Golaýda Türkmenistan 2024-2026-njy ýyllar üçin ÝUNISEF-iň Ýerine ýetiriji geňeşiniň agzalygyna biragyzdan saýlanylmagy, ýurdumyzyň BMG-niň Çagalar gaznasy bilen uzak möhletleýin hyzmatdaşlygynyň netijelidiginiň ýene bir subutnamasy boldy.

Mälim bolşy ýaly, öň Türkmenistan 2018-2020-nji ýyllarda ÝUNISEF-iň Ýerine ýetiriji geňeşiniň agzalygyna saýlandy we wezipelerini ýerine ýetirdi. Mundan başga-da, Türkmenistan 2021-2023-nji ýyllarda ÝUNESKO-nyň Hökümetara okeanografiýa komissiýasynyň Ýerine ýetiriji geňeşiniň we 2021-2025-nji ýyllara ÝUNESKO-nyň Halkara Gidrologiýa maksatnamasynyň hökümetara geňeşiniň hem agzasydyr.

Bular hem Türkmenistanyň halkara abraýyna we BMG-niň ýöriteleşdirilen guramalaryndaky giň wekilçiligine şaýatlyk edýär. Ýurdumyzyň BMG-daky hemişelik wekilhanasynyň saýtynda habar berlişine görä, umuman, Türkmenistan BMG-niň komissiýalarynyň, komitetleriniň we geňeşleriniň 13-siniň agzasy bolup, 7 gezek BMG-niň Baş Assambleýasynyň başlygynyň orunbasarlygyna saýlanyldy.

Türkmenistanyň wekiliýeti 18-19-njy aprelde Ženewada geçiriljek BMG-niň Ýewropa ykdysady komissiýasynyň (EYK) 70-nji mejlisine gatnaşar, onda ykdysady goşuluşma, sanly we ekologik özgertmeler meselelerine garamak göz öňünde tutulýar.

Daşary işler ministrliginiň habaryna laýyklykda, gepleşikleriň çäklerinde Türkmenistan bilen BMG-niň EYK-nyň arasyndaky hyzmatdaşlygyň ileri tutulýan ugurlary ara alnyp maslahatlaşyldy, şeýle hem Arkadag şäherini açmak boýunça alnyp barylýan işler barada pikir alşyldy, Ýewropa ykdysady komissiýasynyň giňişliginde ony tanyşdyrmak we onuň ähmiýetini ýokarlandyrmak boýunça özara gatnaşyklaryň mümkingadar ugurlary kesgitlenildi.