Berkarar döwletimiziň bagtyýarlyk döwründe Garaşsyz, hemişelik Bitarap ýurdumyzda amala aşyrylýan nobatdaky konstitusion özgertmeler berkarar döwletimizi mundan beýläk-de ösdürmekde möhüm tapgyry alamatlandyrýar. Konstitusion özgertmeleriň düýp manysy we mazmuny «Türkmenistanyň Konstitusiýasyna üýtgetmeler we goşmaçalar girizmek hakyndaky» Türkmenistanyň Konstitusion kanunynyň metbugatda dolulygyna çap edilen deslapky taslamasy halkymyz tarapyndan işjeň ara alnyp maslahatlaşylandan soň taýýarlanylan gutarnykly taslamasynda beýan edildi.
Şunuň bilen baglylykda, Türkmenistanyň Halk Maslahaty karar edýär:
1. «Türkmenistanyň Konstitusiýasyna üýtgetmeler we goşmaçalar girizmek hakyndaky» Türkmenistanyň Konstitusion kanunynyň taslamasyny doly makullamaly.
2. «Türkmenistanyň Konstitusiýasyna üýtgetmeler we goşmaçalar girizmek hakyndaky» Türkmenistanyň Konstitusion kanunynyň taslamasyny Türkmenistanyň Mejlisiniň garamagyna hödürlemeli.
3. Berkarar döwletimiziň bagtyýarlyk döwründe ýurdumyzda geçirilýän ägirt uly özgertmeleri çaltlandyrmak, demokratiýany ösdürmek hem-de çuňlaşdyrmak, kanunçylygy hem-de döwlet dolandyryşyny, kanun çykaryjy häkimiýeti amala aşyrýan wekilçilikli edaralar ulgamynyň işini mundan beýläk hem kämilleşdirmek maksady bilen, amala aşyrylýan taryhy işleri, Garaşsyz, hemişelik Bitarap Watanymyzyň at-abraýyny belende galdyrmak ugrunda alnyp barylýan işleri netijeli dowam etdirmek döwlet häkimiýet edaralarynyň we jemgyýetçilik birleşikleriniň baş wezipeleri bolmalydyr.
Türkmenistanyň Prezidenti,
Türkmenistanyň Halk Maslahatynyň Başlygy
Gurbanguly BERDIMUHAMEDOW.
Türkmenistany 2021-nji ýylda durmuş-ykdysady taýdan ösdürmegiň esasy ugurlaryny makullamak hakynda
Berkarar döwletimiziň bagtyýarlyk döwründe uly özgerişlikleri başdan geçirýän Garaşsyz, hemişelik Bitarap Watanymyz ösüşiň täze belentliklerine galýar. Ýurdumyzyň ösüşiniň häzirki tapgyry jemgyýetçilik durmuşynyň ähli ugurlaryna öňdebaryjy tehnologiýalaryň, sanly ulgamyň we innowasiýalaryň ornaşdyrylmagy, täze pudaklaryň we önümçilikleriň döredilmegi hem-de hususy bölegiň giňden ösdürilmegi netijesinde, ykdysadyýetiň gurluş düzüminiň kämilleşdirilmegi bilen häsiýetlendirilýär. Jemgyýetimizde demokratik özgertmeleri durmuşa geçirmek we bu ugurda gazanylan netijeleri berkitmek boýunça yzygiderli tagallalar edilýär.
Bitaraplyk hukuk ýagdaýynyň dünýä bileleşigi tarapyndan ykrar edilmeginiň şanly 25 ýyllygyny dabaraly belläp geçmäge taýýarlyk görýän ýurdumyz döredijiligiň we üstünlikleriň ýoly bilen ynamly öňe barýar. Ykdysadyýetde, syýasatda, ylym-bilim, saglygy goraýyş, medeniýet ulgamlarynda, oba hojalygynda hem-de beýleki pudaklarda gazanylýan üstünlikler, halkymyzyň ýaşaýyş-durmuş derejesiniň yzygiderli ýokarlanmagyna oňaýly täsirini ýetirýär we geljege ynamyny has-da pugtalandyrýar.
