Türkmen Oba hojalyk uniwersiteti (TOHU) bilen Ermenistanyň Agrar milli uniwersitetiniň arasyndaky Ylalaşygy durmuşa geçirmek jähtinden bilelikdäki wideosapaklar tapgyry guraldy. Onuň çäklerinde 24-nji martda TOHU-nyň bagçylyk, üzümçilik we gök ekarançylyk kafedrasynyň müdiri, ylymlaryň kandidaty Merdan Pirlekow Ermenistanyň agrar ýokary okuw mekdebiniň talyplaryna «Goragly toprakda daşky gurşawyň faktorlaryny düzgünleşdirmek we olary dolandyrmagyň ulgamlary» temasyndan umumy sapak okady.

Hususan-da, ýurdumyzyň tebigy-howa şertlerinde (gurak zolakda) ekarançylygy ýöretmegiň ugurlary beýan edildi, şeýle hem ýyladyşhanalary hem-de parnikleri ykdysady taýdan netijeli ulanmak boýunça ylmy barlaglaryň netijeleri mysal getirildi. Wideotanyşdyrylyş Türkmenistanyň ýyladyşhana hojalyklarynyň klasterinde ulanylýan tehnologiýalar bilen tanyşdyrdy.

Sapagyň ahyrynda şeýle çäreleriň oba hojalyk ýokary okuw mekdepleriniň talyplarynda hünär başarnygyny kemala getirýändigi we özara peýdaly tejribe alyşmaga ýardam edýänligi bellenildi.

7-nji aprelde Türkmenistanda gök-bakja ekinleriniň seçgisi boýunça onlaýn-sapak umumy sapaklar tapgyrynyň dowamy bolar.