de Türkmenistanyň halkara giňişligindäki ornuny pugtalandyrýan we täsirini artdyrýan Bitaraplyk derejesini äşgär edýän görnüşi emele getirýär.
Bu binanyň awtory, Türkmenistanyň halk suratkeşi, heýkeltaraş Saragt Babaýew tutuş halkymyz üçin tanyş bolan pursady esas edinipdir. Bir gezek Türkmen bedewiniň baýramy mynasybetli döwlet Baştutanymyz ahalteke bedewine atlanyp, çapuw ýodasyna çykanynda, milli Liderimiziň egnine ak kepderi gondy. Şeýle görnüşe dünýäniň halklary gadymy döwürlerden bäri Hudaý tarapyn ýalkanmak diýip düşünýärler. Şol pursatda watandaşlarymyzyň ýurdumyzy ösüşiň belentliklerine tarap alyp barýan milli Liderimize bolan buýsanjynyň çägi bolmady.
... Bu desganyň umumy beýikligi onuň bir bitewi gaýany alamatlandyrýan binýadyny hasaba alanyňda 21 metre barabardyr. Gaýa şekilli binýadyň üstünde bolsa beýikligi 6 metr bolan Türkmenistanyň Prezidentiniň altyn öwüşginli ahalteke bedewine atlanan şekili oturdylypdyr.
Bu binanyň esasy manysy türkmen döwletliliginiň, Garaşsyzlygynyň, oňyn Bitaraplygynyň, şöhratly pederlerimiziň asylly ýörelgeleriniň, Berkarar döwletimiziň bagtyýarlyk döwrüniň döredijilik, erkinlik, özgeriş nyşanyny özünde jemleýär. Bu düşünjeler binanyň düýp özenini düzýär hem-de Türkmenistanyň beýik maksatlara, ösüşlere tarap ýoldaky ägirt uly üstünliklerini alamatlandyrýar.
“Arkadag” binasynyň gaýa şekilli binýadynda soňky ýyllarda Türkmenistanda döredilýän binagärlik-çeperçilik desgalarynyň esasy keşbini emele getirýän Oguzhanyň sekizburçly ýyldyzy ýerleşdirilipdir. Bu çuňňur manysy we taryhy kökleri bolan köptaraply nyşan halkymyzyň milletiň nesilbaşysy, ady rowaýata öwrülen Oguzahana bolan beýik sarpasydyr. Häzirki döwürde bu nyşan geçmişi, häzirki döwri we geljegi baglanyşdyrýan möhüm alamatdyr. Türkmen halkynyň, mähriban Watanyň azatlygy ugrunda göreşen pederlerimiziň ýurdumyzyň gülläp ösmegi hakynda eden arzuwlary hormatly Prezidentimiz Gurbanguly Berdimuhamedowyň döredijilikli syýasaty netijesinde hasyl boldy. Onda halkymyzyň Türkmenistanyň häzirki döwri hakyndaky nurana arzuw-umytlary, pederlerimiziň ýurdumyzyň daşary we içeri syýasatynda täze mazmuna ese bolan paýhasly wesýetleri, gazanýan üstünliklerimiz, ýeten derejämiz, batyrgaý meýilnamalarymyz we çözgütlerimiz öz beýanyny tapýar.
Biziň taryhy köklerimiz täze taryhy eýýamda ýurdumyzyň bagtyýar geljeginiň ygtybarly binýadyny emele getirdi.
Soňra baýramçylyk dabaralary “Abadançylyk” adyna eýe bolan kaşaň binanyň açylyşy bilen dowam etdi. Bu özboluşly bina paýtagtymyzyň Köpetdagyň etegindäki gözel künjekleriniň birinde, Arçabil we Çandybil şaýollarynyň çatrygynda guruldy. Ol abadançylygy, Berkarar döwletimiziň bagtyýarlyk döwründe uly ösüşlere beslenen türkmen topragynyň parahatçylygyny alamatlandyrmak bilen, bu künjegiň binalaryna utgaşdy.
Bu ýerde taryhy waka we şanly sene mynasybetli çagalaryň we ýetginjekleriň aýdym-sazly çykyşlary ýaýbaňlandyryldy.
