Türkmenistanyň DIM-de Türkmenistanyň Ministrler Kabinetiniň Başlygynyň orunbasary, Daşary işler ministri R.Meredowyň iş sapary bilen Aşgabada gelen Ýewropa Bileleşiginiň Merkezi Aziýa boýunça Ýörite wekili Piter Burian bilen duşuşygy geçirildi.

Duşuşygyň barşynda taraplar Türkmenistan bilen Ýewropa Bileleşiginiň arasyndaky hyzmatdaşlygy oňyn häsiýetlendirdiler. «ÝB – Türkmenistan» bilelikdäki Komitetiň çäklerinde yzygider gepleşikler arkaly berkidilýän işjeň syýasy-diplomatik gatnaşyklar bellenildi. «Ýewropa Bileleşigi - Merkezi Aziýa» formatda yzygiderli geçirilýän ýokary derejeli syýasy geňeşmeleriň ähmiýeti nygtaldy.

Diplomatlar durnukly ulag we ekologiýa, şol sanda Birleşen Milletler Guramasynyň çäklerinde hyzmatdaşlygy giňeltmegiň mümkinçiliklerine seretdiler. Türkmenistanyň «Gündogar-Günbatar» ugur boýunça, şol sanda «Hazar deňzi-Gara deňzi», «Lapis-Lazuli» geçelgeleri babatda sebit derejeli ulag we energiýa taslamalary durmuşa geçirmekde ýewropa tarapynyň goldawyny goldaýandygy bellenildi.

Türkmen energiýa serişdelerini Ýewropa bazarlaryna çykarmakda işleri ilerletmäge iki tarapyň ygrarlydygy bellenildi. Şeýle-de taraplar alternatiw energiýany ornaşdyrmak babatda hyzmatdaşlygy giňeltmegiň mümkinçiliklerini ara alyp maslahatlaşdylar.