Plastik penjireleri, demir we agaç gapylary, öýler we edara jaýlary, myhman otaglary, aşhanalar üçin mebel ýasap, ilatyň we eýeçiligiň dürli görnüşindäki kärhanalaryň tabşyryklaryny ýerine ýetirmek - Daşoguzda indi ýigrimi ýyldan gowrak wagt bäri işläp gelýän kompaniýanyň işiniň esasy ugrydyr. Öz wagtynda hususy haryt öndürijiler ýurduň demirgazyk sebitinde gurlup ulanylmaga berlen ýaşaýyş we durmuş ähmiýetli binalar üçin gurluşyk materiallarynyň uly tapgyryny çykardylar. Daşoguzly telekeçileriň ýokary hilli önümleri dürli ýyllarda Türkmenistanyň ykdysady gazananlarynyň sergilerinde görkezildi.

Şu güne çenli „Hilal“ hususy kärhanasynyň ussalary önümleriň ýigrimi görnüşini özleşdirdiler. Önümçilik sehleri ýokary tehnologiýaly enjamlar bilen üpjün edilip, olaryň işine ýörüteleşdirilen kompýuter programmasy gözegçilik edýär. Öňde baryjy tehnologiýalaryň ulanylmagy telekeçiligi üstünlikli alyp barmagyň, ýokary hilli mebel we gurluşyk materiallaryny çykarmagyň girewidir. Hünärmenler plastiki penjireleri we demir gapylary çykarmaga niýetlenen kuwwatly agaç işläp bejeriji we ýylmaýjy enjamlaryň, agaç işikleri ýelmemek üçin basyjynyň, kesiji we beýleki enjamlaryň üznüksiz işlemegini üpjün edýärler. Her aýda bu ýerde ýokary hilli materiallardan penjireleriň we gapylaryň orta hasapdan bäş ýüzüsi öndürilýär.

Daşoguz welaýatynyň şäherlerinde we etraplarynda ýerli önümleriň dürli görnüşlerini çykarmak ýola goýlan hususy kärhanalar üstünlikl işleýärler. Telekeçiler milli ykdysadyýetiň ösmegine mynasyp goşant goşýarlar.