Garaşsyz Döwletleriň Arkalaşygynyň Hökümet baştutanlarynyň Minskide geçen Geňeşiniň mejlisiniň netijeleri boýunça hyzmatdaşlygy ösdürmek hakynda namalara gol çekildi. Bu barada BELTA gullugy habar berýär.
Bu duşuşykda giňişleýin formatda üç nama boýunça çykyşlar diňlenildi. Olaryň birinijisi - GDA gatnaşyjy – döwletleriň ýokanç keselleriň ýaýramagynyň öňüni almak ugrunda bilelikdäki hereketleriniň ortamöhletli meýilnamasydyr.
Bu meýilnamada bäş ugurda: 20 sany çäräni durmuşa geçirmek göz öňünde tutulýar. Olar hususanda: GDA ýurtlary üçin has howply hasaplanýan ýokanç kesellerden goraýan immunobiologiki we anyklaýyş derman serişdelerini işläp taýýarlamakdan, algoritmleri, standart amallaryň kadasyny düzmekden, jemgyýetçilik saglygy goraýyş ulgamynda adatdan daşary ýagdaýlara bilelikde göreşmegiň tehnoldogiýasyny döretmekden we beýlekilerden ybaratdyr.
Şeýle-de, duşuşyga gatnaşyjylar GDA döwletleriniň çäginiň sanitar goragynyň hyzmatdaşlygy boýunça Ylalaşyk hakda çykyşy diňlediler. Onda taraplaryň adatdan daşary ýagdaýlar ýa-da olaryň döremek mümkinçiligi bilen bagly kesellerden Arkalaşygyň ýurtlarynyň çäklerini sanitar taýdan goramagyň zerur çärelerini geçirmek bellenilýär. Şeýle çäreleri sanitar- epidemiologiýa gözegçiligine degişli harytlar babatda-da amala aşyrmak göz öňünde tutulýar.
Bu ýygnanyşykda ilaty iş bilen üpjün etmek ulgamynda hyzmatdaşlyk hakda Ylalaşyk hem ara alnyp maslahatlaşyldy. Onuň maksady umumy zähmet bazaryny döretmekden, ilatyň işe meşgullanmagyna şert döretmekden, işsizligiň derejesini peseltmekden, raýatlaryň hereketleriniň we zähmet çekmäge azatlyklarynyň üpjün edilmeginden ybaratdyr.
Wekilleriň ýolbaşçylary birnäçe namalara ara alyp maslahatlaşmazdan gol çekider. Şol sanda - galp haryt nyşanlaryny we geografiki atlary ulanmagy duýdurmak we onuň öňüni almak, şeýle-de, geodeziýa, kartografiýa, Ýere daş aralykdan gözegçilik etmek meselelerinde özara hereketleri kadalaşdyryjy namalar bar.
Mejlisde GDA gatnaşyjy – döwletlerde döwlet maddy serişdelerini dolandyryjy döwlet (ýerine ýetiriji) häkimiýetiniň edaralarynyň hyzmatdaşlygynyň 2030-njy ýyla çenli döwür üçin esasy ýörelgesi we ony amala aşyrmagyň esasy çäreleriniň meýilnamasy tassyklandy.
Hökümet baştutanlary işgärleri bellemek hakdaky kararlara-da gol çekdiler. GDA-nyň Ýerine ýetiriji komitetiniň başlygynyň Birinji orunbasarlygyna Leonid Anfimow, GDA-nyň Ýerine ýetiriji komitetiniň başlygynyň orunbasarlygyna – Beketjan Jumahanow, Ilhom Nematow we Denis Trefilow dagylar bellendiler. Wladimir Sokolin bir ýyl möhlet bilen Arkalaşygyň Döwletara statistika komitetiniň başlyklygyna tassyklandy.
GDA ýurtlarynyň Hökümet baştutanlarynyň Minskide geçen Geňeşiniň mejlisine Тürkmenistandan maliye-ykdysady topluma gözegçilik edýän wise-premýer Gadyrgeldi Müşşikow gatnaşdy.
BELTA gullugynyň suraty
