Golaýda Sahysalyh Baýramowyň «Daragt» atly täze filmi Türkmenistanyň milli telewideniýesinde görkezildi. Mundan başga-da, tanyşdyryş güni köp sanly kino muşdaklaryny ýygnan «Aşgabat» kinoteatrynda onuň premýerasynyň görkezilişi boldy.

Film bilen tanyşdyrylyşa kinoteatra gelenlere sag bolsun aýtmak üçin ony döretmäge gatnaşanlar – filmiň režissýory, aktýorlar we surata düşüriş toparynyň agzalary sahna çykdylar.

«Daragt» filminde sada türkmen maşgalasynyň ykbalyna dünýä taryhynyň täsiri görkezilýär. Baş gahrymanyň adamsy 1941-1945-nji ýyllardaky Beýik Watançylyk urşy döwründe müňlerçe esger ýaly urşa gidýär. Maşgalabaşysyz galan ene uruş döwrüniň ähli kynçylyklaryna duçar bolýar. Ol maşgalanayň ekleýjisi, adamsyna garaşýan wepaly ýar bolup galýar.

Filmiň edebi esasyny Akmyrat Rejebow ýazypdyr, onda geçmişde hakykatdan-da bolup geçen wakalar barada gürrüň berilýär. Şol wakalary görüp-eşidenleriň dilinden ýazylan asly hakyky wakalar ekranda janlandyrylýar. Şeýle filmleriň döredilmegi netijesinde halkymyzyň şol uruş ýyllarynda görkezen edermenligi hiç wagt ýatdan çykmaýar.

Çeper-dokumental kinoteatr öte çylşyrymly žanr. Şeýle bolsa-da, režissýor Sahysalyh Baýramow kynçylyklardan çekinmeýär. Geçen ýyl ol durmuş hakykatyna laýyk uruş döwrüne bagyşlanan «Gyzyl kürte» filmini tomaşaçylara hödürledi. Türkmen režissýorynyň işine diňe bir ýurdumyzda däl, eýsem daşary ýurtlarda-da gowy baha berildi.

Oguzhan adyndaky «Türkmenfilm» birleşiginiň Beýik Ýeňişiň 78 ýyllygynyň bellenilen günlerinde görkezilen täze filmi ony döredijileriň aýdyşy ýaly, täsirli we ýüreklere ýakyn çykdy.

Filmde ýaş aktýorlar, ýurdumyzyň halk we at gazanan artistleri surata düşdüler. Esasy keşpleri Şemşat Kasymowa, Turan Gurbanowa, Aýdogdy Sopyýew, Ýolaman Nurymow, Muhammetguly Kasymow, Oguljahan Kulyýewa dagy döredipdir. Şeýle hem Puşkin adyndaky Döwlet rus drama teatrynyň aktýorlary Swýatoslaw Lawin, Anastasiýa Zagorodnewa, Mihail Rogow hem filmde surata düşüpdirler.