Türkmenistanyň Söwda-senagat edarasynyň wekilleri we Lipesk oblastynyň (Russiýa Federasiýasy) Eksporta goldaw merkezi özara hyzmatdaşlygyň geljegini ara alyp maslahatlaşdylar. 14-nji maýda onlaýn görnüşde guralan bu duşuşyk netijeli boldy. Bu barada “Lipeskoýe wremýa” teleradiokompaniýasynyň saýtynda habar berilýär.  

Türkmen tarapy Russiýanyň Lipesk oblasty bilen, aýratyn-da oba hojalygy, metallurgiýa, nebit-himiýa we energetika ýaly pudaklarda iki tarapa-da peýdaly hyzmatdaşlygyň giňeldilmegine gyzyklanma bildirdi.

 Türkmenistan RF-iň bu sebitine dokma pudagynyň önümlerini eksport edýär. Lipesk oblastyndan biziň ýurdumyza metal önümleri, maşynlar, abzallar, konditer önümleri getirilýär. Taraplaryň pikirine görä, işewür toparlaryň wekilleriniň duşuşygy bähbitleri sazlaşdyrmaga we hyzmatdaşlygy güýçlendirmäge ýardam eder. COWID  zerarly girizilen çäklendirmeler aýrylandan soň, olary täzeden dikeltmek karar edildi.    

Janmämmet GULAMOW