Biziň umumadamzat bähbitlerini nazarlaýan, sebitde we dünýäde parahatçylygy we durnuklylygy hem-de agzybirligi üpjün etmäge gönükdirilen beýik işlerimiziň, alyp barýan içeri we daşary syýasatymyzyň netijesinde, Bitarap döwletimiz dost-doganlygyň we bagtyýarlygyň mekanyna öwrülýär, onuň halkara derejedäki at-abraýy barha ýokarlanýar.
Şunuň bilen baglylykda, Türkmenistanyň Halk Maslahaty karar edýär:
1. Türkmenistanyň Prezidentiniň Türkmenistanyň Halk Maslahatynyň taryhy mejlisinde eden çykyşynda öňde goýan wezipelerini — Türkmenistany 2021-nji ýylda durmuş-ykdysady taýdan ösdürmegiň esasy ugurlaryny makullamaly.
2. Döwlet häkimiýet edaralary «Türkmenistanyň Prezidentiniň ýurdumyzy 2019 — 2025-nji ýyllarda durmuş-ykdysady taýdan ösdürmegiň Maksatnamasynyň» çäklerinde ýurdumyzy mundan beýläk hem durmuş-ykdysady taýdan ösdürmegiň esasy ugurlaryny durmuşa geçirmek boýunça zerur işleri yzygiderli amala aşyrmaly.
3. Berkarar döwletimiziň bagtyýarlyk döwründe durmuşa geçirilýän «Türkmenistanyň Prezidentiniň ýurdumyzy 2019 — 2025-nji ýyllarda durmuş-ykdysady taýdan ösdürmegiň Maksatnamasyny» we beýik özgertmelere gönükdirilen taryhy başlangyçlary, Türkmenistanyň Konstitusiýasy esasynda ýurdumyzyň syýasy, durmuş-ykdysady we medeni taýdan durnukly ösüşini üpjün etmek ugrunda alnyp barylýan giň möçberli özgertmeleri wagyz etmegi we ilata düşündirmegi, bu ugurda ýokary işjeňlik hem-de raýat düşünjeliligini görkezmäge çagyrýan çagyryşlary ýaýbaňlandyrmagy Türkmenistanyň jemgyýetçilik birleşiklerine we köpçülikleýin habar beriş serişdelerine tabşyrmaly.
Türkmenistanyň Prezidenti,
Türkmenistanyň Halk Maslahatynyň Başlygy
Gurbanguly BERDIMUHAMEDOW.
Türkmenistanyň Milli Geňeşiniň Halk Maslahatynyň agzalarynyň birinji saýlawlaryny bellemek hem-de Türkmenistanyň Milli Geňeşiniň Halk Maslahatynyň işini ýola goýmak bilen bagly guramaçylyk işlerini geçirmek hakynda
«Türkmenistanyň Konstitusiýasyna üýtgetmeler we goşmaçalar girizmek hakyndaky» Türkmenistanyň Konstitusion kanunynyň kabul edilmegi bilen baglylykda, Türkmenistanda amala aşyrylýan demokratik özgertmeleri mundan beýläk-de çuňlaşdyrmak maksady bilen, Türkmenistanyň Halk Maslahaty karar edýär:
1. «Türkmenistanyň Konstitusiýasyna üýtgetmeler we goşmaçalar girizmek hakyndaky» Türkmenistanyň Konstitusion kanunynyň kabul edilmegi, Türkmenistanyň Halk Maslahatynyň işiniň bes edilmegi hem-de iki palataly parlament ulgamyna geçilmegi bilen bagly, Türkmenistanyň kanunlaryna we beýleki kadalaşdyryjy hukuk namalaryna degişli üýtgetmeleri we goşmaçalary girizmek işlerini 2021-nji ýylyň 1-nji ýanwaryna çenli tamamlamaly.
2. Türkmenistanyň Milli Geňeşiniň Halk Maslahatynyň agzalarynyň birinji saýlawlaryny 2021-nji ýylyň mart aýynyň soňky ýekşenbesinde geçirmeli we şunuň bilen bagly degişli guramaçylyk işlerini geçirmeli.
3. Türkmenistanyň Milli Geňeşiniň Halk Maslahatynyň işini ýola goýmak bilen bagly işleri alyp barmagy Türkmenistanyň Mejlisine tabşyrmaly.
Türkmenistanyň Prezidenti,
Türkmenistanyň Halk Maslahatynyň Başlygy
Gurbanguly BERDIMUHAMEDOW.