Şu gün Daşary işler ministrliginde Gyrgyz Respublikasynyň daşary işler ministri R.Kazakbaýew bilen wideoaragatnaşyk arkaly duşuşyk geçirildi. Onuň dowamynda iki dostlukly ýurduň daşary syýasat edaralarynyň ýolbaşçylary syýasy-diplomatik ugur boýunça türkmen-gyrgyz gatnaşyklarynyň, şeýle hem söwda-ykdysady we medeni-ynsanperwer ulgamlardaky hyzmatdaşlygyň esasy ugurlaryny ara alyp maslahatlaşdylar.

Daşary işler ministrlikleriniň arasyndaky syýasy geňeşmeleri işjeňleşdirmegiň zerurdygy bellenildi. Taraplar sebitara we halkara ugurlarda möhüm meseleler boýunça iki ýurduň garaýyşlarynyň ýakyndygyny nygtadylar. Türkmenistan bilen Gyrgyz Respublikasynyň BMG-niň, YHG-nyň, GDA-nyň we beýleki guramalaryň çäklerindäki hyzmatdaşlyk gatnaşyklaryna garaldy. 

Şeýle hem iki ýurduň arasyndaky söwda-ykdysady gatnaşyklaryň, olary işjeňleşdirmek üçin bilermenleriň duşuşyklaryny geçirmegiň mümkinçilikleri ara alnyp maslahatlaşyldy. Energetika, ulag, oba hojalygy pudaklaryndaky hyzmatdaşlygyň geljekki ugurlaryna garaldy. Şunuň bilen baglylykda, söwda-ykdysady, ylmy-tehniki we ynsanperwer hyzmatdaşlyk boýunça Türkmen-gyrgyz hökümetara toparynyň duşuşyklarynyň yzygiderli häsiýetde geçirilmeginiň maksadalaýyk boljakdygy nygtaldy.

Medeni-ynsanperwer gatnaşyklary ösdürmek bilen baglanyşykly meseleler barada aýdylyp, bilim, medeniýet we sport ugurlary boýunça gatnaşyklaryň netijeli häsiýete eýe bolýandygy bellenildi. Şunuň bilen baglylykda, şu ýylda şeýle duşuşyklary guramagyň mümkinçiliklerine garaldy.

Türkmenistanyň Döwlet habarlar agentligi

Surata düşüren: Ýuriý ŞKURIN