GDA ýurtlarynyň hökümet ýolbaşçylarynyň 28-nji maýda Minskde geçiriljek duşuşygynda pandemiýadan soňra Arkalaşyga girýän ýurtlaryň ykdysadyýetini dikeltmek we özara söwdany sanly ulgama geçirmek meselesine garalar. Bu barada Russiýa Federasiýasynyň hökümetiniň diwanhanasy habar berýär.

Şeýle-de bu duşuşykda Arkalaşygyň döwletleriniň çäklerinde ýokanç keselleriň ýaýramagynyň öňüni almak, ilatyň iş bilen üpjünçiligi we beýleki birnäçe wajyp meseleler ara alnyp maslahatlaşylar.

Ýygnanyşyň netijesi boýunça birnäçe halkara, şol sanda, galp haryt nyşanlaryny we geografiki atlary ulanmagy duýdurmak, bularyň öňüni almak boýunça hyzmatdaşlyk hakdaky Ylalaşyga gol çekmek meýilleşdirilýär.

Şu ýyl Arkalaşygyň 30 ýyllygynyň bellenýändigi sebäpli, birnäçe çäreler göz öňünde tutulýar. Şonuň bilen bagly GDA gatnaşýan ýurtlaryň täze ykdysady şertlerde, şol sanda, dünýäde koronawirus keseliniň ýaýramagynyň netijesinde özara gatnaşyklaryň gelejegi seljeriler.

GDA-nyň agzasy hökmünde Türkmenistan Arkalaşygyň hökümet ýolbaşçylarynyň Geňeşiniň mejlisinde GDA-nyň çäklerinde özara hyzmatdaşlygy ösdürmäge gönükdirilen teklipleri öňe sürüp, oňa işjeň gatnaşýar. Biziň ýurdumyz şeýle-de hemişe parahatçylygy, howpsuzlygy we durnuklylygy berkitmekde umumy tagallalaryň jemlenmegi ugrunda çykyş edýär.