Türkmenistanyň Oba hojalyk we daşky gurşawy goramak ministrliginiň Gidrometeorologiýa baradaky gullugynyň maglumatlaryna görä, hepdäniň başynda ýurdumyzda esasan ümürli we ýagyşly howa bolar. Howa her gün ortaça bir-iki gradus maýlar. Dynç alyş günleri howa +25 gradusa çenli maýlar.
Aşgabatda üýtgäp durýän bulutly howa bolar. Howa gündizlerine ortaça +9…+11 gradus, gijelerine +5…+8 gradus maýyl bolar. Hepdäniň dowamynda +20…+22 gradusa çenli maýyl howa bolar. Ýöne dynç günleri ýagyş ýagmagy mümkin.
Ahal welaýatynda ümürli howa bolar. Howa gündizlerine +8…+13 gradusdan, hepdäniň dowamynda +21…+26 gradusa çenli maýlar. Gijelerine +5…+10 gradus maýyl howa bolar. Hepdäniň başynda we dynç günleri az-kem ýagyş ýagmagy mümkin.
Balkan welaýatynda üýtgäp durýan bulutly we ýagyşly howa bolar. Howa gündizlerine +12…+17 gradus, gijelerine +6…+11 gradus maýyl bolar. Howa günsaýyn maýlar we +25 gradusa çenli maýyl howa bolar.
Mary welaýatynda hem ýagyş ýagmagy mümkin. Hepdäniň başynda ümürli howa bolar. Howa gündizlerine +10…+15 gradus, gijelerine +6…+11 gradus maýyl bolar. Çarşenbe gününden başlap, howa +21…+26 gradusa çenli maýlar. Ýöne güneşli howa dynç günlerine çenli saklanar. Şenbede we ýekşenbede bulutly howa bolup, ýagyş ýagmagy mümkin.
Lebap welaýatynda bulutly we şemally howanyň bolmagyna garaşylýar. Hepdäniň başynda +17 gradusa çenli maýyl howa bolar. Howa gijelerine +1…+6 gradusa çenli maýlar. Howa şenbede gündiz +20 gradusdan +25 gradusa çenli maýlar. Ýekşenbede howa +16 gradusa çenli pese düşer. Az-kem ýagyş ýagar diýlip çaklanylýar.
Daşoguz welaýatynda esasan bulutly howa bolup, gündizlerine +8…+13 gradusa çenli maýlar, az-kem ýagyş ýagar. Gijelerine –1…+4 gradus howa bolar. Hepdäniň ortasynda howa gündizine +16…+21 gradus, gijesine +2…+7 gradusa çenli maýlar. Dynç günleri ümürli howa bolar.
Möwsümleýin sowuklama keselleriniň we ýokanç keselleriň ýaýramazlygy üçin daşary çykanyňyzda howanyň ýagdaýyny göz öňünde tutuň! Jemgyýetçilik saglygyna howpy azaltmak üçin agyz-burun örtügini dakynyň we bellenilen aralygy saklaň!