Binanyň umumy belentligi 47 metr bolup, onuň sütüni bäş bölekden ybaratdyr. Binanyň ýokarsynda bäş sany kepderiniň şekili ýerleşdirilen Ýer şary bar. Binanyň sütünleriniň ýokarky bölegi milli şekiller bilen bezelen halka arkaly baglanyşýar. Munuň özi bir bitewüligi, agzybirligi alamatlandyrýar. Ýurdumyzyň her bir welaýatyna mahsus göller we bezeg aýratynlyklary bilen gurşalan sütünler bäş welaýatyň bitewüliginiň baş nyşanyny düzýär.
Türkmen halkynyň parahatçylyk söýüjilik we dostluk ýörelgelerini alamatlandyrýan kepderiler Garaşsyz, Bitarap Türkmenistanyň halkara giňişliginde dostluk hem-de netijeli hyzmatdaşlyk gatnaşyklarynyň ösdürilmegine gönükdirilen we dünýä bileleşiginiň giň ykrarnamasyna hem-de goldawyna eýe bolan döredijilikli syýasatynyň esasyny düzýän döwletimiziň özygtyýarlylygynyň, gülläp ösüşiniň, halkymyzyň bagtyýarlygynyň nyşanlaryny özünde jemleýär. 26 müň inedördül metr meýdany bolan bu binanyň yşyklandyryjylar bilen üpjün edilen we bezeg sütünleri bolan suw çüwdürimleri onuň kaşaňlygyny artdyrýar.
Binanyň dört tarapyndan ýerasty pyýada geçelge gurlupdyr. Onuň ýanaşyk ýerleri abadanlaşdyrylypdyr, bu ýerde giň meýdany bolan gök zolak dörediler.
Hormatly Prezidentimiziň paýhasly ýolbaşçylygynda parahatçylygyň, abadançylygyň we gülläp ösüşiň ýoly bilen ynamly gadam urýan mähriban Watanymyza bolan beýik buýsanjy äşgär edýän çykyşlar baýramçylygyň şowhunyny artdyrdy. Onda ýaşajyk artistler dünýäniň dürli dillerinde goşgular okadylar, aýdymlar aýtdylar. Olaryň çykyşlary hormatly Prezidentimize bolan alkyş senasy bolup ýaňlandy.
Dabaraly pursat gelip ýetdi. Ýüzlerçe ak şarlar we kepderiler asmana uçuryldy. Şeýlelikde, “Abadançylyk” binasy açyldy.
Bu şanly waka mynasybetli bu ýerde ýaş ýerine ýetirijileriň we folklor toparlarynyň çykyşlary dowam etdi. Dabara gatnaşyjylara ýörite baýramçylyk mynasybetli taýýarlanylan toý pişmeleri hödür edildi.
Paýtagtymyzyň Bagtyýarlyk we Oguzhan köçeleriniň çatrygynda bina edilen “Ýyldyz” binasynyň açylyş dabarasy baýramçylyk çärelerini dowam etdi. Şu günki baýramçylyk gününde bu ýerde ählumumy ýokary göteriliş we şatlyk ýagdaýlary emele geldi. Özboluşly binanyň ýanynda guralan dabara hormatly ýaşulular, kümüş saçly eneler, mekdepleriň paýtagtymyzyň köpsanly ýaşaýjylary we myhmanlary gatnaşdylar.
“Ýyldyz” binasy özboluşly binagärlik çözgüdi we gurluş aýratynlygy bilen tapawutlanýar. Onuň umumy beýikligi 36 metre barabar bolup, ýarymaý şekilindäki bäş sany sütünden ybaratdyr. Binanyň esasy bezegi Oguzhanyň sekizburçly ýyldyzy bolup durýar. Sütünler özaralarynda baglanyşyp, bir bitewi gurnamany emele getirýär.
Bu binanyň ýene bir aýratynlygy, oňa kesesinden syn edeniňde, bina ýarymaý şekili alamatlandyrýar, ýokarsyndan bolsa ýyldyz şekilindedir. Täze binanyň tutuşlygyna alnanda, asmana tarap barýan emele hemrany ýatladýandygyny aýratyn bellemeli.
