2023-nji ýylyň 5-nji iýulynda Türkmenistanyň Daşary işler ministri Raşid Meredow Aşgabada iş sapary bilen gelen Beýik Britaniýanyň Daşary işler, arkalaşyk we ösüş ministriniň parlament orunbasary Leo Doherti bilen gepleşikleri geçirdi. Bu barada ýurdumyzyň daşary syýasat edarasy habar berýär.

Duşuşygyň dowamynda taraplar syýasy-diplomatik, söwda-ykdysady we medeni-ynsanperwer häsiýetli ugurlaryň giň gerimini içine alýan ikitaraplaýyn gün tertibiniň derwaýys meselelerini ara alyp maslahatlaşdylar.

R.Meredow türkmen-britan hyzmatdaşlygynyň netijeli ösdürilýändigini aýratyn belledi. Şu nukdaýnazardan, daşary syýasat edarasynyň ýolbaşçysynyň belleýşi ýaly, hormatly Prezidentimiz Serdar Berdimuhamedowyň şu ýylyň maýynda Patyşa Karl III täç geýdirmek dabarasyna gatnaşmagy döwletara gatnaşyklaryny pugtalandyrmakda möhüm waka boldy.

Şeýle-de taraplar söwda-ykdysady gatnaşyklary işjeňleşdirmegi, energetika, howanyň üýtgemegi, oba we suw hojalygy ýaly möhüm ugurlarda hyzmatdaşlygy ösdürmegi taýýarlygy mälim etdiler.

Türkmen tarapy parlament diplomatiýasynyň möhüm ornuny bellemek bilen, parlamentara gatnaşyklary işjeňleşdirmegi teklip etdi.

Mundan başga, diplomatlar medeniýet, arheologiýa, bilim pudaklarynda, şeýle-de Türkmenistanda iňlis dilini öwrenmek babatynda alnyp barylýan oňyn hyzmatdaşlygy tassykladylar.

Duşuşygyň netijeleri boýunça, Türkmenistanyň we Beýik Britaniýanyň daşary syýasy edaralarynyň arasynda Teswirnama gol çekişmek dabarasy bolup geçdi.