Aşgabat şäher Baş bilim müdirliginiň we Türkmenistanyň Kärdeşler arkalaşyklarynyň şäher birleşmesiniň bilelikde guramagynda daşary ýurt dillerine ýöriteleşdirilen 134-nji orta mekdepde «Ýylyň mugallymy — 2022» atly bäsleşigiň şäher tapgyry geçirildi. Oňa şäherdäki umumybilim berýän edaralardan mugallymlaryň on üçüsi gatnaşdy.
Bäsleşik üç şert boýunça iki gün dowam etdi. Şertler esasynda mugallymlar öz zehinbaşarnyklaryny açyp görkezdiler.
Şäherdäki daşary yurt dillerini, takyk, tebigy dersleri çuňlaşdyryp öwredýän ýöriteleşdirilen 140-njy orta mekdebiň başlangyç synp mugallymy Jennet Mämmetjumaýewa 1-nji orna mynasyp boldy. 2-nji orny ýöriteleşdirilen 13-nji orta mekdebiň fizika mugallymy Baýram Aşyrow eýeledi. Bäsleşikde 3-nji orna iki mugallym — 23-nji orta mekdebiň biologiýa mugallymy Çarygeldi Meredow hem-de S.A.Nyýazow adyndaky 20-nji orta mekdebiň taryh mugallymy Ogultagan Öwezowa mynasyp görüldi.
Bäsleşigiň ýeňijilerine ony guraýjylar tarapyndan Hormat hatlary we sowgatlar gowşuryldy.
Indi esasy tapgyr öňde. Bu bäsleşikde 1-nji orun alan daşary ýurt dillerini, takyk, tebigy dersleri çuňlaşdyryp öwredýän ýöriteleşdirilen 140-njy orta mekdebiň başlangyç synp mugallymy Jennet Mämmetjumaýewa onuň döwlet tapgyrynda, has takyky, welaýatlardan ýeňiji bolan mugallymlar bilen özara bäsleşerler.
Şeýle-de, Aşgabat şäher Baş bilim müdirliginiň we Türkmenistanyň Kärdeşler arkalaşyklarynyň şäher birleşmesiniň bilelikde guramagynda paýtagtymyzdaky 171-nji çagalar bagynda «Ýylyň terbiýeçisi — 2022» atly bäsleşigiň şäher tapgyry geçirildi. Iki günläp dowam eden bu bäsleşik iki şertden ybarat boldy.
Bäsleşigiň birinji şertine laýyklykda, terbiýeçiler sözleýşi ösdürmek, sowat hem-de ýönekeý matematiki düşünjeleri öwretmek, daş-töwerek we tebigat bilen tanyşmak, şeýle-de beýleki sapaklar boýunça nätanyş körpeler bilen sapaklary guradylar.
Bäsleşigiň ikinji şertinde terbiýeçiler özleriniň döredijilik işleri bilen tanyşdyrdylar. Olar körpeler bilen guraýan sapaklarynda ulanýan görkezme esbaplarynyň görnüşleri, multimedia tagtasyndan peýdalanmagyň ähmiýeti, slaýd şekilleri, elde ýasalan gurjaklaryň sapaklarda peýdalanyş usullary barada aýtdylar.
Eminler toparynyň gelen netijeleri boýunça 1-nji orna «Bagtyýar nesiller» atly 14- nji çagalar bagynyň terbiýeçisi Maral Çogdarowa mynasyp boldy. 2-nji orny 183-nji çagalar bakja-bagynyň terbiýeçisi Täzegül Orazmyradowa, 3-nji orny bolsa «Nowruz» atly 102-nji çagalar bakja-bagynyň terbiýeçisi Gurbangözel Altyýewa eýelediler.
Bäsleşigiň ýeňijilerine ony guraýjylar tarapyndan Hormat hatlary we ýadygärlik sowgatlar gowşuryldy.
Bu bäsleşikde 1-nji orna mynasyp bolan terbiýeçi onuň döwlet tapgyryna gatnaşmaga hukuk gazandy.