Ýurdumyzyň dünýäniň kosmos döwletleriniň hataryna goşulandygyny alamatlandyran waka Watanymyzyň täze taryhyna has ähmiýetli sahypany ýazdy. Mälim bolşy ýaly, geçen aýyň ahyrynda ABŞ-nyň Florida ştatyndaky Kanaweral burnunyň kosmodromyndan Türkmenistanyň ilkinji “TürkmenÄlem 520E” emeli hemrasy älem giňişligine çykaryldy, ýakynda, 17-nji maýda bolsa ol geostasionar giňişlikde, Ýerden 36 müň kilometr belentlikde gündogar uzaklygyň 52-nji gradusyndaky älem ornuna üstünlikli çykdy. Bitaraplyk we parahatçylyk ýylynda ýurdumyzyň älem giňişligine çykarylan ilkinji emele hemrasyny türkmen döwletiniň tutuş dünýäniň halklaryna iberen dostluk salamy hökmünde atlandyrmak bolar. Şeýle hem munuň özi ýurdumyzyň tutuş adamzadyň bähbidine işjeň halkara hyzmatdaşlygynyň ösdürilmegine bolan gyzyklanmasynyň aýdyň nyşanydyr.
Şeýlelikde, adam eli bilen döredilen “Ýyldyz” binasy mähriban Watanymyzyň hormatly Prezidentimiz Gurbanguly Berdimuhamedowyň paýhasly ýolbaşçylygynda täze taryhy eýýamda gazanýan ägirt uly üstünlikleriniň we ýeten derejesiniň nyşanyny alamatlandyrdy. Onuň adynda hem özboluşly many bar. Bu bina Türkmenistanyň döredijilik ýoly bilen täze üstünlikleriň belentliklerine tarap bolan batly gadamlarynyň özboluşly beýanyny emele getirýär.
Soňra dabaralar açylmagyna garaşýan indiki desganyň ýanynda – Ýanbaş we Bekrewe köçeleriniň kesişýän ýerinde gurlan “Ylym” binasynyň ýanynda dowam edýär. Bu ýerde paýtagtymyzyň häkimliginiň, bilim ulgamynyň we Türkmenistanyň Ylymlar akademiýasynyň wekilleri, şeýle hem hormatly ýaşulular, aşgabatlylar hem-de ýurdumyzyň baş şäheriniň myhmanlary ýygnandylar. Dabara gatnaşýan köpsanly mekdep okuwçylarynyň we talyplaryň ellerinde howa şarlary we ak kepderiler bar, Türkmenistanyň Döwlet baýdaklary pasyrdaýar. Ýaňlanýan aýdym-sazlar baýramçylyga özboluşly öwüşgin çaýýar.
“Ylym” binasy ýurdumyzyň ylmynyň ösmeginiň, onuň häzirki döwürde gazananlarynyň, bu örän möhüm ulgamyň hil taýdan täze, dünýä derejesine çykarylandygynyň aýdyň alamatyna öwrüler.
Binanyň ýerden ýokarlygyna umumy beýikligi 36 metrdir. Onuň aşakdan ýokarlygyna uzalyp gidýän aýratyn binagärlik usulynda ýerine ýetirilen sütünleri ýokarky umumy binada birleşýär, ýokarky böleginiň açylan gülleriň keşbini ýatladýan görnüşde gurulmagy Berkarar döwletimiziň bagtyýarlyk döwründe türkmen ylmynyň gülläp ösýändigini beýan edýär. Binanyň ýokarky böleginde Gün ulgamynyň 9 planetasynyň görnüşi şekillendirilendir.
Häzirki wagtda hormatly Prezidentimiz Gurbanguly Berdimuhamedowyň başlangyjy bilen we ýolbaşçylygynda milli ylym ulgamynda amala aşyrylýan toplumlaýyn özgertmeler netijesinde Türkmenistanda ylym ulgamy kuwwatly ösüşe eýe boldy. Milli Liderimiz ylma ýurdumyzy innowasiýa taýdan mundan beýläk-de ösdürmegiň ygtybarly binýady hökmünde garaýar. Häzirki döwrüň şertlerinde ylym islendik döwletiň we jemgyýetiň ösüşiniň aýrylmaz bölegi bolup durýar. Berkarar döwletimiziň bagtyýarlyk döwründe Türkmenistanda ylym ulgamyny ýokary halkara ölçeglerine laýyklykda kämilleşdirmäge gönükdirilen milli maksatnamalar üstünlikli durmuşa geçirilýär, onuň gazananlary ýurdumyzyň ykdysadyýetinde netijeli peýdalanylýar. Ýurdumyzyň ylmyny ösdürmäge we onuň maddy-enjamlaýyn binýadyny pugtalandyrmaga gönükdirilen çäreler yzygiderli geçirilýär, bu bolsa öz netijesini berýär.
