Şu gün hormatly Prezidentimiz Serdar Berdimuhamedowyň tabşyrygy boýunça Mejlisiň Başlygy D.Gulmanowa Braziliýa Federatiw Respublikasynyň Türkmenistanda täze bellenen Adatdan daşary we Doly ygtyýarly ilçisi Rubem Antonio Korrea Barbozadan ynanç hatyny kabul etdi.
Milli parlamentiň ýolbaşçysy döwlet Baştutanymyzyň adyndan ilçini ýokary diplomatik wezipä bellenilmegi bilen gutlap, iki ýurduň arasyndaky dostlukly gatnaşyklary, ikitaraplaýyn we köptaraplaýyn esasda, ilkinji nobatda, iri halkara guramalaryňdyr düzümleriň çäklerinde üstünlikli ösdürilýän netijeli hyzmatdaşlygy pugtalandyrmak boýunça asylly işinde üstünlikleri arzuw etdi.
Diplomat türkmen topragynda mähirli kabul edilendigi üçin hoşallygyny bildirip, öz ýurdunyň ýolbaşçylarynyň Garaşsyz, Bitarap Türkmenistany ösüşiň ýoly bilen ynamly öňe alyp barýan hormatly Prezidentimiz Serdar Berdimuhamedowa iberen salamyny we iň gowy arzuwlaryny ýetirdi. Ilçi alyp barýan oňyn syýasaty esasynda dünýäde uly abraýa eýe bolan döwletde Braziliýa wekilçilik etmegiň özi üçin hormatdygyny nygtady.
Söhbetdeşligiň dowamynda dostlukly ýurduň doly ygtyýarly wekili Bitarap Türkmenistanyň içeri we daşary syýasatynyň esasy ugurlary, döwlet Baştutanymyzyň başlangyjy boýunça amala aşyrylýan giň möçberli özgertmeler, iri halkara taslamalar bilen tanyşdyryldy. Hormatly Prezidentimiz Serdar Berdimuhamedowyň baştutanlygynda durmuşa geçirilýän hem-de innowasion esasda milli ykdysadyýetimizi diwersifikasiýa ýoly bilen ösdürmäge, döwrebap infrastrukturalary döretmäge, halkymyzyň ýaşaýyş-durmuş derejesini yzygiderli ýokarlandyrmaga gönükdirilen durmuş-ykdysady maksatnamalara aýratyn üns çekildi.
Ilçi Rubem Antonio Korrea Barboza türkmen parlamentiniň düzümi hem-de dürli ulgamlarda amala aşyrylýan özgertmeleri kanunçylyk taýdan üpjün etmek boýunça alyp barýan köpugurly işi bilen tanyşdyryldy. Şunuň bilen baglylykda, parlamentara gatnaşyklary, şol sanda halkara parlament düzümleriniň çäklerinde hyzmatdaşlygy işjeňleşdirmäge özara taýýarlyk beýan edildi.
Şeýle hem diplomat söwda-ykdysady, ylym-bilim, sport, syýahatçylyk ulgamlarynda hyzmatdaşlygy giňeltmek, iki halkyň arasyndaky dostluk we özara düşünişmek gatnaşyklarynyň pugtalandyrylmagyna ýardam berýän medeni dialogy işjeňleşdirmek üçin uly mümkinçilikleriň bardygyny nygtady.
Duşuşygyň ahyrynda Braziliýa Federatiw Respublikasynyň Türkmenistandaky Adatdan daşary we Doly ygtyýarly ilçisi Rubem Antonio Korrea Barboza iki ýurduň bähbitlerine doly laýyk gelýän köpugurly we netijeli hyzmatdaşlygy mundan beýläk-de ösdürmek üçin ähli tagallalary etjekdigine ynandyrdy.
***
Onuň Alyhezreti,
Türkmenistanyň Prezidenti
jenap Serdar Berdimuhamedowa
Jenap Prezident!
Ýurtlarymyzyň arasyndaky dostlukly gatnaşyklary pugtalandyrmak maksady bilen, men jenap Rubem Antonio Korrea Barbozany Braziliýa Federatiw Respublikasynyň Türkmenistandaky Adatdan daşary we Doly ygtyýarly ilçisi wezipesine bellemek kararyna geldim. Jenap Rubem Antonio Korrea Barbozanyň şahsy häsiýetleri öz üstüne ýüklenen wezipäni Siziň Alyhezretiňiziň hormatyny we ynamyny gazanmaga mynasyp derejede ýerine ýetirjekdigine ynam döredýär.
Şunuň bilen baglylykda, Siziň Alyhezretiňizden ony hoşniýetli kabul etmegiňizi hem-de Size meniň adymdan ähli beýan etjeklerine, hususan-da, Size belent hormat goýýandygym baradaky ynandyrmalarymy ýetirende, oňa doly ynanmagyňyzy haýyş edýärin.
Luis Inasiu Lula da Silwa,
Braziliýa Federatiw Respublikasynyň Prezidenti.
