Magtymguly adyndaky Milli sazly-drama teatrynda Maý Kulyýewa adyndaky Türkmen milli konserwatoriýasynyň ýanyndaky Daňatar Öwezow adyndaky Türkmen döwlet sazçylyk ýörite orta hünär mekdebiniň okuwçylarynyň hasabat konserti boldy. Talyplar üçin hasabat konserti – okuw döwri ýylyň dowamynda gazanylan üstünlikleri açyp görkezýän esasy wakadyr. Ýurdumyzyň iň gowy teatrlarynyň biriniň ussatlar sahnasyna çykmagyň özi bu döredijilik okuw mekdebiniň talyplarynyň we mugallymlarynyň buýsanmaga mynasyp üstünliginden nyşandyr.
Konsert «Arkadag Serdarly bagtlyýar yaşlar» watanperwerlik kompozisiýasy bilen açyldy. Kompozisiýada hor toparynyň aýdymçylarynyň owazy orkestriň sazandarlygynda sazlaşykly we dabaraly ýaňlandy.
Konsertde nusgawy türkmen kompozitorlary Daňatar Hydyrowyň, Daňatar Öwezowyň, Aman Agajykowyň, Nury Halmämmedowyň, şeýle hem Günbatar Ýewropa meşhur nusgawy kompozitorlary Jorj Bizeniň, Lýudwig wan Bethoweniň, Wolfgang Amadeý Mosartyň, Karl Mariýa Weberiň eserleri ýaňlandy. Talyplar Läle Arazdurýýewa bilen Wepa Allaşew Mosartyň «Don Žuan» operasyndan bir bölek ýerine ýetirip, ajap owazy bilen tomaşaçylary özüne bendi etdiler.
Talyp Aman Akmyradow roýalda Aram Haçaturýanyň «Tokkatasyny» ussatlarça çalyp, diňleýjileriň alkyşyny gazandy.
Halk saz gurallarynyň sazandalary hem şowly çykyş etdiler. Gurbangeldi Gurbanberdiýewiň ýolbaşçylygyndaky dutarçylar ansambly «Nowgül» türkmen halk aýdymyny, Türkmenistanyň sungatda at gazanan işgäri Aşyrmyrat Ýazmyradowyň ýolbaşçylygyndaky tüýdükçiler ansamblynyň sazandalary «Gyratym» türkmen halk sazyny ýerine ýetirdiler. Urlup çalynýan saz gurallary orkestriniň sazandalarynyň çykyşyny tomaşaçylar el çarpmalar bilen garşyladylar.
Konsert Rejep Rejebowyň dabaraly «Türkmenistan» eseri bilen jemlendi. Saza hor, simfoniki orkestr we wokalçylar Döwletgeldi Şadykulow we Wepa Allaşew goşuldylar. Aýdymçylaryň hoşzyban sesi, horuň we orkestriň sazlaşygy, şeýle hem Rejep Rejebowyň juda üýtgeşik sazy diňleýjileri haýrana goýdy, olar sazandalary uzak el çarpyşmalar bilen sahnadan goýbermediler.
Maý Kulyýewa adyndaky Türkmen milli konserwatoriýasynyň ýanyndaky Daňatar Öwezow adyndaky Türkmen döwlet sazçylyk ýörüte orta hünär mekdebiniň okuwçylarynyň hasabat konserti döredijiligiň ähli ugurlary boýunça talyplaryň ýokary hünär derejesiniň ýokarydygyny görkezdi – ussatlar sahnasynda talyplar ussatlarça çykyş etdiler.