Ylym we ýokary tehnologiýalar ugry boýunça hyzmatdaşlyk Türkmenistanyň daşary syýasat strategiýasynyň ileri tutulýan ugurlarynyň biridir, ýurdumyz bu ugurda öňdebaryjy daşary ýurt ylmy merkezleri bilen gatnaşyklaryny işjeň pugtalandyrýar. Netijede, Watanymyzyň dünýä ylmyndaky, şeýle hem tutuşlygyna halkara derejesindäki abraýy yzygiderli ýokarlanýar.
Şeýlelikde, Watanymyzyň mundan beýläk-de gülläp ösmegine gönükdirilen we ählumumy ösüşiň wezipelerine laýyk gelýän netijeli ylmy işi alyp barmak üçin ähli zerur şertler döredilýär.
Şol wagtda täze binalaryň açylyşy mynasybetli guralýan dabara paýtagtymyzyň Berkararlyk we Köpetdag etraplarynyň araçäginde gurlan täze binanyň açylyş dabarasy bilen dowam etdi. Paýtagtymyzyň häkimlikleriniň, ugurdaş edaralaryň, şeýle hem mekdep okuwçylarynyň we hormatly ýaşulularyň gatnaşmagynda geçirilen bu dabaranyň şowhuny belent boldy.
Aýdym-sazlara, şadyýan tanslara beslenen baýramçylyk dabaralary Arçabil şaýoly bilen B.Annanow köçesiniň çatrygynda gurlan “Ak bugdaý” binasynyň şanyna ýaýbaňlandyrylan dabaralaryň üstüni ýetirdi. Dabara gatnaşyjylaryň hatarynda ýurdumyzyň oba, senagat toplumynyň işgärleri, gallaçylar, yhlasly zähmeti bilen türkmen saçaklarynyň berekedini artdyrýan kärendeçi daýhanlar bar.
Türkmenistanyň ak bugdaýyň watanydygyny alamatlandyrýan täze binanyň umumy beýikligi 36 metre barabardyr. Onuň ýokarky böleginde iki metr beýikligi bolan altynsow bugdaý sümmülleriniň şekili bar. Ol bäş sany kuwwatly sütün arkaly baglanyşýar. Türkmen halkynyň bitewüligini alamatlandyrýan bu şekil milli ruhy gymmatlygymyz hökmünde asyrlaryň jümmüşinden aşyp, şu günlerimize ýetipdir. Onuň binýadyndaky sekizburçlukdan sekiz küýzeden guýulýan suw bakylygy, mähriban topragyň jomartlygyny aňladýar. Umuman, ägirt uly bugdaý sümmüline meňzeş bu bina geçmişi, şu güni geljek bilen baglanyşdyrýar.
Şeýle hem paýtagtymyzyň Atatürk köçesiniň ugrunda dikeldilen “Sagdynlyk” binasynyň ýanynda baýramçylyk dabaralaryna giň gerim berildi. Oňa Türkmenistanyň saglygy goraýyş we sport toplumynyň wekilleri gatnaşdylar.
Beýikligi 27 metr bolan bu binanyň ýokarsynda 2017-nji ýylda Aşgabatda geçiriljek Ýapyk binalarda we söweş sungaty boýunça V Aziýa oýunlarynyň nyşany şekillendirilipdir. Munuň özi hormatly Prezidentimiz Gurbanguly Berdimuhamedowyň sport ulgamyny ösdürmek boýunça durmuşa geçirýän syýasatynyň anyk netijeleriniň biridir. Paýtagtymyzyň iri sport düzümleriniň golaýynda ýerleşýän bu bina sagdyn türkmen jemgyýetini. milli sportuň gazanýan üstünliklerini we täze belentliklere tarap gyzyklanmalary alamatlandyrýar.
