Türkmenistanyň Magtymguly adyndaky sazly-drama teatrynda Türkmenistanyň sungatda at gazanan işgäri Röwşen Nepesowyň eserlerinden düzülen konsert boldy.
Maýa Kulyýewa adyndaky Türkmen milli konserwatoriýasynyň simfoniki orkestriniň ýerine ýetirmeginde dört bölümden ybarat «Bitaraplyk simfoniýasynyň» görkezilişi boldy. Onuň birinji bölümi «Türkmenistan –Bitaraplygyň ýüregi», ikinjisi – « Parahatçylyk sazy, dostluk, doganlyk sazy», üçünjisi – «Bitaraplyk – türkmen döwletiniň ygtybarly binýady», dördünji ̶ jemleýji bölümi «Öňe, diňe öňe, jan Watanym – Türkmenistan!» diýlip atlandyrylýar. Onuň her bölegi uly rurhubelentlige eýe bolup, awtora mahsus ýumşaklyk hem-de adamkärçilik bilen ýaňlanyp, diňleýjilerde mukaddes watanperwerlik duýgulary bilen sazlaşýar.
Röwşen Nepesow «Ýunus: Gözlegler jülgesi» eserini şahyr Ýunus Emrä bagyşlapdyr. ÝUNESKO geçen ýyly şahyryň ýogalan gününiň 700 ýyllygy mynasybetli Ýunus Ermäniň ýyly diýlip yglan etdi. Bu eser ilkinji gezek ýerine ýetirildi. Röwşen Nepesow şahyryň filosofik dünýäsini açyp görkezýän eserini diňleýjilere hödürledi. Eser kä joşgunly we durmuşa höwesli, käte juda owadan ýaňlanyp, şahyryň şahyrana pikirlerini beýan etdi.
Röwşen Nepesowyň belli «Zenanlara söýgi bilen» eseri ýurdumyzyň birinji skripkaçysy Bahram Dolyýewiň ýerine ýetirmeginde joşgunly we ýürege ýakyn ýaňlandy. Röwşen Nepesow bu eserinde ähli zenanlara hormatyny beýan edýändigini aýtdy.
«Güýz walsy» we «Ýagyş ýagan güni» atly liriki eserleri hem saz agşamyna bezeg berdi. Konserwatoriýaýnyň simfoniki orkestri «Derweze» eserini ýerine ýetirdi. Konsertde simfoniki orkestre konserwatoriýanyň 4-njy ýyl talyby Döwletmämmet Ökdirow dirižýorlyk etdi.
Röwşen Nepesow tomaşaçylara ýüzlenip:
-Biz siz bilen täze duşuşyklara garaşýarys!- diýdi.
Konsertden soňky gysgajyk söhbetdeşlikde Röwşen Nepesow şeýle diýdi:
-Bu konsert gysga wagtda taýýarlandy. Meniň simfoniki orketre eden teklibimi dessine durmuşa geçirmäge girişdiler, çünki orkestr üçin şeýle çykyşlar saz endiklerini artdyrýan gowy mekdep bolup durýar. Men sazandalaryň ussatlygyna sarpa goýýaryn, tomaşaçylara-da hoşallygymy beýan edýärin.
