Türkmenistanyň Saglygy goraýyş we derman senagaty ministrliginiň «Türkmendermansenagat» birleşiginiň Balkan welaýatynyň Bereket şäherindäki Ýod önümçiligi kärhanasy bu ulgamyň ýurt möçberindäki adygan kärhanalarynyň biri hasaplanýar.
Bu ýerde öndürilýän derde derman melhemler ýokary hil derejesi bilen tapawutlanyp, içerki we daşarky sarp edijileriň arasynda uly meşhurlyga eýedir. Kärhananyň hünärmenleri döwletimiziň ýerli çig mallardan bäsdeşlige ukyply önümleri öndürmek babatda öňde goýýan wezipelerini üstünlikli durmuşa geçirmekde mynasyp hyzmatlary bitirýärler. Halkymyzyň saglygyny goramakdaky giň möçberli döwlet tutumlarynyň çäklerinde gurlup, ýedi ýyldan gowrak mundan ozal ulanylmaga berlen kärhanada geçen döwürde köp işler durmuşa geçirildi. Kärhanada sebitiň senagat taýdan özleşdirilýän giň meýdançalaryndaky ýerasty suwlarda jemlenen hem-de ägirt uly gorlara eýe bolan gymmatly çig mal ýoddan taýýar önümleri öndürmekde ýokary netijeler gazanylýar. Önümçilikde ulanylýan çig mal serişdeleriniň ählisiniň diýen ýaly döwletli Diýarymyzyň çäginde ýeterlik bolmagam ýokary hilli derman serişdeleriniň özüne düşýän gymmatyny peseltmäge, olaryň düşewüntliligini artdyrmaga, galyberse-de ekologik taýdan arassa, kämil önümleriň öndürilmegine oňyn täsirini ýetirýär.
Berekediň ýod önümçiligi kärhanasy ýylda ýodly taýajyklaryň 250 millionyny, ýodly galamlaryň 50 million sanysyny, diş serişdeleriniň 500 müňüsini öndürmäge meýilleşdirýär. Dünýä hil ülňülerine laýyk gelýän derman serişdeleri gaýragoýulmasyz lukmançylyk kömeginde, şeýle-de önümçilikde dürli maksatlar üçin peýdalanmakda juda amatlylygy, netijeliligi bilen tapawutlanýar. Bulardan başga-da derman serişdelerini öndürýän kärhanada müşderilere ýetirilýän önümleriň görnüşleri köpdürlidir. Has takygy, göwherli ýaşyl galamlar, lukmançylyk pamyklarynyň dürli görnüşleri, ilkinji lukmançylyk kömeginiň ýörite tassyklanan düzümindäki gaplanan gutular munuň şaýadydyr.
Kärhananyň önümlerini daşarky bazarlarda ýerlemekde hem netijeli işler amala aşyrylýar. Ukraina, Azerbaýjan, Täjigistan, Owganystan, Özbegistan ýaly döwletler, Ýewropa Bileleşiginiň ýurtlary kärhananyň önümlerine uly isleg bildirýärler.