Bu ýerde hem şu gün orta mekdeplerde guralan soňky jaň dabaralaryna gatnaşan ýaşlaryň nurana we bagtly geljege bolan beýik ynamlarynyň nyşany bolan howa şarlarynyň ýüzlerçesi asmana uçuryldy.
Şu gün ýurdumyzyň ýaş raýatlarynyň müňlerçesi mekdeplerde geçilýän sapaklary tamamlap, özbaşdak durmuşa gadam goýmaga girişýärler. Bu wakanyň Aşgabat şäheriniň güni bilen gabat gelmeginde özboluşly many bar. Munuň özi uly başlangyçlary, belent sepgitleri, örän jogapkärli we buýsançly hereketlere bolan batyrgaý çagyryşy alamatlandyrýar. Hut şonuň üçin hem ýaşlaryň bagtyýar geljege bolan arzuwlarynyň şatlyk-şowhuny şäheriň durmuşynda möhüm ähmiýeti bolan binalaryň açylyş dabaralary bilen utgaşdy.
... Şu gün agşamlyk şanly seneler mynasybetli guralýan baýramçylyk dabaralary şatlyk-şowhun bilen dowam etdi. Bitarap Türkmenistan şaýoly bilen Bagtyýarlyk köçesiniň ugrunda dabaraly baýramçylyk ýörişi guraldy. Ýörişiň öňüni uçganaklap duran ahalteke bedewlerine atlanan çapyksuwarlar çekýär. Olaryň yzysüre ýurdumyzyň bäş welaýatyna wekilçilik edýän hormatly ýaşulularyň we kümüş saçly eneleriň oturan ak arabalary barýar.
Ýaşuly nesilleriň wekilleriniň yzy bilen bu ýerde guralan dabara gatnaşýan orta mekdepleriň uçurymlary, sazandalar, folklor toparlary we milli lybasdaky çagalar tans toparlary barýarlar. Olaryň gündogar ertekilerine, gadymy rowaýatlaryň ruhuna çalymdaş taryhy lybasdaky keşpleri baýramçylygya özboluşly öwüşgin çaýdy. Öý ojaklaryň bikesi hasaplanýan nurana gelinler özleriniň milli lybaslary bilen baýramçylyga aýratyn bezeg berdiler. Şeýle hem bu köpdürlüligiň içinde halk tans toparlarynyň, milli ýerine ýetirijileriň saz gurallaryndan çykýan owazlar, tanslaryň joşguny örän belent boldy. Mundan başga-da, Türkmenistanda ýaşaýan dürli milletleriň wekillerinden bolan uçurumylary, gurluşykçylaryň lybasyna giren talyplary görmek bolýar. Olarda türkmen paýtagtynda ýaýbaňlandyrylan özgertmeleriň kuwwaty duýulýar.
Ýurdumyzyň türgenleri, şol sanda hokkeýçiler, ýeňil atletikaçylar, gimnastikaçylar görkezme çykyşlaryny ýerine ýetirýärler. Bu ýerdäki akkkerdeonçylar we deprekçiler toparynyň çykyşy has-da özüne çekiji boldy. Olaryň joşgunly owazlary baýramçylyk ýörişi bilen utgaşyp gitdi. Şunlukda. harby orkestiriň sazandalaryň ýörişi bu çäräniň jemini jemledi.
Dabaraly ýörişe gatnaşyjylaryň hemmesi “Arkadag” binasynyň ýanyna gelenlerinde ýurdumyzyň saýlama döredijilik toparlary bu ýerde özleriniň aýdym-sazly çykyşlaryny ýaýbaňlandyrdylar.
Umuman binanyň ýanyndaky meýdança ussat we höwesjeň artistler üçin çykyş meýdançasyna öwrüldi. Bu ýerde aýdymçylar, sazandalar, tnasçylar özleriniň joşgunly çykyşlary bilen dabara gatnaşyjylary özüne çekdiler. Şeýle hem bu ýerde çeperçlik we amaly-haşam sungatynyň we zergärçiik önümleriniň sergisi guraldy. Olaryň hatarynda žiwopis eserleri has-da görnükli orun eýeledi. Ýaşajyk surtakeşleriň elinden çykan eserlerde baýramçylygyň ajaýyp pursatlary öz beýanyny tapdy. Dünýä belli suratkeşler Rafaeliň, Rembrandtyň, Salwador Daliniň we Bäşim Nuralynyň lybaslaryny geýnen artistleriň bu ýerde peýda bolmagy has-da täsirli boldy.
