Ahalyň we Balkanyň, Balkanyň we Daşoguzyň elektrik ulgamlaryny birleşdirip, sebitleriň ýgtybarly elektrik üpjünçilgine ýardam etjek aýlawly energetika ulgamynyň gurluşygynyň depgini güýçlendirilýär. Uly möçberli taslamanyň birinji tapgyrynda potratçy guramalar «Gurtly» kiçi bekedinden başlap, Balkan welaýatynyň dolandyryş merkezine çenli her gün demir-beton fundamentleriniň 36-40-syny guýýarlar we demir sütün gurnamalarynyň 15-sine golaýyny oturdýarlar. Şol bir wagtda «Serdar-220» elektrik kiçi bekediniň gurluşygyna hem başlanyldy.
«Gurtly» kiçi bekedinden başlap Balkanabada çenli aralykda eýýäm sütünleriň 270-si oturdyldy. Elektrik geçirijileri çekmek işini awgust aýynda tamamlamak göz öňünde tutulýar. Şunda 5,5 müň fundament plitalar goýular we 1,5 müň sütün oturdylar. Mundan başga-da, kuwwatly transformatorlary, tok öçürijileri, aýrjylary, rele goragyny we awtomatikany, telemehanika ulgamlaryny, kommunikasiýalary, Ýewropa ölçegleri boýunça taýýarlanan SCADA enjamyny oturtmak meýilleşdirilýär.
220 KW-lyk elektrik geçirijisiniň gurluşygyny çaltlandyrmak üçin onuň 420 kilometrden gowrak ugry potratçy guramalara bölünip berildi. Gurluşygyň baş potratçysy «Türkmenenergogurluşyk» konserni elektrik geçirijiniň demir-beton esaslarynyň gurluşygyna welaýatlaryň ählisiniň energoulgamlarynyň edaralaryny, telekeçilik düzümleri, şeýle hem «Türkmenenergo» Döwlet elektrikenergetika korporasiýasynyň edaralaryny çekdi.
Geljegi uly taslamany durmuşa geçirmek üçin Aziýanyň ösüş banky ýeňillikli karz berdi. Gurluşygyň iş tabşyryjysy -- «Türkmenenergo» Döwlet elektrikenergetika korporasiýasy bu serişdeleri ulanyp, ýokary woltly elektrik geçirijileriň we kiçi beketleriň gurluşygy üçin zerur şertnamalary baglaşdy hem-de serişdeleri, enjamlary we awtotehnikalary satyn aldy. Häzirki wagtda gurluşyk tehnikalarydyr mehanizmler, kömekçi enjamlar, sütünler we simler gurluşyk meýdançalaryna eltildi.
Göwrümli taslama elektrik energiýasynyň öndürilişini artdyrmaga, elektrik tygşytlylygynyň hilini ýokarlandyrmaga we ilatyň durmuş-ýaşaýyş şertlerini gowulandyrmaga, pudagyň eksport mümkinçiligini has-da artdyrmaga gönükdirilendir. Aýlawly ulgam welaýatlaryň we Aşgabadyň energoulgamlarynyň arasynda özara ätiýaçlandyrma mümkinçilik berer. Hemişelik ätiýajy bolan energetikler ulanyjylara zelel bermezden energobloklary, elektrik kiçi beketleri, elektrik geçirijileri abatlap we döwrebaplaşdyryp bilerler.
Wladimir KOMAROW
