Maýa Kulyýewa adyndaky Türkmen milli konserwatoriýasynyň uly zalynda Ýeňiş gününe bagyşlanyp geçirilen konsert köp adamly boldy.

Konsert Türkmenistanyň at gazanan artisti Osman Güjimowyň dutarda çalmagynda Mylly Täçmyradowyň «Hüjüm» sazy bilen açyldy.

Maýa Gullaýewa Daňatar Öwezow bilen Andrian Şapoşnikowyň «Abadan» operasyndan Abadanyň ariýasyny ýerine ýetirdi.

Begenç Gaýypow Nury Halmämmedowyň «Esgeriň ýatlamasy» sazyny ýerine ýetidi.

Konsertde türkmen aýdymlary bilen birlikde «Gök ýaglyjak», «Şäher bagynda orkestr saz çalýar», «Tötänleýin wals», «Durnalar», «Wah, ýollar», «Soňky söweş» ýaly meşhur aýdymlar ýerine ýetirildi, «Katýuşa» aýdymyny diňleýjiler Maýa Gullaýewa ses goşup bile aýtdylar.

Konsert uzak dört ýyla çeken elhenç synaglardan geçen ýurduň resmi bolmadyk senasyna öwrülen Dawid Tuhmanowyň «Ýeňiş güni» aýdymy bilen jemlendi. Sahna konserte gatnaşan aýdymçylaryň ählisi – Bahar Durdyýewa, Maýa Gullaýewa, Begenç Gaýypow, Amangeldi Amanow çykdylar.

Agşamyň konsertmeýsteri – halkara bäsleşikleriniň ýeňijisi Stella Faramazowa. Beýik ýeňişiň 77 ýyllygyna bagyşlanan konserti konserwatoriýanyň kamera ansambly kafedrasy taýýarlady.