Meýdançanyň bir künjeginde halk senetkärçiliginiň ýurdumyzyň bäş welaýatyna mahsus önümleri görkezildi. Ol künjek folklor çykyşlarynyň we milli däpleriň esaslaryny emele getirýän ýere öwrüldi. Mälim bolşy ýaly, bu ýörelge häzirki döwürde özüniň ähmiýetini ýitirmän, eýsem ol baýlaşdyrylýar we ösdürilýär. Bu ýerde zenanlar el işlerine meşgul boldular, dokadylar, keşde çekdiler, köýnekleri, tahýalary keşlediler, haly dokadylar, keçe basdylar. Bu zatlaryň hemmesi bagşylaryň owazy bilen utgaşyp gitdi.
Şeýle hem onuň ýanynda sowuk içgileri we dürli tagamlary hödürleýän söwda bölümleri guraldy. Bu ýerde guralan teatrlaşdyrylan çykyşlar ýuwaş-ýuwaşdan köpçülikleýin gezelenje utgaşyp gitdi. Dabaranyň myhmanlary hödürlenýän peşmelerden we ir-iýmişlerden we milli tagamlardan dadyp gördüler. Bu ýerde oturdylan uly monitorlarda baýramçylykda işleýän kameralaryň surata düşürýän şekilleri görünýär.
Hemmeler Aşgabadyň gününe bagyşlanan esasy çärä baýramçylyk konsertine we paýtagtyň keşbine gözellik çaýan täze binalaryň açylyş dabarasyna garaşýarlar. “Arkadag” binasynyň eteginde gurnalan sahnanyň dürli öwüşgünli çyralary öwşün atýar. Şu pursatda alyp baryjy Aşgabat şäheriniň güni we şu gün ýurdumyzda giňden bellenilen “soňky jaň” dabaralaryna bagyşlanan medeni çäreleriň başlanandygyny yglan edýär.
Şu pursatlarda bu ýerde oturdylan monitolarda ak mermerli Aşgabada, onuň täze gurluşyklaryna, ajaýyplyklaryna, ýaş nesilleriň dowam etmeli özgertmeleriniň barşyna bagyşlanan wideofilm görkezilýär. Onuň ýokarsynda bolsa parahatçylygyň, hoşniýetliligiň we bagtyň buşlukçylary bolan ak kepderiler ganat ýaýýarlar...
Soňra bu ýerde Türkmenistanyň Prezidenti Gurbanguly Berdimuhamedowyň orta mekdepleriň uçurumlaryna, mugallymlaryna we ähli bilim işgärlerine “Soňky jaň” mynasybetli iberen Gutlagy okalýar.
Bu ýere ýygnananlar milli Liderimiziň hoşniýetli gutlag sözlerini uly ruhubelentlik bilen diňlediler we şowhunly el çarpyşmalar bilen kabul etdiler. Onda şeýle sözler bar: “Goý, Bitaraplyk we parahatçylyk ýylynda giňden geçirilýän bu dabaralar bagtyýar ýaşlarymyzyň ýüreklerinde ýatdan çykmajak ýakymly duýgulary galdyrsyn!”.
Soňra dabaraly ýagdaýda okuwda we jemgyýetçilik durmuşynda has tapawutlanan uçurymlara hormatly Prezidentimiz Gurbanguly Berdimuhamedowyň adyndan ýörite sowgatlar, Türkmenistanyň Bilim ministrliginiň Hormat hatlary we ajaýyp gül desseleri gowşuryldy.
Orta mekdepleriň uçurumlary öz gezeginde ýurdumyzyň bilim ulgamynyň ösdürilmegi, netijeli işlemek we okamak üçin ähli şertleriň döredilmegi ugrunda yzygiderli alada edýän milli Liderimize öz deň-duşlarynyň adyndan tüýs ýürekden hoşallyk sözlerini aýtdylar.
