Garaşzys Diýarymyzda ýokary ruhubelentlige beslenip geçirilýän Türkmenistanyň hemişelik Bitaraplygynyň şanly toýunyň öň ýanynda Lebap welaýatynyň Türkmenabat şäheriniň ýaşaýjylary ajaýyp toý sowgadyny aldylar.
Türkmenabat şäheriniň Halkara howa menziline barylýan awtomobil ýolunyň ugrunda birbada 40 sany, 4 gatly, her biri 32 öýli ýaşaýyş jaýlar toplumy açylyp ulanylmaga berildi. Bagtyýar maşgalalaryň birbada 1280 sanysynyň jaý toýlaryny toýlamaklary, bu toýlaryň Berkarar döwletimiziň parahatsöýüjilikli, halklaryň dost – doganlygyna, ynsanperwerlige ýugrulan, dünýä jemgyýetçiligi tarapyndan ykrar edilen hemişelik Bitaraplyk derejämiziň şanly baýramy bilen utgaşyp gitmegi aýratyn many – mazmuna eýedir.
Gün-günden gözelleşýän Türkmenabat şäheriniň binagärlik keşbine aýratyn bezeg berjek, raýatlarymyzyň bagtyýar durmuşynyň güwäsine öwrüljek bu ýaşaýyş jaýlar toplumy Lebap welaýat häkimliginiň “Lebapgurluşyk” önümçilik birleşigi, Türkmenabat şäher häkimliginiň “Şähergurluşyk we hyzmat” döwlet kärhanasy, Türkmenistanyň Senagat we gurluşyk önümçiligi ministrliginiň “Demirbetonönümleri” hem-de “Demirbetonkonstruksiýa” kärhanalary tarapyndan ýokary hil derejesinde bina edilipdir. Bu toplumyň ýerleşýän ýeri 96 gektara barabardyr. Ýaşaýjylar üçin ähli amatlyklary bolan döwrebap ýaşaýyş jaýlary 3 we 4 otagdan ybarat bolup, olar myhmanlara, çagalara, dynç almaklyga niýetlenen otaglardan, häzirkizaman enjamlary bilen üpjün edilen aşhanadan ybaratdyr. Ýaşaýyş jaýlar toplumynyň ýanaşyk ýerleri doly abadanlaşdyrylyp, bu ýere göçüp gelen raýatlarymyzyň boş wagtlary dynç almaklary üçin ähli şertler döredilipdir. Ýaşaýyş jaýlar toplumynyň ýanynda ýaşaýjylaryň sportuň dürli dürli görnüşleri bilen meşgullanmaklary üçin sport meýdançasy, şeýle hem çagalar üçin döwrebap oýun meýdançasy, dürli dabaralary, toýlary geçirmeklik üçin bassyrmalar gurlupdyr. Synlanyňda kalbyňda buýsanç we hoşallyk duýgularyny döredýän töwerege täze döwrebap ýaşaýyş jaýlarynyň açylyş dabarasynda welaýatyň medeniýet we sungat işgärleriniň joşgunly aýdym-sazlaryna, milli ýörelgelerimizi, şowhunly toýlarymyzy şöhlelendirýän folklor toparlarynyň çykyşlaryna giň gerim berilmegi, ýaşuly nesliň wekilleriniň, täze jaýlara göçüp gelen ýaşaýjylaryň hoşallyk çykyşlarynyň ýaýbaňlandyrylmagy şatlyk – şowhuna, ýokary ruhubelentlige beslenip geçen jaý toýlaryny ýatdan çykmajak pursatlara öwürdi.
