Daşary işler ministriniň orunbasary W.Hajyýewiň ýolbaşçylygyndaky Türkmenistanyň wekilýeti Daşkentde daşary syýasat edaralarynyň ýolbaşçylarynyň orunbasarlarynyň derejesinde geçirilen syýasat we howpsuzlyk meseleleri boýunça Ýokary derejeli «ÝB –Merkezi Aziýa» duşuşygynyň nobatdaky tapgyryna gatnaşdy. Bu barada Türkmenistanyň DIM habar berýär.

Ýewropa Bileleşiginiň wekilýetine Ýewropa daşary gatnaşykalr gullugynyň Baş sekretarynyň orunbasary E.Mora ýolbaşçylyk etdi. Şeýle hem duşuşyga wideoaragatnaşygy arkaly Ýewropa Bileleşiginiň Merkezi Aziýa boýunça Ýörite wekilligine bellenen T.Hakala gatnaşdy. Şeýle hem gepleşiklere daşary işler ministriniň orunbasary Mirwaýs Nabyň ýolbaşçylygyndaky Owganystanyň wekilýeti gatnaşdy.

Mejlisde pandemiýa garşy durmak şertlerinde sebit hyzmatdaşlygyny ösdürmegiň meseleleri ara alnyp maslahatlaşyldy. Şunuň bilen baglylykda, türkmen tarapy pandemiýa garşy çäreleri güýçlendirmek boýunça sebit maksatnamasynyň çäklerinde üçtaraplaýyn – Ýewropa Bileleşiginiň, Merkezi Aziýa ýurtlarynyň we BSG-nyň hyzmatdaşlygynyň netijelidigini aýratyn belledi. Şeýle hem türkmen wekilýetiniň ýolbaşçysy saglygy goraýyş we azyk howpsuzlygy meseleleri boýunça Ýewropa komissarynyň edarasy bilen aýratyn gepleşikleri guramak barada teklibi öňe sürdi. Türkmenistanyň munuň üçin bu ulgamda geljekki hyzmatdaşlygyň düzgünlerini işläp taýýaralamak üçin şu ýylyň oktýabrynda Aşgabatda geçiriljek alym-lukmanlaryň Halkara forumynda meýdança bermäge taýýardygy nygtaldy.

Gepleşiklere gatnaşanlar serhetleri dolandyrmak, neşe serişdeleriniň bikanun dolanşygyna we gurmaçylykly jenaýatlara garşy durmak babatda özara hereketleriň meselelerini ara alyp maslahatlaşdylar. Duşuşykda ulag-üstaşyr hyzmatdaşlygy ösdürmäge, söwda ýardam etmäge, dikeldilýän energetika babatda hyzmatdaşlyga we beýleki meslelere aýratyn üns berildi.