Ýakyn geljek ýyllarda şu ýylky uçurymlar saýlap alan hünärine eýe bolup, lukman, diplomat, inžener, mugallym, žurnalist, binagär bolup ýetişer. Olar kosmonawtikadan we täzeçil tehnologiýalar ulgamyndan saýlap alan ugurlary boýunça ökde hünärmenler bolar. Bu zatlaryň hemmesi bilim ulgamyna döwlet derejesinde möhüm ähmiýet berýän hormatly Prezidentimiziň syýasaty netijesinde amala aşdy. Umumadamzat ösüşiniň yzygiderliligi däl, eýsem, onuň tejribesi hem bu ulgama ilkinji nobatda üns berilmeginiň netijesinde ösüş gazanylýandygyny tassyklaýar. Hut şu pursatlardan döwletimizi dünýä derejesinde ýokary orunlara çykarýan ägirt uly ykdysady galkynyş emele gelýär.
Uçurumlar çykyşynyň ahyrynda milli Liderimize hem-de bu ýere ýygnananlara şu günki şanly wakalar mynasybetli gutlag sözlerini aýtdylar we ýaş nesilleriň döwletimiziň, hormatly Prezidentimiziň ynamyny ödejekdigine ynandyrdylar. Olar kalbynda Watana bolan söýgini pugtalandyrmak, ýurdumyzyň şöhratyny we abraýyny has-de belende götermek ugrunda tagalla etjekdiklerini aýtdylar.
Mälim bolşy ýaly, milli bilim ulgamynda giň möçberli özgertmeler maksatnamasyny durmuşa geçirmek bilen, hormatly Prezidentimiz Gurblanguly Berdimuhamedow bu pudagy beýik maksatnamalary iş ýüzünde durmuşa geçirmek, ýurdumyzyň täzeçil ösüşinde belent maksatlara ýetmegini üpjün edýän esasy kemala getirmek üçin pugta binýada öwürdi.
Diňe bir paýtagtymyzda däl, eýsem, welaýat merkezlerinde, şäherlerde we obalarda iň häzirki zaman öňdebaryjy tehnologiýalary bilen üpjün edilen döwrebap mekdepler, çagalar baglary, sport toplumlary, dynç alyş we döredijilik merkezleri yzygiderli gurulýar. Her ýylda täze okuw toplumlary açylýar. Olarda okamak we wagtyňy peýdaly geçirmek üçin ähli şertler üpjün edilýär.
Dünýäniň öňdebaryjy tejribesini işjeň özleşdirmek arkaly, milli bilim ulgamy halkymyzyň gadymy ruhy däpleri, paýhasly wesýetleri, mähriban Watana bolan söýginiň möhüm şertini emele getirýän gymmatlyklar bilen gurşalandyr. Häzirki döwürde Türkmenistanyň ýaşlary ýokary derejeli bilim almak, hünär saýlamak, öz zehinini we ukybyny açyp görkezmek üçin ähli mümkinçiliklere eýe boldy. Türkmen ýaşlarynyň gazanýan her bir üstünligi ýurdumyzyň buýsanjydyr. Ýurdumyzyň gazanýan üstünlikleri bolsa ýaşlar üçin uly buýsanç, watansöýüjilik mekdebi bolup durýar.
Şunuň bilen baglylykda, türkmen paýtagtynyň ýeten derejesi, rowaçlygy, halkara derejesinldäki abraýy Aşgabadyň ýaş nesilleriniň nurana geljeginiň üpjün edilmegine uly goşantdyr. Şu günki çäräniň Türkmenistanyň mekdeplerinde soňky jaň dabarasy bilent gabat gelmegi has-da ýakymlydyr. Şunda mekdebi tamamlaýan uçurymlaryň öňünde ajaýyp durmuş ýoluny kesgitlemek wezipesi durýar. Şanly wakalaryň goşalanyp gelmegi hoşniýetlilikden, bagtyýarlykdan we Diýarymyza, paýtagtymyza bolan uly buýsançdan nyşan.
Aşgabat şäheriniň güni we täze binalaryň açylmagy hem-de okuw ýylynyň tamamlanmagy mynasybetli “Arkadag” binasynyň ýanyndaky meýdançada sungat ussatlarynyň gatnaşmagynda baýramçylyk konserti boldy.
