Şu ýyl Maýa Kulyýewa adyndaky Türkmen milli konserwatoriýasyna 50 ýyl dolýar. Bu dabaraly sene mynasybetli birnäçe çäre geçirilýär, şolaryň biri-de Ýörite aýdym-saz mekdebiniň uly zalynda ýerine ýetirilen “Bahar nagmalary” konserti boldy. Sazly agşamyň maksatnamasyny dürli ýyllarda TMK-da ýokary bilim alan türkmen kompozitorlarynyň eserleri düzýärdi.

Sahnada Muhammetsapar Toýlyýewiň “Kerwen ýoly”, Alla Penkinanyň “Fragiliti”, Nurýagandym Hojamuhammedowyň “Prelýudiýasy”, Jeren Gurbangylyjowanyň “Seýil bagymda”, Ýazgylyç Aşyrowyň “Awazam” sazy, Kerim Jumagylyýewiň “Walsy” we “Miniatýurasy”, Gülşat Ödenyýazowanyň, Wera Abaýewanyň we Aýna Şirowanyň birnäçe eseri, Jahan Paýtakowanyň Magtymguly atamyzyň sözlerine “Gara gözleriň” atly aýdymy, şeýle hem Suhan Tüýliýewiň milli saz guraly gargy tüýdük üçin ýazan “Begler” kompozisiýasy ýaňlandy.

Konserte Meret Muhammetgulyýewiň we Çary Akynyýazowyň dirižorlyk etmeginde saz muşdaklaryna owaldan tanyş orkestr sazandalary Jeren Orazowa (fortepiano), Amangül Bazarowa (fortepiano), halkara ýaryşlaryň diplomanty Stella Wladimirowna Faramazowa (fortepiano), Türkmenistanyň at gazanan artisti  Gülşat Ödenyýazowanyň ýolbaşçylygynda “Güneş” mekdep-internatynyň hory we mekdep okuwçylary, pianinoçy Diana Melkumowa, Oktaý Najafow (bas klarnet), Rahman Hojamgulyýew (fagot), Ahmat Abaýew (goboý) dagy gatnaşdy.

Agşamyň gowy çykyşlaryndan biri Türkmenistanyň halk artisti Garold Neýmarkyň ýolbaşçylygyndaky belli  skripkaçylar ansamblynyň ýerine ýetirilen sazlary boldy. Ansambl Wera Abaýewanyň “Türkmeniň” atly kompozisiýasyny ýerine ýetirip, ajaýyp çykyşlary üçin köpçüligiň şowhunly el çarpyşmalary bilen sylaglandy.

Saz ussatlary konsert tamamlanandan soňam märekä beren lezzeti üçin, tomaşaçylaryň minnetdarlygyny uzak wagtlap diňlediler.