Şu gün Daşary işler ministrliginde Ministrler Kabinetiniň 10-njy dekabrda geçirilen giňişleýin mejlisiniň hem-de 2021-nji ýylyň 11-nji dekabrynda türkmen paýtagtynda guralan “Parahatçylyk we ynanyşmak syýasaty — halkara howpsuzlygyň, durnuklylygyň we ösüşiň binýady” atly halkara maslahatyň jemlerine bagyşlanan «tegelek stol» geçirildi.

Duşuşyga Türkmenistanyň daşary ýurtlarda işleýän diplomatik wekilhanalarynyň ýolbaşçylary-da gatnaşdylar.

Halkara maslahatyň jemleri boýunça kabul edilen Jemleýji resminama maslahata gatnaşyjylaryň üns merkezinde boldy.

Aşgabatda geçirilen ýokary derejeli foruma gatnaşyjylar hormatly Prezidentimiz Gurbanguly Berdimuhamedowyň “Dialog — parahatçylygyň kepili” atly ählumumy başlangyjyny durmuşa geçirmek boýunça teklibini goldadylar. Bu başlangyç halklaryň parahatçylykly gatnaşyklaryny, halkara derejede parahatçylygyň we ynanyşmagyň medeniýetiniň kemala gelmegini pugtalandyrmakda dünýä bileleşiginiň tagallalarynyň birleşdirilmegine gönükdirilendir.

Çykyş edenler ýaşlaryň parahatçylyk, ynanyşmak, birek-birege düşünişmek, açyklyk, inklýuziwlik hem-de özara hormat goýmak ýaly gymmatlyklara düşünmegini ösdürmek maksady bilen, olaryň parahatçylyk medeniýetini höweslendirmäge işjeň gatnaşmagyny üpjün etmek üçin gurallaryň döredilmeginiň zerurdygyny beýan etdiler.

Döwletleriň arasyndaky gatnaşyklarda parahatçylyk medeniýetini we özara ynamy ösdürmek raýdaşlyk we sazlaşygy pugtalandyrmak arkaly durnukly ösüşe, parahatçylyga we howpsuzlyga ýardam berýän gymmatlyklar hökmünde bitaraplyk syýasaty bilen üznüksiz baglanyşyklydyr.

Duşuşyga gatnaşyjylar halkara maslahatyň dowamynda beýan edilen teklipleri doly goldaýandyklaryny beýan etdiler.