Bu ýerde meşhur döredijilik toparlary, belli estrada aýdymçylary we ýaş ýerine ýetirijiler hem-de tansçylar belent ruha beslenen çykyşlary ýaýbaňlandyrdylar. Mähriban Watanymyza, Berkarar döwletimiziň bagtyýarlyk döwrüne, hormatly Prezidentimiz Gurbanguly Berdimuhamedowyň –Arkadagyň durmuşa geçirýän beýik işlerine bagyşlanan aýdym-sazlar Aşgabadyň tyllaýy agşamlarynda has-da belent ýaňlandy. Sungat ussatlary özleriniň ajaýyp eserleriniň üsti bilen milli Liderimiziň alyp barýan bimöçber işleriniň ýurdumyzyň täze taryhynda gazanylýan üstünlikler bilen baglanyşyklydygyny wasp etdiler. Şeýle hem aýdymçylar mekdep ýyllary hakyndaky, ajaýyp türkmen paýtagtyna, adamzadyň beýik duýgularyna we mähriban topragymyzyň gözelligine bagyşlanan ajaýyp aýdymlary ýerine ýetirdiler.
“Arkadag” binasynyň gaýa şekilindäki binýadynda ýagtylyk emele gelip, onda ýurdumyzyň tebigy aýratynlyklaryna, dag etekleriniň, sähralaryň gözelligine, hormatly Prezidentimiziň başlangyjy bilen amala aşyrylýan beýik işlere bagyşlanan wideoşekiller görkezildi.
Munuň özi türkmen tebigatynyň ajaýyplyklaryny, her bir adamyň kalbyna gozgalaň salýan mähriban topragyň aýratynlyklaryny özünde jemleýän şekillerdir. Çünki topragymyza, tebigatymyza bolan guwanç duýgusy, özüňi tebigatyň bir bölegi hasaplamak we bu sazlaşygyň üpjün edilmegine bolan jogapkärçiligiňe düşünmek watansöýüjilik ýörelgeleriniň esasyny düzýär. Hut şol ýörelgeden hakyky raýatyň, şahsyýetiň terbiýesi başlanýar. Türkmen halkynyň milli ýörelgesiniň esasyny duüzýän bu başlangyç müňýyllyklaryň dowamynda kalplarda daşgy gurşaw bilen sazlaşaykda ýaşamak, onuň her bir damja suwuna, her bir ösümligine, her bir gözellige aýawly çemeleşmek we şeýle sazalaşykda gaýtalanmajak sungat eserine çalymdaş, deňi-taýy bolmadyk ahalteke bedewlerini döretmek endigi ýüze çkypdyr.
Bu ýörelge milli Liderimiz Gurbanguly Berdimuhamedowyň Türkmenistanyň ajaýyp tebigy baýlyklaryny tutuş halkyň gullugyna gönükdirilmegini, onda ýere bolan netijeli, oýlanyşykly we aladaçyl çemeleşmäni başarýan ýer eýesiniň tapylmagyny nazarlaýan syýasatynyň esasyny düzýär. Häzirki döwürde munuň özi durnukly ösüşiň esaslaryny, milli gymmatlyklar ulgamynda bosla ahlak aýratynlyklaryny emele getirýär.
Konserte gatnaşyjylaryň hemmesiniň bielikde ýerine etirmeginde berkarar döwletimiziň bagtyýarlyk döwründe, mähriban Watanymyza we Arkadagymyza bagyşlanan aýdymyň ýaňlanmagy dabaranyň jemini jemledi.
Aşgabat şäheriniň güni, täze binalaryň açylyşy hem-de ýurdumyzyň mekdeplerinde guralan “soňky jaň” dabaralary baýramçylyk feýerwerkine ulaşyp gitdi. Olar paýtagtymyzyň owadan gijesinde älemgoşar öwüşginli şekilleri döredip, dabara gatnaşyjylarda ýatdan çykmajak täsir galdyrdy. Ýyldyzlara beslenen asmanda emele gelýän köp öwüşginli şekiller şu günki guralan baýramçylyklaryň belent dabarasyny has aýdyňlygy bilen äşgär etdi.
